ភ្នំពេញ៖ ឯកឧត្តម គង់ គឹមនី អភិបាលរងខេត្តក្រចេះ និងជាប្រធានលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្ត នៅរសៀលថ្ងៃព្រហស្បតិ៍ ៦រោច ខែភទ្របទ ឆ្នាំ ថោះ បញ្ចស័ក ព.ស.២៥៦៧ ត្រូវនឹងថ្ងៃទី៥ ខែតុលា ឆ្នាំ២០២៣ បានអញ្ជេីញដឹកនាំកិច្ចប្រជុំត្រៀមប្រារព្ធពិធីទិវាជាតិគ្រោះមហន្តរាយ ១៣តុលា ឆ្នាំ២០២៣ ក្រោមប្រធានបទ “ព័ត៌មានអាចសង្រ្គោះជីវិតរបស់អ្នកពីគ្រោះមហន្តរាយ” និងកម្មវិធីផ្សព្វផ្សាយប្រព័ន្ធ១២៩៤ ដែលប្រារព្ធឡេីងនៅថ្ងៃទី០៩ ខែតុលា ឆ្នាំ២០២៣ នៅបរិវេណសាលមហោស្រព។
ឯកឧត្តម គង់ គឹមនី អភិបាលរងខេត្ត និងជាប្រធានលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្ត បានជម្រុញដល់មន្ទីរអង្គភាពពាក់ព័ន្ធ ឲ្យពន្លឿនលេីការចែកលិខិតអញ្ជេីញមុខសញ្ញាអ្នកចូលរួម រៀបចំស្តង់ ឬBoots សម្រាប់ការដាក់តាំងពិពណ៍ភូមិមួយ ផលិតផលមួយ របស់ប្រជាពលរដ្ឋ សម្រាប់ជាទស្សនីភាពដល់អ្នកចូលរួមក្នុងកម្មវិធី និងត្រូវត្រៀមលក្ខណៈទទួលខុសត្រូវការងាររបស់ខ្លួនប្រកបដោយការយកចិត្តទុកដាក់ខ្ពស់បំផុត។
គូសបញ្ជាក់ដែលថា ទិវាជាតិគ្រោះមហន្តរាយ ១៣ តុលា ឆ្នាំ២០២៣នេះ ត្រូវបានប្រារព្ធធ្វេីឡេីងនៅខេត្តក្រចេះក្រោមប្រធានបទ “ព័ត៌មានអាចសង្រ្គោះជីវិតរបស់អ្នកពីគ្រោះមហន្តរាយ” ក្នុងគោលបំណង លេីកកម្ពស់ជាសាធារណៈ ស្ដីពីផលប្រយោជន៍នៃការប្រេីប្រាស់ប្រព័ន្ធ ១២៩៤ និងការកាត់បន្ថយហានិភ័យគ្រោះមហន្តរាយតាមរយៈការចូលរួមរបស់សហគមន៍ និងថ្នាក់ដឹកនាំដែលកំពុងអនិវត្តនៅថ្នាក់មូលដ្ឋានប្រកបដោយបរិយាបន្ន ៕
