សម្តេចតេជោ៖ កម្ពុជា មិនយកអធិបតេយ្យខ្លួន ទៅដោះដូរជាមួយការផ្ដល់ជំនួយ ឬការអនុគ្រោះណាមួយនោះឡើយ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រី្ត នៃព្រះរាជណាចក្រកម្ពុជា បានមានប្រសាសន៍ថា ប្រទេសកម្ពុជា មិនយកអធិបតេយ្យរបស់ខ្លួន ទៅដោះដូរជាមួយការផ្ដល់ជំនួយ ឬការអនុគ្រោះណាមួយនោះឡើយ។

សម្តេចតេជោមានប្រសាសន៍បែបនេះក្នុងពិធីសំណេះសំណាលជាមួយបងប្អូនកម្មករនិយោជិត នៅរោងចក្រ Wing Star Shoe ស្ថិតក្នុងស្រុកគងពិសី ខេត្តកំពង់ស្ពឺ នាព្រឹកថ្ងៃទី៤ ខែមិថុនា ឆ្នាំ២០២៣។

សម្តេចតេជោ ហ៊ុន សែន បានមានប្រសាសន៍បន្តទៀតថា ប្រព័ន្ធអនុគ្រោះពន្ធ EBA គង់តែនឹងត្រូវបាត់បង់ នៅពេលដែលសេដ្ឋកិច្ចកម្ពុជាឈានដល់កម្រិតណាមួយ។ ទោះបីជាត្រូវបានដកប្រព័ន្ធអនុគ្រោះពន្ធ EBA ពីកម្ពុជា ក៏ប៉ុន្តែការនាំចេញនៅតែមានកំណើន។

សម្តេចតេជោ ហ៊ុន សែន បានបញ្ជាក់ថា ចិនបើកចំហទីផ្សារសម្រាប់ការស្វាគមន៍កម្ពុជា ក្នុងនោះបានទិញយកផលិតផលកសិកម្មកម្ពុជា១១មុខរួមមាន៖ ចេក, ស្វាយ, ស្វាយចន្ទី និងត្រីប្រាជាដើម។ ក្រៅពីនេះជប៉ុន កូរ៉េ និងបណ្ដាប្រទេសក្នុងតំបន់មួយចំនួនទៀត ក៏កំពុងបង្កើនការទិញផលិតផលកសិកម្មពីកម្ពុជាផងដែរ ៕