នាយឧត្តមសេនីយ៍ កែវ វណ្ណថន ដឹកនាំកិច្ចប្រជុំបូកសរុបលទ្ធផលការងារប្រចាំខែកក្កដា និងលើកទិសដៅការងារខែសីហាឆ្នាំ២០២៣ របស់នាយកដ្ឋានស៊ើបអង្កេត និងអនុវត្តនីតិវិធី

ភ្នំពេញ៖ ឯកឧត្ដម នាយឧត្តមសេនីយ៍ កែវ វណ្ណថន អគ្គនាយករង នៃអគ្គនាយកអន្តោប្រវេសន៍ តំណាងឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ រួមជាមួយ ឯកឧត្តម ឧត្តមសេនីយ៍ឯក អ៊ុក ហៃសីឡា អគ្គនាយករង និងឯកឧត្តម ឧត្តមសេនីយ៍ទោ ទូច សម្បត្តិ អគ្គនាយករង និងលោកឧត្តមសេនីយ៍ទោ ទាង សុឃាង ប្រធាននាយកដ្ឋាន នាព្រឹកថ្ងៃពុធ ៨រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៩ ខែសីហា ឆ្នាំ២០២៣ បានអញ្ជើញដឹកនាំកិច្ចប្រជុំបូកសរុបការងារប្រចាំខែកក្កដា និងលើកទិសដៅការងារខែសីហា ឆ្នាំ២០២៣ របស់នាយកដ្ឋានស៊ើបអង្កេត និងអនុវត្តនីតិវិធី ដោយមានការចូលរួមពីលោក លោកស្រី អនុប្រធាននាយកដ្ឋាន និងនាយ-នាយរងការិយាល័យទាំងអស់សរុប៧៨ នាក់។

បន្ទាប់ពីស្តាប់របាយការណ៍ និងមតិរបស់ឯកឧត្តម អគ្គនាយករង ប្រធាននាយកដ្ឋាន អនុប្រធាននាយកដ្ឋាន និងនាយការិយាល័យរួចហើយ ឯកឧត្តម នាយឧត្តមសេនីយ៍ កែវ វណ្ណថន បានឯកភាពលើរបាយការណ៍និងមតិទាំងអស់និងបានវាយតម្លៃខ្ពស់ចំពោះលទ្ធផលការងារដែលសម្រេចបានក្នុងខែកក្កដា កន្លងមកនេះ ដែលលទ្ធផលទាំងនេះ គឺផ្តើមចេញពីការខិតខំប្រឹងប្រែងបំពេញភារកិច្ចប្រកបដោយស្មារតីទទួលខុសត្រូវខ្ពស់ពីមន្រ្តីគ្រប់ថ្នាក់។

ជាមួយនឹងលទ្ធផលសម្រេចបានខាងលើ ឯកឧត្តម នាយឧត្តមសេនីយ៍ ក៏បានកត់សម្គាល់នូវបញ្ហាប្រឈមមួយចំនួនដែលត្រូវរួមគ្នាបន្តដោះស្រាយ និងបានណែនាំឲ្យបន្តពង្រឹងការអនុវត្តនីតិវិធីច្បាប់និងការគ្រប់គ្រងស្នាក់ការត្រៀមបណ្តេញចេញបង្កើនសកម្មភាពស៊ើបអង្កេតដើម្បីឈានដល់ការបង្ក្រាបសកម្មភាពខុសច្បាប់បង្កដោយជនបរទេស និងយកចិត្តទុកដាក់ពង្រឹងការប្រើប្រាស់ប្រព័ន្ធគ្រប់គ្រងវត្តមានជនបរទេសហៅកាត់ថាFPCS ស្របតាមគោលការណ៍របស់ក្រសួងមហាផ្ទៃ និងអគ្គនាយកដ្ឋានអន្តោប្រវេសន៍។

មុននឹងបញ្ចប់ ឯកឧត្តម នាយឧត្តមសេនីយ៍ ក៏បានផ្តាំផ្ញើមន្រ្តីទាំងអស់ត្រូវបន្តស្មារតីសាមគ្គីភាពផ្ទៃក្នុង និងការទទួលខុសត្រូវខ្ពស់យកចិត្តទុកដាក់អនុវត្តការងារភារកិច្ច និងទិសដៅដែលបានដាក់ចេញឲ្យមានប្រសិទ្ធភាពខ្ពស់ ដើម្បីរួមចំណែកក្នុងការរក្សាសន្តិសុខសណ្ដាប់ធ្នាប់ឲ្យបានល្អប្រសើរថែមទៀត ៕