អភិបាលខេត្តស្ទឹងត្រែង ផ្ដល់យោបល់ ៥ចំណុច ដើម្បីធានាបានគុណភាព ប្រសិទ្ធភាព តម្លាភាព និងគណនេយ្យភាព នៃការផ្តល់សេវាសាធារណៈជូនប្រជាពលរដ្ឋ

ភ្នំពេញ៖ ក្នុងពិធីប្រកាសចូលកាន់មុខតំណែងប្រធានសាលាដំបូង និងព្រះរាជអាជ្ញានៃអយ្យការ អមសាលាដំបូងខេត្តស្ទឹងត្រែង នាថ្ងៃទី៣០ ខែតុលា ឆ្នាំ២០២៣ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានផ្ដល់មតិយោបល់លើកិច្ចការងារសំខាន់ៗចំនួន ៥ចំណុច ក្នុងគោលបំណងដើម្បីធានាបាននូវគុណភាព ប្រសិទ្ធភាព តម្លាភាព និងគណនេយ្យភាព នៃការផ្តល់សេវាសាធារណៈ ជាពិសេស សេវាយុត្តិធម៌សង្គម និងបង្កើនជំនឿទុកចិត្តពីប្រជាពលរដ្ឋលើវិស័យយុត្តិធម៌ឱ្យកាន់តែល្អប្រសើរ ។

ពិធីប្រកាសចូលកាន់តំណែងនេះ ធ្វើឡើងក្រោមអធិបតីភាព ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ។

ក្នុង​ឱកាសនោះឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានលើកទឹកចិត្តចំពោះស្ថាប័ន អង្គភាព ផ្នែកមានសមត្ថកិច្ចនិងមន្ត្រីរាជការទាំងអស់នៃខេត្តស្ទឹងត្រែង ដែលបាននិងកំពុងចូលរួមយ៉ាងសកម្មឥតរួញរា ក្នុងការរួមចំណែកអនុវត្តកម្មវិធីនយោបាយ យុទ្ធសាស្ត្របញ្ចកោណ ដំណាក់កាលទី១ និងផែនការយុទ្ធសាស្ត្រអភិវឌ្ឍន៍ជាតិ របស់រាជរដ្ឋាភិបាល នីតិកាលទី៧នៃរដ្ឋសភា ដែលដឹកនាំប្រកបដោយថាមពល ស្វាហាប់ ឈ្លាសវៃ និងប៉ិនប្រសប់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការបន្តជំរុញលើកកម្ពស់ការអភិវឌ្ឍសេដ្ឋកិច្ចសង្គម សំដៅធានាបាននូវការអភិវឌ្ឍប្រកបដោយចីរភាព មានភាពរស់រវើក រីកចម្រើនទាំងជីវភាពរស់នៅ និងសុខដុមរមនា ជូនប្រជាពលរដ្ឋទូទាំងព្រះរាជាណាចក្រកម្ពុជា និងដោយឡែកសម្រាប់ខេត្តស្ទឹងត្រែង។

ឆ្លៀតក្នុងពិធីដ៏មានសារៈសំខាន់នេះ ឯកឧត្តម ស្វាយ សំអ៊ាង បានថ្លែងនូវអំណរគុណជាអនេកប្បការចំពោះឯកឧត្តម យ៉ា ណារិន ប្រធានសាលាដំបូងខេត្ត និងឯកឧត្តម ជេត ខេម ព្រះរាជអាជ្ញា នៃអយ្យការអមសាលាដំបូងខេត្តស្ទឹងត្រែង ដែលក្នុងការបំពេញនូវតួនាទី ភារកិច្ចរបស់ឯកឧត្ដមទាំងពីរ ក៏ដូចជាសហការី តែងតែមានកិច្ចសហប្រតិបត្តិការល្អជាមួយគ្រប់ផ្នែកមានសមត្ថកិច្ច និងអាជ្ញាធរមូលដ្ឋាននៅខេត្តស្ទឹងត្រែង លើក្របខ័ណ្ឌកិច្ចការតុលាការ និងយុត្តិធម៌សង្គម ដោយបានបន្សល់ទុកនូវស្នាដៃជាច្រើនក្នុងអាណត្តិការងារ ដើម្បីជាមូលដ្ឋាន សម្រាប់ការបន្តដឹកនាំស្ថាប័នមួយនេះឱ្យកាន់តែជោគជ័យបន្ថែមទៀត ស្របតាមសំណូមពរការងារ និងគោលនយោបាយស្តីពីកំណែទម្រង់ប្រព័ន្ធយុត្តិធម៌។ ជាមួយគ្នានោះឯកឧត្ដម ក៏បានអបអរសាទរឯកឧត្តម ឌិន ស៊ីវុទ្ធី ប្រធានសាលាដំបូងខេត្ត និងឯកឧត្ដម កែវ សុធា ព្រះរាជអាជ្ញានៃអយ្យការអមសាលាដំបូងខេត្តស្ទឹងត្រែង ដែលបានប្រកាសឱ្យចូលកាន់មុខតំណែង នាថ្ងៃនេះ។

ជាមួយនឹងអង្គពិធីដ៏មានអត្ថន័យនេះ ក្នុងគោលបំណងដើម្បីធានាបាននូវគុណភាព ប្រសិទ្ធភាព តម្លាភាព និងគណនេយ្យភាព នៃការផ្តល់សេវាសាធារណៈ ជាពិសេស សេវាយុត្តិធម៌សង្គម និងបង្កើនជំនឿទុកចិត្តពីប្រជាពលរដ្ឋលើវិស័យយុត្តិធម៌ឱ្យកាន់តែល្អប្រសើរ ឆ្លៀតក្នុងឱកាសនេះ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានរួមចំណែកជាមតិនូវការងារសំខាន់ៗមួយចំនួនដូចខាងក្រោម៖

