ភ្នំពេញ៖ កាកបាទក្រហមកម្ពុជា នៃទីស្នាក់ការកណ្តាល សហការជាមួយសាខាកាកបាទក្រហមកម្ពុជា ខេត្តប៉ៃលិន ដោយមានការឧបត្ថម្ភគាំទ្រថវិកាដោយសហគមន៍អឺរ៉ុប (DG-ECHO) តាមរយៈសហព័ន្ធអន្តរជាតិ (IFRC) នៅថ្ងៃទី៧ ខែមេសា ឆ្នាំ២០២៣ បានរៀបចំយុទ្ធនាការអបអរសាទរទិវាសុខភាពពិភពលោក ៧ មេសា ២០២៣ ក្រោមប្រធានបទ «សុខភាពសម្រាប់យើងទាំងអស់គ្នា៖ ពង្រឹងការថែទាំសុខភាពបឋម ដើម្បីបង្កើនប្រព័ន្ធភាពធន់»។
ពិធីនេះ ក្រោមអធិបតីភាពលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងលោក សៅ សារ៉ាត់ អនុប្រធានគណៈកម្មាធិការសាខាកាកបាទក្រហមកម្ពុជា ខេត្តប៉ៃលិន ព្រមទាំងមានការនិមន្ត/អញ្ជើញចូលរួមពីព្រះសង្ឃ មន្ត្រីពាក់ព័ន្ធ យុវជន និងអ្នកស្ម័គ្រចិត្តកាកបាទក្រហមកម្ពុជា ប្រជាជនសហគមន៍ លោកគ្រូអ្នកគ្រូ និងសិស្សានុសិស្សសរុបប្រមាណ ១០០នាក់ ដែលពិធីនេះប្រព្រឹត្តទៅនៅបរិវេណវត្តសាលាក្រៅ ស្រុកសាលាក្រៅ ខេត្តប៉ៃលិន។
លោកជំទាវអគ្គលេខាធិការរងទី១ បានពាំនាំប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងបានគូសបញ្ជាក់ពីការគិតគូររបស់រាជរដ្ឋាភិបាលក្នុងសម័យសន្តិភាពនេះ ចំពោះប្រជាពលរដ្ឋនោះគឺ ការយកចិត្តទុកដាក់ផ្តោតជាសំខាន់លើវិស័យសុខាភិបាល និងវិស័យអប់រំ។ ចំពោះការគិតគូរលើវិស័យសុខាភិបាលនេះ គឺរាជរដ្ឋាភិបាលបានយកចិត្តទុកដាក់បង្កើតឱ្យមានមន្ទីរពេទ្យបង្អែក ឬមណ្ឌលសុខភាពគ្រប់លំដាប់ថ្នាក់ ចាប់តាំងពីថ្នាក់ខេត្ត ស្រុក ឃុំ រហូតដល់ប៉ុស្តិ៍សុខភាពនៅតាមភូមិនីមួយៗដើម្បីបម្រើសេវាសុខភាពជូនដល់បងប្អូនប្រជាពលរដ្ឋយើង។
លោកជំទាវបានអំពាវនាវដល់ប្រជាពលរដ្ឋទាំងអស់ឱ្យយកចិត្តទុកដាក់លើកកម្ពស់ការយល់ដឹងជាចម្បងដើម្បីថែទាំសុខភាពផ្ទាល់ខ្លួនឱ្យបានល្អ តាមរយៈការត្រួតពិនិត្យសុខភាពជាប្រចាំ ការរស់នៅមានអនាម័យ ពិសាទឹកដាំឆ្អិន ហាត់ប្រាណឱ្យបានទៀងទាត់ បរិភោគអាហារូបត្ថម្ភឱ្យបានត្រឹមត្រូវ កុំបរិភោគប្រៃពេក ផ្អែមពេក ខ្លាញ់ពេកជាដើម។ល។
លោកជំទាវបានគូសបញ្ជាក់ថា ក្នុងពេលបច្ចុប្បន្ននេះ អត្រាមរណៈរបស់ប្រជាជនកម្ពុជាយើង គឺមាន ២ភាគ៣ បានស្លាប់ដោយសារជំងឺមិនឆ្លង ដែលក្នុងនោះមានដូចជា ជំងឺតំណពូជ ជំងឺទឹកនោមផ្អែម ជំងឺទឹកនោមប្រៃ ជំងឺបេះដូង ជំងឺលើសសម្ពាធឈាម និងលើសជាតិខ្លាញ់ជាដើម ដែលជំងឺទាំងនេះកើតឡើងដោយសារការបរិភោគចំណីអាហារប្រចាំថ្ងៃ។
ជាមួយគ្នានេះ លោកជំទាវបានមានប្រសាសន៍ថា ការប្រែប្រួលអាកាសធាតុ ក៏ជាវិបត្តិមួយដ៏ធ្ងន់ធ្ងរសម្រាប់ពិភពលោកទាំងមូល ដែលបង្កឱ្យមានផលប៉ះពាល់លើកត្តាជីវភាពរស់នៅរបស់ប្រជាពលរដ្ឋ និងប៉ះពាល់ដល់កត្តាសុខភាពផងដែរ ហេតុដូចនេះសូមបងប្អូនប្រជាពលរដ្ឋបង្កើនការយល់ដឹងពីបញ្ហានេះ។ ទន្ទឹមនឹងនេះ លោកជំទាវ ក៏បានក្រើនរំលឹកផងដែរថា «សុខភាពសម្រាប់យើងម្នាក់ៗ សម្រាប់យើងទាំងអស់គ្នា ដោយយើងម្នាក់ៗ»។
គួររំលឹកថា កាលពីឆ្នាំ១៩៤៨ ប្រទេសនានានៅលើពិភពលោកបានរួមគ្នាបង្កើតអង្គការសុខភាពពិភពលោក ដើម្បីលើកកម្ពស់សុខភាព រក្សាពិភពលោកឱ្យមានសុវត្ថិភាព និងបម្រើជនងាយរងគ្រោះ ដូច្នេះមនុស្សគ្រប់រូប គ្រប់ទីកន្លែងអាចទទួលបានសុខុមាលភាព និងសុខភាពល្អបំផុត។ ការប្រារព្ធទិវាសុខភាពពិភពលោកថ្ងៃទី ៧ ខែមេសា ធ្វើឡើងជារៀងរាល់ឆ្នាំ។ ទិវានេះគឺបានផ្តួចផ្តើមឡើងក្នុងសន្និបាតសុខភាពលើកទី១នៅឆ្នាំ ១៩៤៨ និងដាក់ចូលជាធរមានក្នុងឆ្នាំ១៩៥០។
ឆ្នាំ២០២៣ នេះគឺជាខួបលើកទី ៧៥ របស់អង្គការសុខភាពពិភពលោក គឺជាឱកាសមួយដើម្បីពិនិត្យមើលឡើងវិញនូវភាពជោគជ័យផ្នែកសុខភាពសាធារណៈដែលបានធ្វើឱ្យប្រសើរឡើងនូវគុណភាពជីវិតក្នុងអំឡុងពេលប្រាំពីរទសវត្សរ៍ចុងក្រោយនេះ៕
