ឧបនាយករដ្ឋមន្ត្រី ហង់ជួន ណារ៉ុន អញ្ជើញបើកសិក្ខាសាលាពិគ្រោះយោបល់ស្តីពី “ការរៀបចំគម្រោងមូលនិធិភាពជាដៃគូសកលសម្រាប់ការអប់រំ GPE2025-STG”

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅថ្ងៃសុក្រ ទី២៥ ខែសីហា ឆ្នាំ២០២៣ បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ស្តីពី “ការរៀបចំគម្រោងមូលនិធិភាពជាដៃគូសកលសម្រាប់ការអប់រំ GPE2025-STG”។

សិក្ខាសាលានេះ រៀបចំឡើងដើម្បី ពិគ្រោះយោបល់ស្តីពី “ការរៀបចំគម្រោងមូលនិធិភាពជាដៃគូសកលសម្រាប់ការអប់រំ ដោយផ្តោត លើការធ្វើបរិវត្តកម្មប្រព័ន្ធ GPE2025-STG នេះ ដើម្បីប្រមូលធាតុចូលបន្ថែម ក្នុងគោលបំណងដើម្បី រៀបចំគម្រោងមូលនិធិភាពជាដៃគូសកលសម្រាប់ការអប់រំ ដោយផ្តោតលើការធ្វើបរិវត្តកម្មប្រព័ន្ធ GPE2025- STG ឱ្យបានគ្រប់ជ្រុងជ្រោយ និងឆ្លើយតបទៅអាទិភាពសំខាន់ៗ និងការធ្វើបដិវត្តកម្មប្រព័ន្ធអប់រំ ដើម្បីកែលម្អលទ្ធផលសិក្សារបស់សិស្សនៅកម្ពុជា តាមរយៈការគ្រប់គ្រងវិស័យអប់រំ ការពង្រឹងគុណភាពអប់រំ ការ ពង្រឹងគុណវុឌ្ឈគ្រូបង្រៀន ការពង្រឹងវិធីសាស្ត្របង្រៀន និងរៀន ឱ្យឆ្លើយតបការអប់រំឌីជីថល និងការធ្វើ បរិវត្តកម្មប្រព័ន្ធអប់រំ។

គូសបញ្ជាក់ផងដែរថា ប្រទេសកម្ពុជាយើងបានកំពុងដំណើរការយ៉ាងរលូនឆ្ពោះទៅរកការបញ្ចប់ នៃដំណើរការរៀបចំឯកសារគម្រោងមូលនិធិភាពជាដៃគូសាកលសម្រាប់ការអប់រំលើកទី៥ ឬយើងហៅថា GPE2025។ ទន្ទឹមនឹងនេះ ក្រសួងបានកំណត់អាទិភាពសំខាន់ៗចំនួន ៣ ដើម្បីធ្វើឱ្យលទ្ធផលសិក្សារបស់សិស្សមាន ភាពប្រសើរឡើង រួមមាន៖
-ការសិក្សារៀនសូត្ររបស់សិស្សានុសិស្ស
-ការបង្រៀនប្រកបដោយគុណភាព
-សមភាពយេនឌ័រ។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សង្ឃឹមថាអ្នកចូលរួមទាំងអស់មានឱកាសពិភាក្សា ផ្ដល់នូវធាតុចូលល្អៗ និងគ្រប់ជ្រុងជ្រោយ ដើម្បី ក្រុមការងាររៀបចំ និងចងក្រងឯកសារនេះបានល្អប្រសើរ ហើយសង្ឈឹមថាមូលនិធិដែលនឹងចាប់ផ្តើមអនុវត្ត នៅដើមឆ្នាំ២០២៤ តាមកាលបរិច្ឆេទដែលបានគ្រោងទុក ៕