នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បំភ្លឺករណីផលិតកម្មមួយ ត្រូវបានរោងភាពយន្ត បដិសេធ មិនទទួលចាក់បញ្ចាំងភាពយន្ត

ភ្នំពេញ៖ នាពេលថ្មីៗនេះ មានគណនីហ្វេសប៊ុកមួយ ឈ្មោះ ភាពយន្តខ្មែរ បានធ្វើការបង្ហោះផ្សព្វផ្សាយរូបភាព និងពាក្យបណ្ដឹងចោទប្រកាន់មកលើរោងភាពយន្ត Legend រោងភាពយន្ត Major និងរោងភាពយន្ត Prime ថា ជារោងភាពយន្តក្បត់ជាតិ មិនទទួលចាក់បញ្ចាំងភាពយន្តខ្មែររឿង ឃាតករចិត្តល្អ ផលិតដោយផលិតកម្ម ឃីតឃីត ភីកឈ័រ ។

លើសពីនេះគណនីហ្វេសប៊ុកនេះ ក៏បានប្រើប្រាស់ពាក្យពេជន៍បរិហារ ជេរប្រមាថ និងគំរាមកំហែងដល់មន្ត្រីរាជការសាធារណៈ ព្រមទាំងបុគ្គលិករោងភាពយន្តទាំង ៣ ខាងលើ។

ពាក់ព័ន្ធនឹងការផ្សព្វផ្សាយ ខាងលើនេះ នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បានធ្វើការបំភ្លឺថាៈ ក្រោយពីទទួលបានពាក្យបណ្ដឹងរបស់ផលិតកម្ម ឃីតឃីត ភីកឈ័រ សុំអន្តរាគមន៍ពីក្រសួងវប្បធម៌ និងវិចិត្រសិល្បៈ អគ្គនាយកដ្ឋានបច្ចេកទេសវប្បធម៌ នៃក្រសួង វប្បធម៌ និងវិចិត្រសិល្បៈ បានដឹកនាំកិច្ចប្រជុំសម្របសម្រួល ជាមួយគ្រប់ភាគីពាក់ព័ន្ធ តែមិនអាចឈាន ដល់ការព្រមព្រៀងគ្នាបាន៕