ក្រុមការងារក្រសួងយុត្តិធម៍ ចុះទៅសិក្សាស្រាវជ្រារកការពិតលើករណីសំណុំរឿងមួយ នៅខេត្តបាត់ដំបង

ភ្នំពេញ៖ ដោយមានការចាត់តាំងដ៏ខ្ពង់ខ្ពស់ពី ឯកឧត្តម រដ្ឋមន្ត្រីក្រសួងយុត្តិធម៌ ក្រុមការងារ នៃក្រសួងយុតិ្តធម៌ ដឹកនាំដោយឯកឧត្តម អ៊ូ រ៉ាស៊ី រដ្ឋលេខាធិការ រួមនិង ឯកឧត្តម ទឹម ស៊ីផា អនុរដ្ឋលេខាធិការ និងឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងជាអគ្គនាយកកិច្ចការរដ្ឋប្បវេណី ព្រមទាំងមន្ត្រីជំនាញ នាព្រឹកថ្ងៃចន្ទ ៥រោច ខែចេត្រ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី១០ ខែមេសា ឆ្នាំ២០២៣ បានចុះទៅធ្វើការស្រាវជ្រាវ និងដោះស្រាយករណីសំណុំរឿងរបស់លោកយាយ ប៉ិច ប៊ុន នៅខេត្តបាត់ដំបង។

ក្នុងការចុះបំពេញការងារនេះ ក្រុមការងារ ក្រសួងយុត្តិធម៍ បានចុះពិនិត្យ សិក្សា និងស្រាវជ្រាវលើឯកសារសំណុំរឿង និងបានសាកសួរភាគីពាក់ព័ន្ធ ព្រមទាំងបានចុះទៅដល់ទីតាំងដីជាក់ស្តែងផងដែរ ដើម្បីស្វែងរកឱ្យឃើញការពិតនៅក្នុងសំណុំរឿង និងធ្វើរបាយការណ៍គោរពជូនថ្នាក់ដឹកនាំពិនិត្យ និងសម្រេច។

ជាមួយគ្នានេះ ដោយមានការយកចិត្តទុកដាក់ខ្ពស់ ពីសំណាក់ឯកឧត្តមរដ្ឋមន្ត្រី និងមានកិច្ចសហការចូលរួមពីរដ្ឋបាលខេត្តបាត់ដំបង ព្រមទាំងក្រុមការងារចុះជួយឃុំអូចារ, ក្រុមការងារក្រសួងយុត្តិធម៍, អាជ្ញាធរមូលដ្ឋាន និងសាលាដំបូង និងអយ្យការអមសាលាដំបូងខេត្តបាត់ដំបង បាននាំយកអំណោយមនុស្សធម៍រួមមាន៖ ថវិកា ស្បៀងអាហារ និងគ្រឿងឧបភោគបរិភោគជូនដល់គ្រួសារលោកយាយ ប៉ិច ប៊ុន ផងដែរ។

សូមបញ្ជាក់ផងដែរថា តាមរយៈបណ្តាញសារព័ត៌មានមួយដែលបានចុះផ្សាយកាលពីថ្ងៃទី០៥ ខែមេសា ឆ្នាំ២០២៣នេះ លោកយាយ ប៉ិច ប៊ុន អាយុជាង ៨០ ឆ្នាំ រស់នៅភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង បានគោរពស្នើសុំ សម្តេចតេជោនាយករដ្ឋមន្ត្រី និងឯកឧត្តម កើត រិទ្ធ រដ្ឋមន្ត្រីក្រសួងយុតិ្តធម៌ មេត្តាជួយអន្តរាគមន៍រកយុតិ្តធម៌នៅក្នុងករណីសំណុំរឿងទាក់ទងនឹងការខ្ចីប្រាក់ តាំងពីឆ្នាំ២០០៨ ៕