ភ្នំពេញ៖ កាលពីថ្ងៃទី៧ ខែសីហា ឆ្នាំ២០២៣ វេលាម៉ោង ១២និង៤០នាទី កម្លាំងនៃបញ្ជាការដ្ឋានកងរាជអាវុធហត្ថខេត្តតាកែវ សហការជាមួយ កម្លាំងមូលដ្ឋានអាវុធហត្ថស្រុកសំរោង បានធ្វើការឃាត់ខ្លួនជនសង្ស័យ ០៣នាក់ ដកហូតបានថ្នាំញៀនមួយចំនួន នៅក្នុងមូលដ្ឋានស្រុកសំរោង ។
យោងតាមរបាយការណ៍របស់ សមត្ថកិច្ចបានឱ្យដឹងថា ដោយបានទទួលបទបញ្ជាពី លោកឧត្តមសេនីយ៍ត្រី សេង មហាមេបញ្ជាការ កងរាជអាវុធហត្ថខេត្តតាកែវ និងសម្របសម្រួលនីតិវិធីដោយ ឯកឧត្តម ឯក ឆេងហួត ព្រះរាអាជ្ញាអមសាលាដំបូងខេត្តតាកែវ កម្លាំងមន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងមូលដ្ឋានអាវុធហត្ថស្រុកសំរោង ដឹកនាំដោយលោក វរសេនីយ៍ឯក ង៉ែត ចាន់ធី មេបញ្ជាការរង បានចុះបង្រ្កាបនៅចំណុចផ្លូវជាតិលេខ២ ភូមិទួលចារ ឃុំសំរោង ស្រុកសំរោង ខេត្តតាកែវ វេលាម៉ោង ១២:៤០នាទី ថ្ងៃទី៧ ខែសីហា ឆ្នាំ២០២៣ ដោយធ្វើការឃាត់ខ្លួនជនសង្ស័យ ម្នាក់ឈ្មោះ ណែម ម៉ាណែត ភេទប្រុស អាយុ ២៦ឆ្នាំ ជនជាតិខ្មែរ មុខរបរមិនពិតប្រាកដ ( ជួញដូរនិងរក្សាទុក ដោយខុសច្បាប់នូវសារធាតុញៀន ) រស់នៅភូមិទួលចារ ឃុំសំរោង ស្រុកសំរោង ខេត្តតាកែវ ។ ដកហូតវត្ថុតាង៖ ១/ ម្សៅក្រាមពណ៌សថ្លាចំនួន ០១កញ្ចប់ និងទូរស័ព្ទ០១គ្រឿង។
ក្រោយពីស្ដាប់ចម្លើយជនសង្ស័យបានសារភាពថាថ្នាំញៀនសមត្ថកិច្ចដកហូត ខ្លួនទិញពីឈ្មោះ សុខា ទើបកម្លាំងយើងឈានទៅឃាត់ខ្លួនជនសង្ស័យឈ្មោះ សុខា ភេទប្រុស អាយុ ២០ឆ្នាំ (ជួញដូរ ប្រើប្រាស់ ) រស់នៅភូមិសំរោង ឃុំសំរោង ស្រុកសំរោង ខេត្តតាកែវ។ ដកហូតសម្ភារៈ៖ ម្សៅក្រាមពណ៌សថ្លាចំនួន ០២កញ្ចប់ (ធំ១) ដែកកេះ ០១ និងសម្ភារៈសេពថ្នាំញៀន (ខ្សៀរ)។
ក្រោយពីស្ដាប់ចម្លើយជនសង្ស័យឈ្មោះ សុខា បានឆ្លើយសារភាពថា ថ្នាំញៀន ដែលសមត្ថកិច្ចដកហូត គឺខ្លួនបានទទួលទិញពីឈ្មោះ ពិសិដ្ឋ ភេទប្រុស កម្លាំងយើងឈានទៅឃាត់ខ្លួនជនសង្ស័យ ឈ្មោះ វិសិត ភេទប្រុស អាយុ ២៣ឆ្នាំ ជនជាតិខ្មែរ រស់នៅភូមិវែង ឃុំសឹង្ហ ស្រុកសំរោង ខេត្តតាកែវ ។
ដករហូតសម្ភារៈ៖ ម្សៅក្រាមពណ៌សថ្លាចំនួន ១០ កញ្ចប់ (ធំ១) ទម្ងន់សរុប ៨.០៥g និងទូរស័ព្ទ០១គ្រឿង សម្ភារៈវេចខ្ចប់មួយចំនួន។
បច្ចុប្បន្ន ជនសង្ស័យនិងវត្ថុតាងត្រូវបានឃាត់ខ្លួន នៅទីបញ្ជាការ កងរាជអាវុធហត្ថខេត្ត ការិយាល័យជំនាញកសាងសំណុំរឿងបញ្ជូនទៅតុលាការ៕
