អភិបាលខេត្តឧត្ដរមានជ័យ អញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់សមិទ្ធផលនានា និងកាត់ឫសសីមាព្រះវិហារ “វត្តពុទ្ធោអរហំ” ហៅ “វត្តភ្នំដី”

ភ្នំពេញ៖ ឯកឧត្ដម ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ នាព្រឹកថ្ងៃចន្ទ ១រោច ខែមាឃ ឆ្នាំខាល ចត្វាស័ក ព.ស ២៥៦៦ ថ្ងៃទី ០៦ ខែមីនា ឆ្នាំ២០២៣ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់សមិទ្ធផលនានា និងកាត់ឫសសីមាព្រះវិហារ “វត្តពុទ្ធោអរហំ” ហៅ “វត្តភ្នំដី” ស្ថិតក្នុងភូមិខ្នារ ឃុំក្រសាំង ស្រុកចុងកាល់ ខេត្តឧត្តរមានជ័យ។

ក្នុងឱកាសពិធីសម្ពោធនេះដែរ ឯកឧត្ដម ប៉ែន កុសល្យ បានរំលឹកថាក្រោយថ្ងៃរំដោះ ៧មករា ១៩៧៩ ក្រោមការដឹកនាំដ៏ជាញជ័យរបស់គណបក្សប្រជាជនកម្ពុជា ប្រទេសជាតិត្រូវបានរំដោះ ប្រជាពលរដ្ឋរួចចាកផុតពីទុក្ខវេទនា បន្តិចម្តងៗប្រទេស ជាតិបានអភិវឌ្ឍឆ្ពោះទៅមុខប្រកបដោយមោទកភាព ជំនឿ និងសាសនាត្រូវបានរស់រាន មានជីវិតឡើងវិញផងដែរ ហើយបច្ចុប្បន្នវិស័យសាសនា ពិសេសព្រះពុទ្ធសាសនា គឺមានការរីកចម្រើនខ្លាំង ទីអារាមស្ថាននានាត្រូវបានកសាងរីកដុះដាល ក្រោមការជួយឧបត្ថម្ភពីសំណាក់បងប្អូនប្រជាពលរដ្ឋជាពុទ្ធសាសនិក ក៏ដូចជាការយកចិត្តទុកដាក់ពីប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខដឹកនាំប្រកបដោយគតិបណ្ឌិត ដែល បានធ្វើឱ្យកម្ពុជារក្សាបាននូវសុខសន្តិភាព សេរីភាព និងវឌ្ឍនភាពគ្រប់វិស័យ។

ឯកឧត្ដមអភិបាលខេត្ត បានបន្តថារហូតមកទល់បច្ចុប្បន្ននេះ វិស័យពុទ្ធចក្របានដើរតួនាទីយ៉ាងសំខាន់សម្រាប់បំរើ ឱ្យសាធារណជន ជាមណ្ឌលមនុស្សចាស់ ក្មេងកំព្រា និងជាឃ្លាំងបណ្ដុះគំនិត អប់រំសីលធម៌ សង្គមដល់គ្រប់ស្រទាប់មហាជន ជាពិសេសយុវជនដ៏មានប្រសិទ្ធភាព។

ឆ្លៀតក្នុងឱកាសនេះផងដែរ ឯកឧត្ដមអភិបាលខេត្ត បានសំណូមពរដល់បងប្អូនប្រជាពលរដ្ឋទាំងអស់រួម គ្នាថែរក្សាសមិទ្ធផលដែលមានហើយ ព្រោះវាជាសមិទ្ធផលប្រយោជន៍រួមរបស់យើងទាំងអស់គ្នា ធ្វើយ៉ាងណារក្សាឱ្យការប្រើប្រាស់ប្រកបដោយនិរន្តរភាព ក្រោមទិសស្លោក “រក្សាចាស់ បង្កើនថ្មីជាជំហាន តាមលទ្ធភាព និងធនធានដែលមាន” ដែលរាប់ទុកជាសម្បត្តិក្នុង ជាតិនេះ និងជាកុសល្យផលបុណ្យនាអនាគតជាតិ។

ជាចុងបញ្ចប់ ឯកឧត្ដមអភិបាលខេត្ត បានយកឱកាសដ៏ថ្លៃថ្លានេះ “អរគុណសន្តិភាព និងសូមអរគុណ សម្ដេចតេជោដែលបានដឹកនាំកម្ពុជាឲ្យមានសន្តិភាព” ហើយប្តេជ្ញារួមគ្នារក្សាការពារសន្និភាព នេះឲ្យបានជាដាច់ខាត ពិសេសប្ដេជ្ញាចិត្តគាំទ្រ និងអនុវត្តតាមគោលនយោបាយរបស់រាជរដ្ឋាភិបាលកម្ពុជា ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន ជាអគ្គ មគ្គុទេសន៍ដ៏ឆ្នើមបំផុតដែលបាននាំមកជូនជាតិមាតុភូមិនូវសន្តិសុខ ស្ថេរភាព និងការអភិវឌ្ឍសេដ្ឋកិច្ច-សង្គមនាពេលបច្ចុប្បន្ន។

ក្នុងឱកាសនោះដែរឯកឧត្ដមអភិបាលខេត្ត ក៏បាននាំយកបច្ច័យចំនួន ៥លានរៀល សម្រាប់ចូលកសាង ចែកជូនយាយជីតាជីចំនួន ១០០នាក់ ក្នុងមួយនាក់ទទួលបានក្រណាត់សមួយដុំ និងថវិកា៥ពាន់រៀល, លោកគ្រូអ្នកគ្រូចំនួន ២០នាក់ ក្នុងមួយនាក់ទទួលបានថវិកា៥ម៉ឺនរៀល និងសិស្សានុសិស្សចំនួន ១០០នាក់ ក្នុងមួយនាក់ទទួលបានសៀវភៅ៣ក្បាល ប៉ិច២ដើម និងថវិកា៥ពាន់រៀលផងដែរ ៕