ប្រមុខរាជរដ្ឋាភិបាល៖ សូមបងប្អូនពលករខ្មែរនៅកូរ៉េ កុំឲ្យបារម្ភរឿងថ្លៃសេវាធ្វើលិខិតឆ្លងដែន មិនដូចការរិះគន់របស់ក្រុមប្រឆាំងឡើយ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសប្រាប់ពលករខ្មែរ ដែលកំពុងធ្វើការនៅកូរ៉េខាងត្បូង កុំឲ្យបារម្ភរឿងថ្លៃសេវាធ្វើលិខិតឆ្លងដែន ឡើងថ្លៃជាងមុនឱ្យសោះ គឺមិនដូចការរិះគន់របស់ក្រុមប្រឆាំងនោះឡើយ ។

ក្នុងឱកាសជួបសំណេះសំណាល ជាមួយកម្មករនិយោជិតជិត ២ម៉ឺននាក់ នៅស្រុកបាទី ខេត្តតាកែវ នាថ្ងៃទី១៩ ខែកញ្ញា សម្ដេចមហាបវរធិបតី មានប្រសាសន៍ថា មានប្រជាពលរដ្ឋ ក៏ដូចជាពលករខ្លះបានបង្ហាញការព្រួយបារម្ភ ចំពោះតម្លៃសេវាធ្វើលិខិតឆ្លងដែន ឬបន្តសុពលភាពលិខិតឆ្លងដែន នៅសាធារណរដ្ឋកូរ៉េផ្ទាល់នោះ អាចឡើងថ្លៃជាងមុនទ្វេគុណ គួបផ្សំនឹងការរិះគន់ញុះញង់ពីសំណាក់ក្រុមប្រឆាំងផងដែរ ។

សម្ដេចធិបតីបញ្ជាក់ថា «ថ្លៃសេវាអត់មានគុណជាពីរនោះទេ គ្រាន់តែអស់ថ្លៃផ្ញើបន្តិចបន្តួចប៉ុណ្ណោះ ព្រោះការបំពេញបែបបទស្នើសុំ និងកិច្ចការមួយចំនួនទៀត គឺធ្វើតាមអនឡាញ ដូច្នេះសូមបងប្អូននៅកូរ៉េខាងត្បូងកុំព្រួយបារម្ភរឿងថ្លៃឡើងគុណជាពីរឱ្យសោះ មិនដូចការរិះគន់របស់ក្រុមប្រឆាំងនោះឡើយ»។

ជាមួយគ្នានោះសម្ដេច បានណែនាំឲ្យឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ពិភាក្សាជាមួយក្រសួង ស្ថាប័ន ដៃគូពាក់ព័ន្ធ ដើម្បីរៀបចំការស្នើសុំបន្តសុពលភាព លិខិតឆ្លងដែនរបស់ពលករខ្មែរនៅកូរ៉េខាងត្បូង ឱ្យកាន់តែងាយស្រួល និងកាត់បន្ថយការចំណាយឱ្យទាបជាងមុន។

លើសពីនេះសម្ដេច ក៏បានណែនាំឲ្យរដ្ឋមន្ត្រីក្រសួងការងារ សហការជាមួយស្ថានទូតកម្ពុជាប្រចាំកូរ៉េខាងត្បូង ជួយសម្របសម្រួលជូនពលករខ្មែរ ប្រសិនបើលើសខ្វះអ្វីបន្តិចបន្តួចជាមួយភាគីកូរ៉េ ពិសេសក៏ត្រូវជួយសម្របសម្រួលក្នុងការបំពេញបែបបទ របស់ពលករខ្មែរនៅទីនោះផងដែរ ៕