សម្តេចតេជោ ហ៊ុន សែន រំលឹកឲ្យនិស្សិតពេទ្យ ត្រូវរក្សាកិត្តិនាម «ទ័ពអាវស» តាមរយៈការពង្រឹងក្រមសីលធម៌វិជ្ជាជីវៈជាគ្រូពេទ្យ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានក្រើនរំលឹកក្រុមគ្រូពេទ្យទាំងអស់ទើបបញ្ចប់ការសិក្សា និងទទួលសញ្ញាបត្រ ត្រូវរក្សាកិត្តិនាម «ទ័ពអាវស» តាមរយៈការពង្រឹងក្រមសីលធម៌វិជ្ជាជីវៈជាគ្រូពេទ្យ និងត្រូវខិតខំសិក្សាបន្ថែមទៀត ដើម្បីឆ្លើយតបនឹងការវិវត្តន៍ថ្មីនៃជំងឺផ្សេងៗ។
ក្នុងឱកាសអញ្ជើញជាអធិបតីភាពប្រគល់សញ្ញាបត្រ ជូននិស្សិតពេទ្យចំនួន ១,៣៩៦នាក់ នាថ្ងៃទី១៨ ខែឧសភា ឆ្នាំ២០២៣នេះ សម្តេចតេជោ ហ៊ុន សែន បានក្រើនរំលឹកថា «អីឡូវខ្ញុំរំពឹងទុកថា និស្សិតដែលទទួលសញ្ញាបត្រនៅថ្ងៃនេះដែលនឹងក្លាយជាគ្រូពេទ្យ សូមរក្សាកិត្តិនាម កេរ្តិ៍ឈ្មោះជាកងទ័ពអាវស តទៅទៀតតាមរយៈនៃការពង្រឹងក្រមសីលធម៌ វិជ្ជាជីវៈឱ្យបានល្អ គ្មានវិធីណាល្អជាងហ្នឹងទេ»។
បន្ថែមពីនេះសម្តេចតេជោ ហ៊ុន សែន ក៏បានបង្ហាញក្តីសង្ឃឹមថា ក្រុមគ្រូពេទ្យរបស់កម្ពុជាគ្រប់រូបនឹងខិតខំពង្រឹងនូវក្រមសីលធម៌ វិជ្ជាជីវៈ ដើម្បីបម្រើឱ្យសេចក្តីត្រូវការរបស់ប្រជាជន។ បន្ថែមពីនេះនិស្សិតជយលាភីដែលទទួលសញ្ញាបត្រនៅថ្ងៃនេះត្រូវបន្តការខិតខំបន្តទៅទៀតលើការពង្រឹងជំនាញបច្ចេកទេស ពីព្រោះ១ថ្ងៃ ទៅ១ថ្ងៃ បច្ចេកទេសផ្នែកវេជ្ជសាស្ត្រចេះតែកើតឡើង ដែលទាមទារឱ្យក្រុមគ្រូពេទ្យទាំងអស់ សិក្សាឱ្យទាន់សភាពការណ៍នៃជំងឺដែលចេះតែវិវត្តន៍ថ្មីជាលំដាប់។
សម្តេចតេជោ ហ៊ុន សែន ក៏បានក្តីសប្បាយរីករាយជាមួយនឹងការភាពរីកចម្រើនផ្នែកវិស័យសុខាភិបាលនៅកម្ពុជា និងអបអរសាទរ ចំពោះនិស្សិតជយលាភីដែលទទួលសញ្ញាបត្រគ្រប់កម្រិតទាំងអស់ដែលមានជំនាញលើផ្នែកសុខាភិបាល។
ជាមួយគ្នានេះដែរ សម្តេចតេជោ ហ៊ុន សែន បានថ្លែងអំណរគុណគ្រូពេទ្យទទួលសញ្ញាបត្រនៅថ្ងៃនេះ បានស្ម័គ្រចិត្តចូលរួមធ្វើសកម្មភាពប្រយុទ្ធប្រឆាំងនឹងជំងឺកូវីដ១៩ កាលពីពេលកន្លងទៅ។ កម្ពុជា ជាប្រទេសមួយដែលមិត្តភក្តិបរទេសបានបញ្ជូនមនុស្សមកដកពិសោធន៍។ មិនត្រឹមតែវិស័យសុខាភិបាលនោះទេ គឺមានវិស័យជាច្រើនទៀត៕
