អគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ បើកកិច្ចប្រជុំ ត្រៀមចូលរួមព្រឹត្តិការណ៍កីឡាស៊ីហ្គេម និងការរៀបចំពិធីអបអរសាទរសង្ក្រាន្តឆ្នាំថ្មី ២០២៣

ភ្នំពេញ៖ នាព្រឹកថ្ងៃទី០៤ ខែមេសា ឆ្នាំ២០២៣ អគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ បានបើកកិច្ចប្រជុំស្តីពីការរៀបចំតារាងបច្ចុប្បន្នភាព ប្រតិភូ ប្រតិភូរង គ្រូបង្វឹក អាជ្ញាកណ្តាល ចៅក្រម និងកីឡាករ កីឡាការិនីរបស់សមាគមកីឡាទាំង៣៤ប្រភេទ ដើម្បីចូលរួមប្រកួតប្រជែង ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។ កិច្ចប្រជុំនេះ រៀបចំឡើងក្រោមអធិបតីភាព ឯកឧត្តម ឧត្តមសេនីយ៍ឯក យិត ភីរ: អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ។

ជាកិច្ចចាប់ផ្តើម ឯកឧត្តម អគ្គលេខាធិការ បានពាំនាំនូវអនុសាសន៍ណែនាំដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសដែលសម្តេចបានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីជួបសំណេះសំណាល និងទទួលទានអាហារសាមគ្គីជាមួយមហាគ្រួសារកីឡាកម្ពុជា នៅមជ្ឈមណ្ឌលកោះពេជ្រ កាលពីល្ងាចថ្ងៃទី០៣ ខែមេសា ឆ្នាំ២០២៣ ពាក់ព័ន្ធនឹងការរៀបចំធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ជូនដល់សមាជិកអង្គប្រជុំដើម្បីឱ្យជ្រាបពីព្រឹតិ្តការណ៍ជាប្រវត្តិសាស្រ្តនេះ។

ពាក់ព័ន្ធនឹងការចូលរួមប្រកួតប្រជែងក្នុងព្រឹត្តិការណ៍ស៊ីហ្គេម ឯកឧត្តម ឧត្តមសេនីយ៍ឯក បានណែនាំដល់ប្រតិភូ ប្រតិភូរង ដែលនឹងទទួលភារកិច្ចដឹកនាំកីឡាករ កីឡាការិនីទៅចូលរួមតាមប្រភេទវិញ្ញាសាកីឡានីមួយៗ ចាំបាច់ត្រូវស្គាល់ពីតួនាទី និងភារកិច្ចរបស់ខ្លួន ដោយត្រូវបង្កើនការយកចិត្តទុកដាក់ ដើម្បីក្រសោបបានជោគជ័យក្នុងព្រឹត្តិការណ៍កីឡាដែលកម្ពុជា ធ្វើជាម្ចាស់ផ្ទះជាប្រវត្តិសាស្រ្តមួយនេះ។

ឯកឧត្តម ឧត្តមសេនីយ៍ឯក បានកោតសរសើរផងដែរ ដល់ប្រតិភូ ប្រតិភូរង ដែលធ្លាប់បានដឹកនាំកីឡាករ កីឡាការិនីចូលរួមប្រកួតក្នុងព្រឹត្តិការណ៍កីឡាជាតិ លើកទី៣ ឆ្នាំ២០២២កន្លងទៅ ប្រកបដោយជោគជ័យ។ ឆ្លងកាត់បទពិសោធន៍ទាំងនេះ ប្រតិភូ ប្រតិភូរង អាចបន្តដឹកនាំវិញ្ញាសារបស់ខ្លួន ទៅចូលរួមក្នុងព្រឹត្តិការណ៍ស៊ីហ្គេមឆ្នាំនេះ តែយ៉ាងណា ត្រូវតែបង្កើនការយកចិត្តទុកដាក់ប្រកបដោយស្មារតីអត់ធ្មត់ និងមានក្រមសីលធម៍ខ្ពស់ ដ្បិតព្រឹត្តិការណ៍នេះ គឺជាព្រឹត្តិការណ៍អន្តរជាតិ ដូច្នេះប្រតិភូ ប្រតិភូរងដែលទទួលបន្ទុក ចាំបាច់ត្រូវបង្កើន និងបន្តកិច្ចសហការឱ្យបានជិតស្និត ជាមួយក្រសួងអប់រំ យុវជន និងកីឡា និងគណៈកម្មាធិការជាតិរៀបចំព្រឹត្តិការណ៍កីឡាអាស៊ី-អាគ្នេយ៍ (CAMSOC) ក្នុងគោលដៅធ្វើឱ្យបេសកកម្មមួយនេះសម្រេចទៅបាន ប្រកបដោយផ្លែផ្កា និងលើកមុខមាត់ជាតិ ក៏ដូចជាក្រសួងមហាផ្ទៃទាំងមូលផងដែរ។ ឯកឧត្តម បានសង្កត់ធ្ងន់ទៀតថា ក្នុងនាមប្រតិភូ ប្រតិភូរងដែលជាកងកម្លាំង ចាំបាច់ត្រូវមានភាពម៉ឺងម៉ាត់ ច្បាស់លាស់ គោរពវិន័យ និងត្រូវមានក្រមសីលធម៍ លើការងារដឹកនាំអត្តពលិកចូលរួមការប្រកួត។

ដើម្បីឱ្យការត្រៀមខ្លួនប្រកបដោយជោគជ័យ ឯកឧត្តម អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ បានស្នើដល់ប្រតិភូ ប្រតិភូរងត្រូវធ្វើរបាយការណ៍ប្រចាំថ្ងៃ ក្នុងនោះរួមមាន៖ របាយការណ៍វត្តមាន លទ្ធផលប្រកួត ហើយប្រតិភូ ប្រតិភូរងទាំងអស់ដែលទទួលផែន ត្រូវផ្តល់មកអគ្គលេខាធិការដ្ឋាន ដូចជាបញ្ជីឈ្មោះប្រតិភូ គ្រូបង្វឹក កីឡាករ កីឡាការិនី ដែលត្រូវចូលរួមការប្រកួត។ មិនតែប៉ុណ្ណោះ ត្រូវធ្វើបច្ចុប្បន្នភាពជាប្រចាំ ចំពោះលទ្ធផលដែលកីឡាករ កីឡាការិនីរបស់ក្រសួងមហាផ្ទៃដណ្តើមបានមេដាយពីការប្រកួត។

ជាចុងបញ្ចប់ នៃកិច្ចប្រជុំ ឯកឧត្តម អគ្គលេខាធិការ ក៏បានប្រកាសពីការត្រៀមរៀបចំពីធីអបអរសាទរសង្ក្រាន្តឆ្នាំថ្មី ឆ្នាំថោះ បញ្ចាស័ក ព.ស២៥៦៦ គ.ស២០២៣ ដែលអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ នឹងរៀបចំនៅថ្ងៃទី០៧ ខែមេសា ឆ្នាំ២០២៣ ដោយមានការលេងល្បែងប្រជាប្រិយខ្មែរ និងការទទួលទានអាហារសាមគ្គីផងដែរ៕