សិក្ខាកាមមួកខៀវកម្ពុជា ២៨នាក់បញ្ចប់ហ្វឹកហ្វឺនប្រើប្រាស់ស្ពានដែកចល័ត ត្រៀមបញ្ជូនទៅចូលរួមបេសកកម្ម UN នៅអាហ្វ្រិកកណ្តាល

ភ្នំពេញ៖ នៅថ្ងៃទី១១ ខែឧសភា ឆ្នាំ២០២៣ នៅវិទ្យាស្ថានហ្វឹកហ្វឺនកងកម្លាំងរក្សាសន្តិភាព នាស្រុកឧដុង្គ ខេត្តកំពង់ស្ពឺ ឯកឧត្តម ឧត្តមសេនីយ៍ឯក តាំង សំប៊ន អគ្គនាយករងមជ្ឈមណ្ឌលជាតិរក្សាសន្តិភាព និងជានាយកវិទ្យាស្ថានហ្វឹកហ្វឺនកងកម្លាំងរក្សាសន្តិភាព តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី១គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព ជាអធិបតី ក្នុងពិធីបិទវគ្គហ្វឹកហ្វឺនជំនាញបច្ចេកទេសប្រើប្រាស់ស្ពានដែកចល័តស្វ័យប្រវត្តិTMM ដែលមានសិក្ខាកាមទ័ពមួកខៀវចំនួន២៨នាក់ ធ្វើការហ្វឹកហ្វឺនរយៈពេល១ខែ ទទួលបានជោគជ័យ។

ឯកឧត្តម ឧត្តមសេនីយ៍ឯក ថ្លែងថា បំណងនៃការហ្វឹកហ្វឺនប្រើប្រាស់ស្ពានចល័តនេះ បន្ទាប់ពីមានការស្នើសុំរបស់អង្គការសហប្រជាជាតិ ឱ្យខាងកម្ពុជា ត្រូវបញ្ជូនស្ពានដែកប្រភេទនេះ ទៅក្នុងតំបន់បេសកកម្មអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល ដោយសារ ស្ថានភាពភូមិសាស្ត្រ ជាពិសេសផ្លូវក្នុងតំបន់មានការលំបាកសម្រាប់រថយន្តធ្វើដំណើរឆ្លងកាត់។

ស្ថានភាពផ្លូវមានអូរ ប្រឡាយ មិនអាចរថយន្តធុនតូចធំឆ្លងកាត់បាន ដូច្នេះហើយស្ពានចល័តប្រភេទTMMនេះ នឹងជួយសម្រួលសម្រាប់រថយន្តឆ្លងកាត់បាន ហើយធ្វើការបម្លាស់ទីបានគ្រប់ស្ថានភាពផ្លូវគោកដែលមានអូរ ឬប្រឡាយកាត់ផ្លូវ។

ស្ពានចល័តដឹកដោយរថយន្ត សម្រាប់១រថយន្តមានប្រវែង១០,៥០ ម៉ែត្រមានទទឹងប្រវែង៣,៨០ ម៉ែត្រ ទ្រទម្ងន់បានរហូតដល់២០តោន។ បច្ចុប្បន្នមជ្ឈមណ្ឌលជាតិមានស្ពានដែកចល័តចំនួន៤គ្រឿង មានបប្រវែងសរុបចំនួន៤០ម៉ែត្រ អាចទ្រទម្ងន់អតិបរមា៦០តោន៕