ប៉េកាំង៖ សមាជិកសភាចិនកំពុងពិចារណាច្បាប់ថ្មីមួយដើម្បីលើកកម្ពស់ស្មារតីស្នេហាជាតិនៅក្នុងប្រទេសចិនជាពិសេសក្នុងចំណោមមនុស្សជំនាន់ក្រោយ។
សេចក្តីព្រាងច្បាប់អប់រំស្នេហាជាតិ ត្រូវបានដាក់ជូនគណៈកម្មាធិការអចិន្ត្រៃយ៍រដ្ឋសភាជាតិ ដើម្បីអានជាលើកដំបូង។
យោងតាមសេចក្តីព្រាងច្បាប់នេះ ការអប់រំស្នេហាជាតិគ្របដណ្តប់លើវិស័យមួយចំនួនដូចជា មនោគមវិជ្ជា និងនយោបាយ ប្រវត្តិសាស្ត្រ និងវប្បធម៌ និមិត្តសញ្ញាជាតិ ភាពស្រស់ស្អាតនៃមាតុភូមិ ឯកភាពជាតិ និងសាមគ្គីភាពជាតិ សន្តិសុខ និងការពារជាតិ និងទង្វើរបស់វីរៈបុរស និងគំរូ។
ទាក់ទងនឹងការអនុវត្ត សេចក្តីព្រាងនេះសង្កត់ធ្ងន់លើការប្រើប្រាស់ធនធានបេតិកភណ្ឌបក្ស បេតិកភណ្ឌវប្បធម៌ មូលដ្ឋានអប់រំស្នេហាជាតិ និងតំបន់វប្បធម៌ក្នុងការអប់រំស្នេហាជាតិ។
ស្មារតីស្នេហាជាតិ នឹងត្រូវបានលើកតម្កើងតាមរយៈបុណ្យជាតិ និងរង្វាន់កិត្តិយស សកម្មភាពនានាក្នុងឱកាសបុណ្យជាតិ ខួប និងពិធីបុណ្យធំៗ ក៏ដូចជាតាមរយៈពិធីលើកទង់ជាតិ ការច្រៀងបទភ្លេងជាតិ និងការសន្យាភក្តីភាពចំពោះរដ្ឋធម្មនុញ្ញ។
ខណៈដែលចែងថាប្រជាពលរដ្ឋទាំងអស់ត្រូវទទួលបានការអប់រំស្នេហាជាតិ សេចក្តីព្រាងច្បាប់នេះបានគូសបញ្ជាក់អំពីការអប់រំកុមារ និងយុវជន។
សេចក្តីព្រាងច្បាប់បានកំណត់ថា សាលារៀនគ្រប់កម្រិតទាំងអស់គួរតែបញ្ចូលការអប់រំស្នេហាជាតិទៅក្នុងដំណើរការអប់រំទាំងមូល។ វាសង្កត់ធ្ងន់លើសារៈសំខាន់នៃការផ្តល់វគ្គសិក្សាទ្រឹស្តី និងទ្រឹស្តីនយោបាយប្រកបដោយគុណភាព និងការរួមបញ្ចូលខ្លឹមសារអប់រំស្នេហាជាតិទៅក្នុងមុខវិជ្ជាផ្សេងៗ។
ប្រភព៖ Xinhua
ប្រែសម្រួលដោយ៖ [ឡាយ លីហួ]
