សម្តេចតេជោ ហ៊ុន សែន បន្តអំពាវនាវឲ្យថៅកែរោងចក្រ និងកម្មកររួមគ្នា ទប់ស្កាត់កុំឲ្យមានការប្រើប្រាស់គ្រឿងញៀន និងបងតូចបងធំនៅតាមរោងចក្រ

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបន្តអំពាវនាវឲ្យថៅកែរោងចក្រ និងកម្មកររួមគ្នា ចូលរួមទប់ស្កាត់ កុំឲ្យមានបងតូចបងធំ និងជម្លោះ ជាពិសេសកុំឲ្យមានការប្រើប្រាស់គ្រឿងញៀន នៅតាមរោងចក្រ។

ក្នុងឱកាសបន្តចុះជួបសំណេះសំណាលជាមួយកម្មករ កម្មការិនី សរុបជិត២ម៉ឺននាក់ មកពីរោងចក្រ សហគ្រាសចំនួន១១ ដែលកំពុងដំណើរការអាជីវកម្ម ក្នុងរាជធានីភ្នំពេញ នាថ្ងៃទី១៣ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានបញ្ជាក់ថា «អ្វីដែលខ្ញុំសូមពីកម្មករ និងពីម្ចាស់រោងចក្រ សូមឲ្យរោងចក្រមួយ ក្លាយទៅជាសហគមន៍សុខសាន្ដមួយ ។ រោងចក្ររបស់យើង សូមកុំឲ្យមាន ការប្រើប្រាស់គ្រឿងញៀន កុំឲ្យមានបងតូចបងធំ កុំឲ្យមានជម្លោះ នៅក្នុងរោងចក្រ ត្រូវខិតខំធ្វើយ៉ាងម្ដេច ដើម្បីរួមចំណែកអនុវត្ដ គោលនយោបាយ ភូមិ-ឃុំ មានសុវត្ថិភាព» ៕