ស្នងការខេត្តស្វាយរៀង៖ ក្នុងរយៈពេល ៥ឆ្នាំនេះ ការងារប្រឆាំងបទល្មើសគ្រឿងញៀន សមត្ថកិច្ច បានធ្វើការបង្ក្រាបចំនួន ៥៨៨លើក និងឃាត់ខ្លួនមនុស្សសរុបចំនួន ១,៣៧៨នាក់ ក្នុងនោះស្រីចំនួន ៧៤នាក់

ភ្នំពេញ៖ លោកឧត្តមសេនីយ៍ទោ ពេជ្រ វីរៈ ស្នងការដ្ឋាននគរបាលខេត្តស្វាយរៀង បានមានប្រសាសន៍ថា ក្នុងរយៈពេល ៥ឆ្នាំនេះ ការងារប្រឆាំងបទល្មើសគ្រឿងញៀន សមត្ថកិច្ច បានធ្វើការបង្ក្រាបចំនួន ៥៨៨លើក និងឃាត់ខ្លួនមនុស្សសរុបចំនួន ១,៣៧៨នាក់ ក្នុងនោះស្រីចំនួន ៧៤នាក់ ដកហូតវត្ថុតាងរួមមាន៖ ម្សៅក្រាមពណ៌សថ្លា ប្រភេទមេតំហ្វេតាមីនទម្ងន់ ១.២៦៦,៥៨តោន(គិតទាំងសំបកវេចខ្ចប់), ថ្នាំគ្រាប់អក្សរ D ទម្ងន់ ៦,៧៦ក្រាម, ថ្នាំគ្រាប់ WY ទម្ងន់ ០,៤៧ក្រាម, ថ្នាំដប Dr.Padesa ១៥ដប, ថ្នាំParis ១កញ្ចប់, ហេរ៉ូអីនទម្ងន់ ១៨.៦៩៤,៨៦ក្រាម(គិតទាំងសំបក់វេចខ្ចប់), ថ្នាំគ្រាប់ពណ៌ផ្ទៃមេឃទម្ងន់ ១០៤,៩ក្រាម, ថ្នាំគ្រាប់ពណ៌ទឹកក្រូចទម្ងន់ ១០គ្រាប់, កញ្ឆាចំនួន ៥កញ្ចប់, ម្សៅ K ចំនួន ១កញ្ចប់, អិចស្ត្រាសុីពណ៌ផ្កាឈូកទម្ងន់ ៤៣.៦៤៧,២២ក្រាម(គិតទាំសំបក់វេចខ្ចប់), កាំភ្លើងចំនួន ៤ដើម, រុក្ខជាតិសារធាតុផ្សំចំនួន ១១មុខ និង ៧ដប រថយន្តចំនួន ១៨គ្រឿង, ម៉ូតូចំនួន ៣៨០គ្រឿង, ទូរស័ព្ទដៃចំនួន ១.២០៦គ្រឿង និងថវិកាមួយចំនួន។

លោកឧត្តមសេនីយ៍ទោ ពេជ្រ វីរៈ មានប្រសាសន៍បែបនេះក្នុងឱកាសអញ្ជើញចូលរួមសន្និសីទសារព័ត៌មានស្ដីពី “ភាពជោគជ័យក្នុងរយៈពេល៥ឆ្នាំកន្លងមក របស់រដ្ឋបាលខេត្តស្វាយរៀង” នៅទីស្ដីការគណៈរដ្ឋមន្រី្ត នាព្រឹកថ្ងៃទី២៧ ខែមេសា ឆ្នាំ២០២៣។

លោកឧត្តមសេនីយ៍ទោ ស្នងការខេត្ត បានបន្តថាការអនុវត្តតាមកម្មវិធីនយោបាយ និងយុទ្ធសាស្ត្រចតុកោណ របស់រាជរដ្ឋាភិបាល ផែនការយុទ្ធសាស្ត្រអភិវឌ្ឍន៍ជាតិ ២០ឆ៩-២០២៣ និងផ្អែកលើផែនការអភិវឌ្ឍខេត្តរយៈពេល ៥ឆ្នាំ (២០១៩-២០២៣) និងកម្មវិធីវិនិយោគបីឆ្នាំរំកិលខេត្ត (២០២០-២០២២) រដ្ឋបាលខេត្តស្វាយរៀងក្រោមការដឹកនាំរបស់ក្រុមប្រឹក្សាខេត្ត ជាពិសេស ឯកឧត្តមអភិបាលខេត្ត បានខិតខំធ្វើការអភិវឌ្ឍខេត្ត ក៏ដូចជាការអភិវឌ្ឍមូលដ្ឋាន ឱ្យមានការរីកចម្រើនលើគ្រប់វិស័យ ដោយបានកំណត់តំបន់សក្ដានុពលរបស់ខេត្តជា ៣តំបន់រួមមាន៖ តំបន់ផលិតកម្មកសិកម្ម, តំបន់កសិ-ឧស្សាហកម្ម និងតំបន់ឧស្សហកម្ម ៕