ថវិកា ស្បៀងអាហារ និងសម្ភារៈ ជាអំណោយរបស់សម្តេចធិបតី ហ៊ុន ម៉ាណែត និងលោកជំទាវ ត្រូវបានប្រគល់ជូនពលរដ្ឋ រលំផ្ទះដោយខ្យល់កន្ទ្រាក់ នៅស្រុកស្ទោង
ភ្នំពេញ៖ កាលពីយប់ថ្ងៃទី២៨ ខែតុលា ឆ្នាំ២០២៣ មានករណីភ្លៀងមួយមេធំ និងមានខ្យល់កន្ទ្រាក់បណ្ដាលឱ្យដើមឈើមួយដើមធំ រលំសង្កត់ផ្ទះប្រជាពលរដ្ឋក្រីក្រមួយខ្នង បណ្ដាលឱ្យខូចខាតផ្ទះសំបែងនិងទ្រព្យសម្បត្តិមួយចំនួន នៅភូមិបវែងឃុំបន្ទាយស្ទោង ស្រុកស្ទោង ខេត្តកំពង់ធំ។
ដើម្បីជួយសម្រាលការលំបាករបស់ប្រជាជន នៅរសៀលថ្ងៃទី៣០ ខែតុលា ឆ្នាំ២០២៣ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការី រួម ជាមួយ អាជ្ញាធរ ដែនដី នាំយកថវិកា ស្បៀងអាហារ និងសម្ភារៈ ដែលជាអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ពេជ ចន្ទមុន្នី ទៅប្រគល់ជូនប្រជាពលរដ្ឋឈ្មោះ ណៃ ណាត់ និងក្រុមគ្រួសារ ដែលត្រូវខ្យល់រលំបាក់ដើមឈើសង្កត់លើផ្ទះ បណ្តាលឲ្យខូចខាតទ្រព្យសម្បត្តិមួយចំនួន និងផ្ទះសំបែងទាំងស្រុង ។
នៅក្នុងឱកាសនេះឧត្តមសេនីយ៍ទោ សោម ស៊ុន បានថ្លែងនូវការសោកស្តាយចំពោះគ្រោះមហន្តរាយដែលបណ្តាលឲ្យឧ្យខូចខាតទ្រព្យសម្បត្តិ និងផ្ទះសំបែងរបស់ប្រជាពលរដ្ឋក្រីក្រនៅពេលនេះ ។ ជាមួយនោះដែរក៏បានណែនាំដល់ប្អូន ប្រជាពលរដ្ឋទាំងអស់ ត្រូវប្រុងប្រយ័ត្នខ្ពស់ពេលមានខ្យល់ និងភ្លៀងធ្លាក់ ត្រូវរកកន្លែងមានសុវត្ថិភាព ព្រោះអាចមានគ្រោះថ្នាក់ជាយថាហេតុ ដូចជាផ្គររន្ទះបណ្ដាលឲ្យគ្រោះថ្នាក់ដល់អាយុជីវិតជាដើម ។
ក្នុងឱកាសចុះសាកសួរសុខទុក្ខនៅពេលនេះ ឧត្តមសេនីយ៍ទោ សោម ស៊ុន ក៏បាននាំយកថវិកា សម្ភរៈ និងអំណោយស្បៀង អាហារ គ្រឿង ឧបភោគ បរិភោគ របស់សម្តេចមហាបវរធិបតី ហ៊ុន ម៉ាណែត និងលោកជំទាវ ពេជ ចន្ទមុន្នី ឧបត្ថម្ភជូនគាត់នៅពេលនេះរួមមាន៖ ស័ង្កសីចំនួន ៤០សន្លឹក អង្ករ មីជាតិ៤កេស ទឹកត្រី ទឹកស៊ីអ៉ីវ ត្រីខ និងថវិកាមួយចំនួនផងដែរ ដើម្បីឲ្យក្រុមគ្រួសារគាត់ដំណើរការសាងសង់លំនៅឋានឡើងវិញ។
លោក ណៃ ណាត់ និងក្រុមគ្រួសារ រួមជាមួយអាជ្ញាធរដែនដី ឃុំ ភូមិបានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចធិបតី ហ៊ុន ម៉ាណែត និងលោកជំទាវ ព្រមទាំងមេបញ្ជាការតំបន់ប្រតិបត្តិការសឹករងកំពង់ធំ និងសហការី ដែលបានជួយដោះស្រាយថវិកា សម្ភារៈ និងគ្រឿងឧបភោគបរិភោគ ដើម្បីសម្រាលការលំបាក និងបានដំណើរការសាងសង់លំនៅឋានឡើងវិញនៅពេលនេះ និងសូមគោរពជូនពរសម្ដេច លោកជំទាវ និងក្រុមការងារទាំងអស់ សូមទទួលបាននូវពុទ្ធពរទាំងឡាយបួនប្រការ កុំបីឃ្លៀងឃ្លាតឡើយ ៕
