នាយឧត្តមសេនីយ៍ សេង ផល្លី ដឹកនាំកិច្ចប្រជុំ ស្ដីពីការពង្រឹងការងារគ្រប់គ្រង និងប្រកាសសមាសភាពថ្នាក់ដឹកនាំ នៃអគ្គនាយកដ្ឋានធនធានមនុស្ស

ភ្នំពេញ៖ ឯកឧត្ដម នាយឧត្តមសេនីយ៍ សាស្ត្រាចារ្យ សេង ផល្លី អគ្គនាយក នៃអគ្គនាយកដ្ឋានធនធានមនុស្ស ក្រសួងមហាផ្ទៃ នាថ្ងៃសុក្រ ទី២៧ ខែតុលា ឆ្នាំ២០២៣នេះ បានអញ្ជើញជាអធិបតីដឹកនាំកិច្ចប្រជុំ ស្ដីពីការពង្រឹងការងារគ្រប់គ្រង និងប្រកាសសមាសភាពថ្នាក់ដឹកនាំ អគ្គនាយករង ប្រធាននិងអនុប្រធាននាយកដ្ឋាន នាយការិយាល័យនិងប្រធានការិយាល័យ នៃអគ្គនាយកដ្ឋានធនធានមនុស្ស ដោយមានការអញ្ជើញចូលរួមពី អគ្គនាយករង ប្រធាននិងអនុប្រធាននាយកដ្ឋាន នាយការិយាល័យនិងប្រធានការិយាល័យ និងមន្ដ្រីពាក់ព័ន្ធជាច្រើនរូបទៀត ក្រោមចំណុះអគ្គនាយកដ្ឋានធនធានមនុស្ស។

នាឱកាសនោះដែរ ឯកឧត្ដម នាយឧត្តមសេនីយ៍ សាស្ត្រាចារ្យ សេង ផល្លី បានសម្ដែងនូវការស្វាគមន៍ដល់អង្គប្រជុំទាំងមូល បានអញ្ជើញចូលរួមកិច្ចប្រជុំ នាពេលព្រឹកនេះ។ ឯកឧត្ដម នាយឧត្តមសេនីយ៍ បានចាត់ទុកថា កិច្ចប្រជុំនាពេលព្រឹកនេះ គឺជាកិច្ចប្រជុំមួយ ពិតជាមានសារៈសំខាន់ ដោយមានការបូកបញ្ជូលប្រកាសសមាភាពថ្នាក់ដឹកនាំ អគ្គនាយករង ប្រធាននិងអនុប្រធាននាយកដ្ឋាន នាយការិយាល័យនិងប្រធានការិយាល័យ របស់អគ្គនាយកដ្ឋានធនធានមនុស្ស។ លើសពីនេះ ឯកឧត្ដម នាយឧត្តមសេនីយ៍ បានបន្ថែមទៀតថា កិច្ចប្រជុំនាពេលព្រឹកនេះ ក៏ជាកិច្ចប្រជុំមួយ ក្នុងក្របខ័ណ្ឌគ្រួសារ នៃអគ្គនាយកដ្ឋានធនធានមនុស្ស។

ឯកឧត្ដម នាយឧត្តមសេនីយ៍ សាស្ត្រាចារ្យ សេង ផល្លី ក៏បានណែនាំដល់មន្ដ្រីទាំងអស់ នៅក្រោមចំណុះអគ្គនាយកដ្ឋានធនធានមនុស្ស ត្រូវខិតខំប្រឹងប្រែងបំពេញការងារបន្ថែមទៀត តាមតួនាទីភារកិច្ចបានប្រគល់ជូន ដើម្បីសម្រេចបានជោគជ័យជូនអគ្គនាយកដ្ឋាន ក៏ដូចជា ក្រសួងមហាផ្ទៃ៕