ទី១-ត្រូវពង្រឹងស្មារតីសាមគ្គីភាព ឯកភាពផ្ទៃក្នុងឱ្យបានល្អនៅក្នុងចំណោមថ្នាក់ដឹកនាំអង្គភាពទាំងអស់ និងមន្ត្រីរាជការគ្រប់លំដាប់ថ្នាក់ ដោយឈរលើមូលដ្ឋាននៃការ លើកកម្ពស់ប្រសិទ្ធភាពការងារ ការគោរពច្បាប់ គោរពគោលការណ៍នានារបស់រដ្ឋ និង ពង្រឹងរបៀបរបបធ្វើការងារ ដើម្បីលើកកម្ពស់ការទទួលខុសត្រូវ និងភាពជាម្ចាស់របស់ មន្ត្រីនៅក្នុងបំពេញតួនាទី ភារកិច្ច ក្នុងការផ្តល់សេវាផ្នែកយុត្តិធម៌ដល់ប្រជាពលរដ្ឋ។

ទី២-ចូលរួមចំណែកយ៉ាងសកម្មក្នុងការអនុវត្តកម្មវិធីនយោបាយ និងយុទ្ធសាស្ត បញ្ចកោណដំណាក់កាលទី១ របស់រាជារដ្ឋាភិបាលកម្ពុជា ការដឹកនាំអនុវត្តគោលនយោបាយនានា ក្នុងការដឹកនាំការអភិវឌ្ឍតាមបែបប្រជាធិបតេយ្យនៅថ្នាក់ក្រោម ជាតិ រួមទាំងការប្រយុទ្ធប្រឆាំងឱ្យបានជាដាច់ខាតចំពោះភាពអសកម្ម ជាពិសេសត្រូវ ចូលរួមទប់ស្កាត់ឱ្យខាងតែបាននូវអំពើពុករលួយ ដើម្បីផ្តល់សច្ចៈធម៌ជូនសង្គមជាតិ និង ប្រជាជន។

ទី៣-ត្រូវយកចិត្តទុកដាក់អនុវត្តតាមបទប្បញ្ញត្តិច្បាប់ ប្រកបដោយការទទួលខុសត្រូវ ឱ្យមានប្រសិទ្ធភាព ភាពស័ក្ដិសិទ្ធិ យកចិត្តទុកដាក់ដឹកនាំអង្គភាពមួយនេះឱ្យមានការរីកចម្រើនជាសារវន្ត ពិសេសត្រូវពង្រឹងប្រសិទ្ធភាពនៃការផ្តល់សេវា ការបង្កើនជំនឿសេចក្តីទុកចិត្ត និងភាពកក់ក្ដៅដល់ប្រជាពលរដ្ឋដោយគ្មានការរើសអើងនៅក្នុងសង្គម។

ទី៤-ត្រូវពង្រឹងកិច្ចសហប្រតិបត្តិការឱ្យបានល្អប្រសើរជាមួយស្ថាប័ន មន្ទីរអង្គភាព ជំនាញជុំវិញខេត្ត ពិសេសត្រូវបង្កើនកិច្ចទំនាក់ទំនង និងសហប្រតិបត្តិការល្អ ជាមួយ អាជ្ញាធរខេត្ត និងផ្នែកមានសមត្ថកិច្ចគ្រប់ជាន់ថ្នាក់ ព្រមទាំងនគរបាលយុត្តិធម៌ទាំងអស់ ក្នុងការអនុវត្តតួនាទី ភារកិច្ច ដោយមិនត្រូវដុតឱ្យខ្លោចរោយឱ្យឆៅ នោះឡើយ ដើម្បីសម្រេចឱ្យបានជោគជ័យនូវរាល់កិច្ចការទាំងឡាយក្នុងវិស័យយុត្តិធម៌ និងដើម្បីឱ្យប្រជា ពលរដ្ឋចូលរួមគាំទ្រក្នុងការអនុវត្តច្បាប់កាន់តែមានប្រសិទ្ធភាពខ្ពស់ក្នុងសង្គម។ទី៥-សហការផ្ដល់ព័ត៌មាន អំពីលទ្ធផលការងារទាំងឡាយណាដែលស្របតាម គោលការណ៍កំណត់ ច្បាប់ និងលិខិតបទដ្ឋានគត្តិយុត្តិជាធរមាន មករដ្ឋបាលខេត្ត ជា ប្រចាំ ដើម្បីមានមូលដ្ឋានក្នុងការធ្វើរបាយការណ៍ ជូនទៅរាជរដ្ឋាភិបាល និងសុំការផ្តល់ អនុសាសន៍ដឹកនាំតាមការចាំបាច់។

ទន្ទឹមគ្នានោះដែរឯកឧត្តមអភិបាលខេត្តស្ទឹងត្រែង បានបង្ហាញក្តីសង្ឃឹម និងជឿជាក់ថា សាលាដំបូងខេត្ត អយ្យការអមសាលាដំបូង និង លេខាធិការដ្ឋាននៃសាលាដំបូងខេត្ត ព្រមទាំងអង្គភាពចំណុះ យកចិត្តទុកដាក់បំពេញ ការងារតាមសមត្ថកិច្ចជំនាញ និងវិជ្ជាជីវៈ ក្រមសីលធម៌ការងាររបស់ខ្លួន ឱ្យទទួលបាន ជោគជ័យ តាមបំណងប្រាថ្នារបស់ស្ថាប័ន និងបានផ្ដល់សេវាយុត្តិធម៌ជូនប្រជាពលរដ្ឋ បានល្អប្រសើរ ជាក់ជាពុំខាន ៕