សម្ដេចតេជោ ហ៊ុន សែន ដាក់ចេញបទបញ្ជាយ៉ាងម៉ឺងម៉ាត់ ទប់ស្កាត់ការកាប់ព្រៃឈើ និងការទន្ទ្រានយកដីធ្លីរបស់រដ្ឋ
ភ្នំពេញ៖ តាមរយៈសារសំឡេងតាមតេឡេក្រាម នាយប់ថ្ងៃទី ០៥ ខែមិថុនា ឆ្នាំ២០២៣ ផ្ញើជូន ឯកឧត្ដមរដ្ឋមន្ត្រីក្រសួងបរិស្ថាន រដ្ឋមន្ត្រីក្រសួងកសិកម្មរុក្ខាប្រមាញ់ និង នេសាទ ឯកឧត្ដម លោកជំទាវ តាមស្ថាប័នពាក់ព័ន្ធ ជាពិសេសអាជ្ញាធរខេត្ត សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានដាក់ចេញនូវបទបញ្ជាម៉ឺងម៉ាត់ សម្រាប់ការទប់ស្កាត់ការកាប់ព្រៃឈើ និងការទន្ទ្រានយកដីធ្លីរបស់រដ្ឋ ខណៈដែលការបោះឆ្នោតជិតមកដល់នោះ។
នៅក្នុងសារសំឡេង សម្ដេចបានលើកឡើងថា តាមការសង្កេត និងទទួលបានព័ត៌មានជាបន្តបន្ទាប់ ក្នុងរយៈពេលកន្លងទៅ និងពេលនេះ ដោយសារគៀកជិតបោះឆ្នោត ពួកខិលខូចបានចាប់ផ្ដើមធ្វើសកម្មភាព កាប់ព្រៃឈើ និងការទន្ទ្រានកាន់កាប់យកដីធ្លីរបស់រដ្ឋ ដែលជាសម្បត្តិធនធានរបស់ជាតិ។
សម្ដេចបញ្ជាក់ថា “យើងតែងសង្កេតឃើញថា ជារៀងរាល់ពេលឱ្យតែមានការបោះឆ្នោត អំពើល្មើសច្បាប់ទាក់ទង នឹងការកាប់បំផ្លាញព្រៃឈើ និងការទន្ទ្រានយកដី គឺតែងតែកើតមាន។ ដូច្នេះ សម្ដេចបានរម្លឹកចំពោះក្រសួងដែលមានការពាក់ព័ន្ធ ជាពិសេសក្រសួងបរិស្ថាន ក្រសួងកសិកម្មរុក្ខាប្រមាញ់ និងនេសាទ ក៏ដូចជា អាជ្ញាធរដែនដីគ្រប់លំដាប់ថ្នាក់ ត្រូវបញ្ចេញកម្លាំងរារាំងគ្រប់លទ្ធភាពទាំងអស់ ដើម្បីបំផ្លាញចោលនូវពួកខិលខូច ដែលឆ្លៀតឱកាសនៅពេលវេលាដែលរាជរដ្ឋាភិបាលកំពុងជាប់រវល់ ទៅលើកិច្ចការទាក់ទងទៅនឹងការបោះឆ្នោត ហើយគេលួចទៅកាប់បំផ្លាញព្រៃឈើ”។
សម្ដេចតេជោថ្លែងបន្តថា បញ្ហាទាំងអស់នេះ គឺត្រូវពឹងផ្អែកទៅលើការខិតខំប្រឹងប្រែងរបស់ ឯកឧត្ដម លោកជំទាវ ដែលជាអភិបាលខេត្ត ដែលមានព្រៃឈើទាំងនោះ។ ដូច្នេះ សូមយកចិត្កទុកដាក់ធ្វើកិច្ចការងារនេះ ហើយ សម្ដេចក៏បានអំពាវនាវចំពោះប្រជាពលរដ្ឋទាំងឡាយ សូមមេត្តាគោរពច្បាប់ និងសូមកុំទៅទន្ទ្រានយកដីរបស់រដ្ឋ។
ជាងនេះទៀតសម្ដេច ក៏បានដាក់ចេញនូវបទបញ្ជាម៉ឺងម៉ាត់ ដើម្បីចាប់យកមេក្លោងទាំងឡាយដែលបំពានច្បាប់ទាំងនោះ យកមកផ្ដន្ទាទោសតាមច្បាប់ ហើយសម្ដេចតេជោថ្លែងសង្កត់ធ្ងន់ថា យើងមិនអាចលើកលែង ហើយយោគយល់ ដើម្បីគ្រាន់តែសន្លឹកឆ្នោតសម្រាប់មនុស្សប៉ុន្មាននាក់នោះទេ យើងត្រូវធ្វើកិច្ចការដើម្បីការពារនូវធនធានធម្មជាតិ ព្រៃឈើនិងដីធ្លីរបស់រដ្ឋ។ យើងមិនអាចយោគយល់រាល់សកម្មភាពទាំងឡាយណា ដែលល្មើសច្បាប់នៅក្នុងពេលវេលា ដែលរាជរដ្ឋាភិបាលកំពុងជាប់រវល់»។
សម្ដេចតេជោ ក៏សូមអំពាវនាវឱ្យអ្នកដែលមានប្រាក់កាស ឬអ្នកមានអំណាច ដែលឈរពីខាងក្រោយខ្នងនៃជនខិលខូច ឬប្រើប្រាស់ជនខិលខូចនេះ ដើម្បីទៅកាប់ទន្ទា្រនយកដី និងព្រៃឈើ ឱ្យដកខ្លួនចេញជាបន្ទាន់ បើសិនជាមានការស្រាវជ្រាវទៅឃើញថា មានការពាក់ព័ន្ធជាប់ជាមួយនិងមន្ត្រីណា ឬអ្នកមានប្រាក់កាសណាក៏ដោយ រាជរដ្ឋាភិបាល នឹងមិនអត់ឱន ហើយក៏មិនលើកលែងចំពោះសកម្មភាពនៅពីខាងក្រោយខ្នងនោះផងដែរ។
សម្ដេចតេជោប្រមុខរាជរដ្ឋាភិបាលបានគូសបញ្ជាក់បន្ថែមថា ទទួលបាននូវបទបញ្ជានេះ សូមឯកឧត្ដម លោកជំទាវ ចាត់វិធានការជាបន្ទាន់ បញ្ជូនកម្លាំងដើម្បីបង្ក្រាបនូវភាពអាណាធិបតេយ្យ ក្នុងការកាប់ទន្ទ្រានយកដីព្រៃ កាប់បំផ្លាញព្រៃឈើ ដើម្បីយកដីធ្លី។ ត្រូវធ្វើកិច្ចការងារនេះជាបន្ទាន់ ដោយមិនពន្យារពេល ហើយកិច្ចការងារនេះ ត្រូវធ្វើដូចភ្លៀងរលឹម មិនអាចឱ្យកើតឡើង និងងើបឡើងសារជាថ្មី ដើម្បីបំផ្លាញទៅដល់ព្រៃឈើ និងដីធ្លីរបស់រដ្ឋនោះឡើយ៕
