ភ្នំពេញ៖ដូនតាខ្មែរយើងបានបន្សល់នូវក្បាច់គុនដ៏ល្អឯកសម្រាប់កូនចៅជំនាន់ក្រោយ ដែលក្បាច់គុនទាំងនោះបានបន្សល់ទុកនៅលើសិលាចារិកនៅតាមប្រាសាទអង្គរវត្ត និងប្រាសាទបុរាណផ្សេងៗ។ ជាមួយនឹងមោទនភាពជាតិមួយនេះ អ្នកស្នេហាវិស័យប្រដាល់គុនខ្មែរបានលើកទឹកចិត្តឱ្យយុវជនបន្តចូលរួមមរតកដូនតាមួយនេះឱ្យបានគង់វង្សថែមទៀត។
ឯកឧត្តមទេព វិរ:ទីប្រឹក្សាសម្តេចក្រឡាហោម ស ខេងឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជានាយកសាលាគុនកម្ពុមហាវេទបានមានប្រសាសន៍ថា លោកបានសម្រេចបង្កើតសាលាគុនកម្ពុមហាវេទឡើងដោយចំណាយថវិកាផ្ទាល់ខ្លួន ដែលគិតមកដល់ពេលនេះមានរយៈពេលជាង២ឆ្នាំហើយ ។ ការបង្កើតសាលាគុនកម្ពុមហាវេទនេះឡើង ដើម្បីជំរុញការថែរក្សាសម្បត្តិវប្បធម៌ខ្មែរ ការថែរក្សាសុខភាព និងបង្កើតជំនាញដល់យុវជនជាដើម។
សំឡេង៖ «ជាការចូលរួមចំណែកអភិវឌ្ឍន៍ថែរក្សាកីឡាក្បាច់គុនបុរាណខ្មែរ លើកកម្ពស់សុខភាពប្រជាជនខ្មែរ តាមរយៈការហាត់កីឡា និងបញ្ចូលជំនាញដល់កីឡាករកីឡារិនី ឱ្យចេះបន្ថែមលើជំនាញការងារសិប្បកម្មដូចជាចម្លាក់ រូបជាដើម»។
ឯកឧត្តមបញ្ជាក់ថា សាលាបង្ហាត់ក្បាច់គុនេះ បង្រៀនសិស្សដោយមិនគិតថ្លៃ និងបានផ្តល់កន្លែងស្នាក់នៅអាហារបីពេលថែមទៀត ធ្វើយ៉ាងណាឱ្យពួកគាត់មានលទ្ធភាពបានរៀនហ្វឹកហាត់បានល្អ និងខ្លាំងពូកែដោយចង់ឱ្យមានអ្នកបន្តវេនលើស័យប្រដាល់គុនខ្មែរនេះ កាន់តែច្រើន។
ស្រដៀងគ្នានេះដែរ លោក ជួប សំណាង មន្ត្រីអាជ្ញាកណ្ដាលបច្ចេកទេស នៃសហព័ន្ធប្រដាល់គុនខ្មែរ និងជាគ្រូបង្វឹកនៅសាលាគុនកម្ពុមហាវេទបានឱ្យដឹងថា ការហាត់ក្បាច់គុនបុរាណខ្មែរ នឹងធ្វើឱ្យយើងមានសុខភាពល្អ ហើយបានចូលរួមចំណែកថែរក្សាសម្បត្តិវប្បធម៌ខ្មែរយើងឱ្យបានគង់វង្ស៖
សំឡេង៖ « ការហាត់កីឡាក្បាច់គុនខ្មែរ ជាការចូលរួមលើកកម្ពស់វប្បធម៌គុនខ្មែរយើង និងសូមឱ្យអាណាព្យាបាលជំរុញកូនឱ្យលេងកីឡាក្នុងមួយនាក់កីឡាមួយប្រភេទ បើលេងកីឡាបានទាំងសុខភាព បានប្រាជ្ញា ជំរុញឱ្យមានសាមគ្គីភាព ។ ការចូលរៀនសាលាហាត់ក្បាច់គុននេះ ខាងក្លឹប ក៏បានបង្រៀនទាំងក្បាច់គុន គុណធម៌ សុជីវធម៌ និងសីលធម៌ក្នុងការរស់នៅផងដែរ» ។
ជាមួយនឹងមោទនភាពជាតិលើវិស័យគុនខ្មែរនេះ លោក ជួប សំណាង បានបង្ហាញការពេញចិត្តចំពោះសន្ទុះ នៃការគាំទ្រពីមហាជនទាំងក្នុងនិងក្រៅប្រទេស ហើយលោកជឿជាក់ថា វិស័យគុនខ្មែរនឹងមានការរីកចម្រើនថែមទៀត។
