ឯកឧត្តម ចាន់ យុត្ថា ណែនាំដល់ប្រធានមន្ទីរធនធានទឹក ខេត្តសៀមរាប ត្រូវត្រៀមលក្ខណៈឆ្លើយតបភ្លាមៗចំពោះគ្រោះមហន្តរាយណាមួយដែលអាចកើតមានឡើងជាយថាហេតុ

ភ្នំពេញ៖ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម បានណែនាំដល់ប្រធានមន្ទីរធនធានទឹក ខេត្តសៀមរាបត្រូវបន្តយកចិត្តទុកដាក់ចំពោះតួនាទី និងភារកិច្ចរបស់ខ្លួន និងត្រៀមលក្ខណៈឆ្លើយតបភ្លាមៗចំពោះគ្រោះមហន្តរាយណាមួយដែលអាចកើតមានឡើងជាយថាហេតុ។

កាលពីរសៀលថ្ងៃទី០២ និងព្រឹកថ្ងៃទី០៣ ខែកញ្ញា ឆ្នាំ២០២៣ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម រួមជាមួយសហការី និងលោកប្រធានមន្ទីរខេត្ត បានបន្តចុះពិនិត្យស្ថានភាពទឹកសម្រាប់ការងារបង្កបង្កើនផលស្រូវវស្សានៅក្នុងភូមិសាស្ត្រខេត្តសៀមរាប។

ឯកឧត្តមរដ្ឋលេខាធិការ អមដំណើរដោយលោកប្រធានមន្ទីរធនធានទឹក និងឧតុនិយមខេត្តសៀមរាប និងមន្ត្រីជំនាញ បានចុះពិនិត្យផ្ទាល់នៅទីតាំងទំនប់អាងម្កាក់នៅក្នុងភូមិម្កាក់ ឃុំគោកធ្លកលើ ស្រុកជីក្រែង និងទំនប់បង្ហៀរអាងទឹកស្ទឹងស្រែង១ នៅក្នុងឃុំស្លែងស្ពាន ស្រុកស្រីស្នំ ខេត្តសៀមរាប។

បើតាមសេចក្តីរាយការណ៍របស់លោកប្រធានមន្ទីរបានឱ្យដឹងថា ស្ថានភាពទូទៅនៃការងារបង្កបង្កើនផលស្រូវរដូវវស្សា មានការលូតលាស់ល្អ និងមានទឹកគ្រប់គ្រាន់ គឺពុំមានបញ្ហាប្រឈម និងកង្វះទឹកនោះទេ។ លោកបានបញ្ជាក់ថា បរិមាណទឹកភ្លៀងគិតមកដល់ពេលនេះមានបរិមាណ ៩២៧,៣មម នៅស្ថានីយបាគង បើធៀបរយៈពេលដូចគ្នានៅឆ្នាំ២០២២ គឺមានបរិមាណ ១ ២០៥,៨មម ដែលលើសឆ្នាំ២០២៣ ចំនួន២៧៨,៥មម។

បន្ទាប់ពីចុះពិនិត្យរួចរាល់ ឯកឧត្តមរដ្ឋលេខាធិការ បានផ្តល់អនុសាសន៍ឱ្យមន្ទីរធនធានទឹក និងឧតុនិយមខេត្តធ្វើរបាយការណ៍ជូនលោក ហៀង ម៉េង ប្រធាននាយកដ្ឋានវិស្វកម្ម ដើម្បីចុះសិក្សាទំនប់អាងម្កាក់ លើប្រឡាយមេ ស្ពានខៀវ ទំនប់អាងក្រពើ និងលើកគម្រោងដាក់ជូនទៅនាយកដ្ឋានវិស្វកម្ម ក្នុងឆ្នាំ២០២៤ ខាងមុខនេះ ។

ជាមួយគ្នានេះ ឯកឧត្តមរដ្ឋលេខាធិការក៏បានណែនាំឱ្យសិក្សាប្រឡាយមេមួយខ្សែខាងកើតផ្លូវជាតិលេខ៦៨ ពីខេត្តឧត្តរមានជ័យមកកាន់ភូមិសាស្ត្រស្រុកក្រឡាញ់ និងស្រុកពួកផងដែរ។

ឯកឧត្តមរដ្ឋលេខាធិការ បានវាយតម្លៃខ្ពស់ចំពោះលោកប្រធានមន្ទីរធនធានទឹក និងឧតុនិយមខេត្តសៀមរាប ព្រមទាំងមន្ត្រីរាជការក្នុងមន្ទីរ ដែលបានយកចិត្តទុកដាក់បំពេញភារកិច្ចប្រកបដោយការទទួលខុសត្រូវ និងឆ្លើយតបទៅនឹងតម្រូវការរបស់ប្រជាកសិករបានទាន់ពេលវេលា។

ជាចុងក្រោយឯកឧត្តមក៏បានធ្វើការផ្ដាំផ្ញើបន្ថែមដល់លោកប្រធានមន្ទីរ ត្រូវបន្តយកចិត្តទុកដាក់ចំពោះតួនាទី និងភារកិច្ចរបស់ខ្លួន និងត្រៀមលក្ខណៈឆ្លើយតបភ្លាមៗចំពោះគ្រោះមហន្តរាយណាមួយដែលអាចកើតមានឡើងជាយថាហេតុ៕