ប្លែកៗ! បុរសម្នាក់ស្រវឹងស្រា ជិះម៉ូតូកិនដុំថ្មក្រឡាច់ ដួលសន្លប់ខ្លួនឯង បែរប្រឌិតរឿងថា មានក្មេងស្ទាវគប់ដុំថ្ម តាមដងផ្លូវមង្គលបូរី

ភ្នំពេញ៖ កន្លងទៅថ្មីៗនេះ មានគណនីហ្វេសប៊ុកមួយឈ្មោះVorng Blach បានបង្ហោះថា៖កាលពីថ្ងៃទី១៦ ខែមីនា ឆ្នាំ២០២៣ វេលាម៉ោង០៧និង២០នាទីយប់ មាន (ករណីក្មេងស្ទាវគប់ដុំថ្មតាមដងផ្លូវមង្គលបូរី ភូមិស្ទឹងចាស់ផ្លូវទៅភូមិស្រមោច សូមប្រុងប្រយ័ត្ន)។

ក្រោយទទួលបានពត៌មាននេះ កម្លាំងជំនាញផែនព្រហ្មទ័ណ្ឌ នៃស្នងការដ្ឋាននគរបាលខេត្តបន្ទាយមានជ័យ បានសហការជាមួយកម្លាំងអធិការដ្ឋាននគរបាលស្រុកមង្គលបូរី ទទួលបានបទបញ្ជាពីលោក៉ត្តមសេនីយ៍ទោ សិទ្ធិ ឡោះ ស្នងការនរបាលខេត្តបន្ទាយមានជ័យ បានបើកការស៊ើបអង្គេត និងស្រាវជ្រាវតាមវិធានការជំនាញលើករណីនេះដោយយកចិត្តទុកដាក់។

ជាមួយគ្នានោះ ក៏មានពលរដ្ឋរងគ្រោះឈ្មោះ ឈុន គិមឈយ ភេទ ប្រុស អាយុ៥៣ ឆ្នាំនៅភូមិ ស្ទឹងចាស់ ឃុំ គយម៉ែង ស្រុកមង្គលបូរី ខេត្ត បន្ទាយមានជ័យ បានមកបំភ្លឺថា៖ កាលពីរថ្ងៃទី១៦ ខែ មីនា ឆ្នាំ២០២៣ វេលាម៉ោង ០៧និង២០នាទីយប់ ខ្លួនជាជនរងគ្រោះត្រូវបានគេបង្ហោះហ្វេសបុកថា “ត្រូវបានក្មេងស្ទាវគប់ដុំថ្មត្រូវស្មាបណ្តាលអោយដួលសម្លប់យកមកព្យាបាលនៅមន្ទីរពេទ្យបង្អែកមិត្តភាព កម្ពុជា-ជប៉ុនស្រុកមង្គលបូរីគឺជារឿងមិនពិតទេ។

តាមពិតគាត់មកពីបុណ្យសពហើយស្រវឹងស្រាស្រឿងៗហើយត្រឡប់ទៅផ្ទះវិញដោយបន្ទាន់ទៅទិញផ្លែត្រសក់នៅភូមិអង្ករខ្មៅ ឃុំគយម៉ែង(ផ្លូវទៅភូមិស្រមោច)ក៏ជិះម៉ូតូបានប្រហែល៤០០ម៉ែត្រ ខាងកើតផ្ទះក៏ជាន់ដុំថ្មក្រឡាច់ដួលបណ្តាលអោយគាត់សន្លប់តែម្តង។

អធិការដ្ឋាននគរបាលស្រុកមង្គលបូរី បានបំភ្លឺថា ឆ្លងតាមកាស៊ើបអង្គេត ពិនិត្យកន្លែងកើតហេតុ ស្រាវជ្រាវ ស្តាប់ការបំភ្លឺសាក្សី ដោយយកចិត្តទុកដាក់បំផុតរបស់នគរបាលជំនាញ ករណីនេះគឺ(មិនមែនជាការពិតនោះទេ )គឺពុំមានក្មេងស្ទាវគប់ដុំថ្មចំដើមទ្រូងដូចតាមការបង្ហោះ ហ្វេសបុក នោះទេគឺគាត់ដួលម៉ូតូដោយខ្លួនឯង ។

ការបង្ហោះរបស់ហ្វេសបុកឈ្មោះVorng Blach ដែលមិនទាន់ដឹងការពិតពុំទាន់មានមូលដ្ឋានច្បាស់លាស់ផ្សាយខុសគឺជាការបំភ្លៃសក្ខីកម្ម បង្ហោះសារមិនពិត និងមានការនិយាយខ្វះមូលដ្ឋានស្រាវជ្រាវច្បាស់លាស់ពិតប្រាកដ អាចពាក់ព័ន្ធទៅក្នុងផ្លូវច្បាប់ធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សង្គមនៅក្នុងមូលដ្ឋានធ្វើឲ្យប៉ះពាល់ដល់ដំណើរការស៊ើបអង្កេតនិងការប្រឹងប្រែងរបស់នគរបាល។

អាស្រ័យហេតុនេះ សូមសាធារណជនមេត្តាជ្រាប និងកុំមានភាន់ច្រឡំ។ ចំពោះម្ចាស់ហ្វេសប៊ុកខាងលើ ដែលបង្ហោះពត៌មានខុសពីការពិតត្រូវកែតម្រូវជាបន្ទាន់ ក្នុងករណីបន្តបង្ហោះបំភ្លៃការពិតទៀត ថ្នាក់ដឹកនាំនៃស្នងការដ្ឋាននគរបាលខេត្តបន្ទាយមានជ័យ នឹងចាត់វិធានការតាមផ្លូវច្បាប់៕