មូលនិធិជាតិជំនួយសង្គម នាំយកប្រាក់គោលនយោបាយរបបសន្តិសុខសង្គមជូនក្រុមគ្រួសារសពឧបាសិកា កោះ ចិន្តា អតីតនាយិការងសាលាបឋមសិក្សាសំបួរមាស

ភ្នំពេញ៖ ឯកឧត្តម ឈួរ សុបញ្ញា រដ្ឋលេខាធិការ និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃមូលនិធិជាតិជំនួយសង្គម តំណាងដ៏ខ្ពង់ខ្ពស់ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងឯកឧត្តម សំហេង បុរស រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានក្រុមប្រឹក្សាភិបាលមូលនិធិជាតិជំនួយសង្គម នាយប់ថ្ងៃសុក្រ ១២រោច ខែបឋមាសាឍ ឆ្នាំថោះ បញ្ចស័ក ពុទ្ធស ករាជ ២៥៦៧ ត្រូវនឹងថ្ងៃទី១៤ ខែកក្កដា ឆ្នាំ២០២៣ បានយកប្រាក់គោលនយោបាយរបបសន្តិសុខសង្គម ១២ខែ នៃប្រាក់សពចុងក្រោយជូនក្រុមគ្រួសារសពឧបាសិកា កោះ ចិន្តា អតីតនាយិការងសាលាបឋមសិក្សាសំបួរមាស ដែលជាភរិយាឧបាសក សុខ សុវណ្ណរឹទ្ធិ អតីតនាយកសាលាបឋមសិក្សាស្ទឹងមានជ័យ ដែលបានទទួលមរណភាព នៅថ្ងៃអាទិត្យ ៧រោច ខែបឋមា សាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៩ ខែកក្កដា ឆ្នាំ២០២៣ វេលាម៉ោង ១០:៣០នាទីព្រឹក ក្នុងជន្មាយុ៧០ឆ្នាំ ដោយរោគាពាធ នៅសង្កាត់ដង្កោ ខណ្ឌដង្កោ រាជធានីភ្នំពេញ។

សូមជម្រាបជូនថា ប្រាក់គោលនយោបាយរបបសន្តិសុខសង្គមជូនគ្រួសារសពអតីតយុទជនជាកញ្ចប់ ដែលរាជរដ្ឋាភិបាលផ្តល់ជូនក្រុមគ្រួ សារសពនិវត្តន៍ជនជាលើកចុងក្រោយដែលមានទំហំទឺក ប្រាក់ស្មើ១២ដង នៃប្រាក់ឋានន្តរស័កចុងក្រោយមុនពេល ចូលនិវត្ត។

ដើម្បីទទួលបានប្រាក់គោលរបបនេះក្រុមគ្រួសារសពត្រូវបំពេញបែបបទ​ និងភ្ជាប់ឯកសារដូចខាងក្រោម៖
១.សេចក្តីចម្លងសំបុត្រមរណ:ភាព​
២.សៀវភៅគ្រួសារ​ ឬសៀវភៅស្នាក់នៅ
៣.សៀវភៅធនាគារ ឬប័ណ្ណព័ត៌មាន ឬATM
៤.អត្តសញ្ញាណប័ណ្ណអ្នកស្នើសុំ ៕