ឯកឧត្តម ឡុង ឈុនឡៃ ចុះសាកសួរសុខទុក្ខគ្រួសារលោក សៀង ប៊ុនថន ដែលរងគ្រោះថ្នាក់ធ្លាក់ពីលើដើមអំពិលទឹក មានទីលំនៅភូមិដំណាក់ពពូល សង្កាត់កំពង់ឆ្នាំង

ភ្នំពេញ៖ ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង និងជាអនុប្រធានគណៈកម្មាធិការគណបក្សប្រជាជនកម្ពុជាខេត្ត តំណាងឯកឧត្តម ស៊ុន សុវណ្ណារិទ្ធិ អភិបាលខេត្ត និង ជាប្រធានគណៈកម្មាធិការគណបក្ស ប្រជាជនកម្ពុជាខេត្ត រួមដំណើរដោយឯកឧត្តម គុយ ចន្ថា សមាជិកក្រុមប្រឹក្សាខេត្ត លោក ហយ ឡាំ ក្រុមការងារថ្នាក់ខេត្តចុះក្រុងកំពង់ឆ្នាំង លោកស្រី កែវ សុផាត ចៅសង្កាត់កំពង់ឆ្នាំងនិងលោកស្រី ផាន់ សម្ផស្ស ចៅសង្កាត់រងទី១ ព្រមទាំងលោក លោកស្រីក្រុមការងារមួយចំនួនទៀត នារសៀលថ្ងៃសុក្រ ៥កើត ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៤ ខែកុម្ភៈ ឆ្នាំ២០២៣ បានចុះសាកសួរសុខទុក្ខគ្រួសារលោក សៀង ប៊ុនថន ដែលរងគ្រោះថ្នាក់ធ្លាក់ពីលើដើមអំពិលទឹក មានទីលំនៅភូមិដំណាក់ពពូល សង្កាត់កំពង់ឆ្នាំង កាលពីថ្ងៃទី២២ ខែកុម្ភៈ ឆ្នាំ២០២៤ បច្ចុប្បន្នកំពុងសម្រាកព្យាបាលនៅមន្ទីរពេទ្យរាជធានីភ្នំពេញ។

មានប្រសាសន៍ក្នុងឱកាសនោះឯកឧត្តម ឡុង ឈុនឡៃ បានពាំនាំនូវប្រសាសន៍ផ្តាំផ្ញើការសាកសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា សម្តេចចៅហ្វាវាំង គង់ សំអុល ឧបនាយករដ្ឋមន្រ្តី រដ្ឋមន្រ្តីព្រះបរមរាជវាំង និង ជាប្រធានក្រុមការងារថ្នាក់កណ្តាលចុះមូលដ្ឋានខេត្តកំពង់ឆ្នាំង ឯកឧត្តម អភិបាលខេត្ត និងជាប្រធានគណៈកម្មាធិការគណបក្សប្រជាជនកម្ពុជាខេត្ត ដែលកន្លងមកសម្តេចនិងឯកឧត្តមតែងតែគិតគូរពីសុខទុក្ខប្រជាពលរដ្ឋងាយរងគ្រោះនិងរងគ្រោះដោយគ្រោះថ្នាក់ផ្សេងៗគ្រប់ទីកន្លែងដោយមិនប្រកាន់ពូជសាសន៍និងនិន្នាការនយោបាយឡើយ។

ឯកឧត្តម ឡុង ឈុនឡៃ ក៏បានជូនពរអោយលោក សៀង ប៊ុនថន ឆាប់ជាសះស្បើយនិងបានផ្តាំផ្ញើដល់គ្រួសារលោក សៀង ប៊ុនថន ត្រូវខិតខំជួយមើលថែទាំគាត់អោយបានដិតដល់ ដោយអនុវត្តតាមវេជ្ជបញ្ជារបស់លោកគ្រូពេទ្យ ដើម្បីឆាប់ជាសះស្បើយបានវិលត្រឡប់មកជួយថែទាំក្រុមគ្រួសារនិងប្រកបមុខរបរចិញ្ចឹមគ្រួសារដូចដើមវិញ។

ក្នុងឱកាសនោះ ឯកឧត្តម ឡុង ឈុនឡៃ និង ឯកឧត្តម គុយ ចន្ថា បាននាំយកថវិកាផ្ទាល់របស់ឯកឧត្តម ថវិការបស់ឯកឧត្តម ស៊ុន សុវណ្ណារិទ្ធិ ក្រុមការងារចុះក្រុងកំពង់ឆ្នាំងរដ្ឋបាលក្រុង រដ្ឋបាលសង្កាត់កំពង់ឆ្នាំង និងសប្បរសជនសរុបចំនួន ២,១៥០,០០០រៀល និង អង្ករ៥០គីឡូក្រាម ដល់គ្រួសារបុរសរងគ្រោះ និងលោក ហៀង ដារ៉ា ក្រុមការងារចុះក្រុងកំពង់ឆ្នាំង បានជួយសងជំនួសថ្លៃជំពាក់បាឡាស្មាច់ចំនួន៤០ម៉ឺនរៀលដែលបុរសជំពាក់គេផងដែរ។

តំណាងអោយក្រុមគ្រួសារលោក សៀង ប៊ុនថន បានថ្លែងអំណរគុណយ៉ាងជ្រាវជ្រៅដល់សម្តេចតេជោ ហ៊ុន សែន សម្តេចចៅហ្វាវាំង គង់ សំអុល ឯកឧត្តម ស៊ុន សុវណ្ពារិទ្ធិ ឯកឧត្តម ឡុង ឈុនឡៃ និង ឯកឧត្តម គុយ ចន្ថា ព្រមទាំងក្រុមការងារទាំងអស់សូមមានសុខភាពល្អ ជន្មាយុយឺនយូរ និងជួបប្រទះតែនិងពុទ្ធពរបួនប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