ខេត្តតាកែវ៖ នាព្រឹកថ្ងៃចន្ទ ទី០៦ ខែកុម្ភៈឆ្នាំ២០២៣ ឯកឧត្តម អ៊ូច ភា អភិបាលខេត្តតាកែវ និង លោកជំទាវ ស្រី ប៉ុណ្ណាដាវី បានដឹកនាំមន្រ្តីរាជការតាមមន្ទីរអង្គភាពជុំវិញខេត្ត រៀបចំធ្វើពិធីបុណ្យមាឃបូជា ដែលប្រារព្ធធ្វើឡើងស្ថិតនៅ វត្តអង្គតាសោម ឃុំអង្គតាសោម ស្រុកត្រាំកក់ ពិធីនេះដែរក៏មានការអញ្ជើញចូលរួមពីសំណាក់ ឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រី ប្រធាន អនុប្រធានមន្ទីរ មន្រ្តីរាជការអង្គភាពជុំវិញខេត្ត ព្រមទាំងព្រះសង្ឃគណៈកម្មការវត្ត តាជី យាយជី និងប្រជាពលរដ្ឋចំណុះជើងវត្ត ជាច្រើនកុះករ។
ឯកឧត្តម អ៊ូច ភា អភិបាលខេត្ត បានមានប្រសាសន៍ថា បុណ្យមាឃបូជាប្រារព្ធឡើងដើម្បី រំលឹក ដល់ថៃ្ង ដែល ព្រះសម្មាសម្ពុទ្ធទ្រង់ប្រកាស បង្កើត ព្រះពុទ្ធសាសនាឡើងក្នុង លោកនាប្រទេសឥណ្ឌាកាល ពី៥៨៨ ឆ្នាំ មុនគ្រិស្ត សករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន ៩ខែគត់ ដែលព្រះពុទ្ធ សាសនា មិនត្រឹមតែបានធ្វើឱ្យបងប្អូនប្រជាពលរដ្ឋយើងបានរួមរស់ជាមួយគ្នាដោយសុខសាន្តខាង ផ្លូវស្មារតី ប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់សុខសន្តិភាពស្ថិរភាពសង្គមការអភិវឌ្ឍលើគ្រប់វិស័យនិងថែរក្សាការពារអត្តសញ្ញាណជាតិទៀតផង ។
បន្ថែមពីនេះដែរ ឯកត្តមអភិបាលខេត្តតាកែវ ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ ត្រូវទៅចាក់វ៉ាក់សាំងការពារជំងឺកូវីដ១៩ គ្រប់ចំនួនដូស ដែល ក្រសួងសុខាភិបាលកំណត់ ឱ្យបានគ្រប់ៗគ្នា ដើម្បីបង្កើនភាពសុំាក្នុងរាងកាយ កុំឱ្យមានការចម្លងរីករាលដាលនៃជំងឺកូវីដ១៩ បន្តទៀត នៅសហគមន៍របស់យើង។ ជាពិសេស ឯកឧត្តម អ៊ូច ភា អភិបាលខេត្ត ក៏ក្រើនរំលឹកបន្ថែម ដល់បងប្អូនប្រជាពលរដ្ឋគ្រប់រូប ពេលបើកបរត្រូវធ្វើដំណើរគោរពច្បាប់ចរាចរណ៍ទាំងអស់គ្នា ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍ឱ្យបាននៅកម្រិតទាបបំផុត ។
ឆ្លៀតក្នុងឱកាសនោះដែរ ឯកឧត្តម អ៊ូច ភា អភិបាលខេត្ត និងលោកជំទាវ ព្រមទាំង មន្ត្រីរាជការមន្ទីរ អង្គភាពជុំវិញខេត្ត បាននាំមកនូវបច្ច័យចូលរួមកសាងក្នុងវត្តអង្គតាសោម ចំនួន ៥.០០០.០០០រៀល ព្រមទាំង ប្រគេនព្រះសង្ឃ ៨០អង្គ ដោយក្នុងមួយអង្គៗ ទេយ្យវត្ថុមួយកញ្ចប់ និងបច្ច័យមួយចំនួនផងដែរ៕