សំឡេង៖ « ខ្ញុំឃើញសន្ទុះនៃការគាំទ្ររបស់ប្រជាពលរដ្ឋលើវិស័យគុនខ្មែរទាំងនៅក្នុងប្រទេស និងក្រៅប្រទេសសឹងតែជ៩៩ភាគរយជាម្ចាស់ក្បាច់គុនខ្មែរតាំងពីបុរាណមក ។ ខ្ញុំសូមអរគុណចំពោះអ្នកគាំទ្រទាំងអស់ ហើយសូមជំរុញឱ្យកូនៗចូលរួមហាត់ក្បាច់គុនខ្មែរនេះ ព្រោះកីឡាធ្វើឱ្យយើងចាកឆ្ងាយពីគ្រឿងញៀន ចេះក្បាច់គុនខ្មែរគេឱ្យតម្លៃយើង »។
ជាគ្រូបង្វឹកក្បាច់គុនខ្មែរមួយរូបទៀត លោក សែត បូកើត ក៏បានឱ្យដឹងដែរ ការហាត់ក្បាច់គុនបុរាណខ្មែរនេះ បានជំរុញឱ្យអ្នកហាត់ទាំងអស់មានភាពអត់ធ្មត់ខ្ពស់ សម្បទារឹងមាំ រហ័ស កម្លាំងខ្លាំង និងមានឆន្ទៈ ៖
សំឡេង៖ « ដើម្បីក្លាយជាអ្នកខ្លាំងលើវិស័យក្បាច់គុនបុរាណខ្មែរយើងមានចំនួន៦ចំណុច ទីមួយ កាយសម្បទារឹងមាំ ទីពីរ ភាពអត់ធ្មត់ ទីបីមានចលនារហ័សហួន ទីបួនការប្រើកម្លាំងឱ្យខ្លាំង ទីប្រាំបច្ចេកទេស និងទីប្រាំមួយគឺឆន្ទៈ ។ ក្នុងចំណោមទាំងប្រាំមួយនេះ បើអតផ្នែកណាមួយគឺយើងមិនអាចខ្លាំងក្នុងវិស័យគុនខ្មែរបានឡើយ។ »
ផ្តើមចេញពីមានឱពុកជាអ្នកប្រដល់ក្បាច់បុរាណខ្មែរម្នាក់ កុមារីផានិត ស្រីលីន បានស្ម័គ្រចិត្តចូលហាត់ក្បាច់គុនបុរាណខ្មែរ និងបានឡើងប្រកួតក្នុងកម្មវិធីប្រដាល់បុរាណខ្មែរកម្រិតថ្នាលមួយចំនួនផងនោះ បានឱ្យដឹងថា គោលបំណង នៃការចូលហាត់ក្បាច់គុនបុរាណខ្មែរនេះ គឺរួបនាងចង់ចេះពីបច្ចេកទេស របស់ក្បាច់គុនខ្មែរ ហើយចង់ធ្វើជាអ្នកបន្តវេនពីចាស់ៗនិងរាមច្បងលើវិស័យនេះ។
សំឡេង៖ « តាំងពីតួចមកខ្ញុំឃើញប៉ា និងពូជាអ្នកប្រដាល់ ហើយគាត់ក៏មានក្លឹបប្រដាល់ដែរ ខ្ញុំស្រលាញ់ខាងហ្នឹង ខ្ញុំចូលហាត់តែម្ដង ទោះមិនខ្លាំងមិនល្បី ក៏ខ្ញុំនៅតែប្រឹងទៅមុខជានិច្ច ខ្ញុំនឹងតស៊ូ ដើម្បីថែរក្សាមរតកដូនតាមួយនេះ ។ ពេលហាត់ខ្ញុំមានសុខភាពល្អ កីឡានេះ ធ្វើឱ្យយើងល្បីថែមទៀតបើយើងខ្លាំង»។
ការចូលរួមថែរក្សាសម្បត្តិវប្បធម៌ខ្មែរគឺជាភារកិច្ចរបស់កូនខ្មែរគ្រប់រូប មិនមានអ្នកណាស្រលាញ់ខ្មែរជាងខ្មែរនោះទេ។ យ៉ាងណាមិញវិស័យគុនខ្មែរនេះទៀតសោត ប្រជាពលរដ្ឋគ្រប់រូបគប្បីគាំទ្រទាំងស្មារតី សម្ភារៈ ថវិកា ពេលវេលា តាមរយៈការជួយជំរុញកូនចៅឱ្យចូលរួមហាត់ឱ្យបានគ្រប់ៗគ្នា ទោះបីមិនអាចយកជាអាជីពក្តី ក៏បានបង្ហាញពីការគាំទ្រ ធ្វើឱ្យ ផ្នែកក្បាច់គុនខ្មែររីកចម្រើនជាពិសេសដើម្បីសុខភាពតែម្តង។
ជាការពិតណាស់ បច្ចុប្បន្នមព វិស័យកីឡាទាំងអស់ត្រូវបានរាជរដ្ឋាភិបាលកម្ពុជាយកចិត្តទុកដាក់លើកកម្ពស់យ៉ាងខ្លាំងជាពិសេសកីឡាក្បាច់គុនខ្មែរ ដោយនៅក្នុងព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះខាងមុខនេះ ក៏មានដាក់បញ្ចូលនូវវិញ្ញាសាគុនខ្មែរនេះផងដែរ៕
