ឧត្តមសេនីយ៍ទោ សិទ្ធិ ឡោះ ដឹកនាំកិច្ចប្រជុំបូកសរុបសភាពការណ៍ការនិងលទ្ធផលកិច្ចប្រតិបត្តិការប្រចាំខែកក្កដា និងចែកលិខិតថ្លែងអំណរគុណដល់កងកម្លាំង ដែលបានបំពេញភារកិច្ចបានល្អកន្លងមក

ភ្នំពេញ៖ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានថ្លែងអំណរគុណដល់កងកម្លាំងនគរបាលទាំងអស់ដែលបានខិតខំយកអស់ស្មារតីទទួលខុសត្រូវខ្ពស់លើតួនាទីនិងភារកិច្ចរបស់ខ្លួនក្នុងការការពារសន្តិសុខ សណ្តាប់ធ្នាប់ សុវត្ថិភាពជូនថ្នាក់ដឹកនាំ ប្រជាពលរដ្ឋបានល្អក្នុងព្រឹត្តិការណ៍ធំៗដែលមានកន្លងមក ដូចជាក្នុងព្រឹត្តិការណ៍ប្រកួតកីឡាស៊ីហ្គេម និងកីឡាជនពិការប៉ារ៉ាហ្គេមជាដើម ពិសេសការពារសន្តិសុខ សណ្តាប់ធ្នាប់ សុវត្ថិភាពក្នុងដំណើរការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៧ ទទួលបានជោគជ័យ ប្របកដោយតម្លាភាព គ្មានអំពើហឹង្សា គ្មានការគំរាមកំហែង ដោយទទួលបាននូវការកោតសរសើរពីគ្រប់ថ្នាក់ដឹកនាំក្រសួងមហាផ្ទៃ អគ្គស្នងការនគរបាលជាតិ និងថ្នាក់ដឹកនាំខេត្តបន្ទាយមានជ័យ។

ការថ្លែងនេះក្នុងកិច្ចប្រជុំបូកសរុបសភាពការណ៍និងលទ្ធ ផលកិច្ចប្រតិបតិ្តការប្រចាំខែកក្កដា ឆ្នាំ២០២៣ និងលើកទិសដៅអនុវត្តខែបន្ទាប់នៅស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២៨ ខែកក្កដា ឆ្នាំ២០២៣។

ពិធីនេះមានការចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង នាយការិយាល័យ លោកអធិការ នគរបាលស្រុក ក្រុង ទាំង០៩ លោកមេបញ្ជាការវរសេនាតូចការពារព្រំដែនគោកទាំង០៤ នាយនគរបាលប៉ុស្តិ៍រដ្ឋបាលទាំង៦៧ និងនាយនគរបាលប៉ុស្តិ៍ការពារព្រំដែនទាំង៣២។

លោកឧត្តមសេនីយ៍ទោ សិទ្ធិ ឡោះ បានបន្តថា យើងជាកងកម្លាំងប្រដាប់អាវុធដាច់ខាតត្រូវតែការពារព្រះមហាក្សត្រ ការពារដ្ឋធម្មនុញ្ញ ការពាររាជរដ្ឋាភិបាលស្របច្បាប់ ដែលប្រសូត្រចេញពីប្រជាពលរដ្ឋបោះឆ្នោតឲ្យ និងបង្ការទប់ស្កាត់ឲ្យបាននូវរាល់ឧបាយកលប៉ុនប៉ងផ្តួលរំលំរាជរដ្ឋាភិបាលស្របច្បាប់និងមិនឲ្យជនណាមួយមកបំផ្លាញសុខសន្តិភាព ព្រមទាំងការពារបូរណភាពទឹកដីឲ្យបានគង់វង្ស។

ជាមួយគ្នានោះដែរ លោកឧត្តមសេនីយ៍ទោ ស្នងការ ក៏បានដាក់ចេញនូវទិសដៅជារួម ដោយជម្រុញដល់លោកអិការនគរបាល ស្រុក ក្រុង បន្តស្រាវជ្រាវស្វែងរកមុខសញ្ញាប្រព្រឹត្តបទល្មើសដែលនៅសេសសល់កំពុងរត់គេចខ្លួន និងបង្រ្កាបឲ្យខាងតែបានរាល់បទល្មើសកើតឡើង ដូចជាបទល្មើសព្រហ្មទណ្ឌ គ្រប់ប្រភេទ បទល្មើសគ្រឿងញៀន ការជួញដូរមនុស្ស និងការរៀបសំណ្តាប់ធ្នាប់សង្គមត្រូវរឹតបន្តឹងច្បាប់ចរាចរណ៍ផ្លូវគោកតាមអនុក្រឹត្យលេខ៣៩ បន្តផ្សព្វផ្សាយពីគោលនយោបាយ ភូមិ ឃុំ សង្កាត់មានសុវត្ថិ។

ម្យ៉ាងវិញទៀតគ្រប់បណ្តាអង្គភាពទាំងអស់ត្រូវត្រៀមកម្លាំង សម្ភារៈមធ្យោបាយ ដើម្បីដោះស្រាយរាល់គ្រោះថ្នាក់ផ្សេងៗកើតមានជាយថាហេតុ ពិសេសគឺគ្រោះទឹកជំនន់ដែលនឹងកើតមាននាពេលខាងមុខ។ ចំពោះការងារព្រំដែន ស្នើឲ្យលោកមេបញ្ជាការ វរសេនាតូចទាំង០៤និងកម្លាំងនគរបាលនៃអធិការដ្ឋានស្រុក ក្រុង នៅជាប់ព្រំដែន ត្រូវសហការគ្នាឲ្យបានល្អ ជាមួយកងកម្លាំងពាក់ព័ន្ធនៅតាមព្រំដែន អាជ្ញាធរឃុំ សង្កាត់ ក្រុង ស្រុកឲ្យបានជិតស្និតដើម្បីការពារបូរណភាពទឹកដីឲ្យបានគង់វង្ស ទបស្កាត់រាល់បទល្មើសឆ្លងដែនគ្រប់ប្រភេទ ជាងនេះទៀតត្រូវមានសាមគ្គីភាពផ្ទៃក្នុងឲ្យបានល្អ គោរពឲ្យម៉ឺងម៉ាត់នូវវិន័របស់កងកម្លាំងនរបាលជាតិ ព្រោះវិន័យជាត្រីវិស័យដែលនាំឲ្យមានសេចក្តីថ្លៃថ្នូរ ៕