ឯកឧត្តម ហង្ស ចាន់ព្រីដា និងឯកឧត្តម អ៊ុំ រាត្រី អញ្ជើញបិទអនុសំវច្ឆរ មហាសន្និបាតមន្ត្រីសង្ឃ ទូទាំងខេត្តបន្ទាយមានជ័យ លើកទី៣០

ភ្នំពេញ៖ ក្នុងរយៈពេលពេញមួយថ្ងៃនៃ អនុសំវច្ឆរៈមហាសន្និបាតមន្ត្រីសង្ឃ ទូទាំងខេត្តបន្ទាយមានជ័យ ដោយមហាសន្និបាតទាំងមូលបានអនុវត្ត និងគោរពតាមកម្មវិធីត្រឹមត្រូវដែលបានគ្រោងទុក ដោយមានការសម្របសម្រួលពីមន្ទីរធម្មការ និងសាសនាខេត្ត និងព្រះមេគណខេត្តទាំង២គណៈ បានបង្ហាញពីគោលបំណងនិងបទអន្តរាគមន៍បញ្ហាប្រឈមនិងដោះស្រាយសំណូមពររបស់សាលាគណ សាលាអនុគណ ព្រះចៅអធិការ អាចារ្យគណៈកម្មការ បានពិភាក្សាយ៉ាងផុលផុសដើម្បីប្តូរបទពិសោធទៅវិញទៅមកលើចំណុចខ្លាំង ចំណុចខ្សោយ បញ្ហាប្រឈមក្នុងវិស័យព្រះពុទ្ធសាសនា ដោយខិតខំយកអស់កម្លាំងកាយចិត្តដើម្បីត្រួតពិនិត្យនិងវាយតម្លៃនិងលើកទិសដៅអនុវត្តបន្ត ផងដែរ ។

មន្ទីរអង្គភាពរួមមានមន្ទីរវប្បធម៌និងវិចិត្រសិល្បៈមន្ទីរបរិស្ថានខេត្តបានឡើងមានចំណាប់អារម្មណ៍ចំពោះទីវត្តអារាមនានាត្រូវចូលរួមថែរក្សានូវសមិទ្ធផលដែលមានអាយុកាលយូរឆ្នាំនិងរក្សាឲ្យបានល្អស្អាតជាលទ្ធផលនៃមហាសន្និបាតនេះសង្កេតឃើញមានបញ្ហាប្រឈមខ្លះត្រូវលើកយកមកដោះស្រាយជៀសវាងនូវជម្លោះអធិករណ៍ណាមួយកើតឡើង។ ពោលគឺត្រូវលុបបំបាត់នូវវប្បធម៌រៃអង្គាសខុសពេលវេលា។ លុះដល់ថ្ងៃបន្ទាប់ទី៣១ ខែមករាឆ្នាំ២០២៣ ពិធីបិទមហាសន្និបាតមន្ត្រីសង្ឃខេត្តក្រោមអធិបតីភាព ឯកឧត្តម ហង្ស ចាន់ព្រីដា រដ្ឋលេខាធិការក្រសួងធម្មការ និងសាសនា និងឯកឧត្តម អ៊ុំ រាត្រី អភិបាលខេត្តបន្ទាយមានជ័យ ។

លោក បៀវ ថាន ប្រធានមន្ទីរធម្មការនិងសាសនាខេត្តបានលើកឡើងថា៖ ក្រោយពីបានធ្វើការពិភាក្សារកដំណោះស្រាយជុំវិញបញ្ហាដែលបានលើកឡើងរួចមក ព្រះមន្ត្រីសង្ឃនិងសហការបន្តពង្រឹងគុណភាព ការគ្រប់វត្តអារាមឲ្យមានរបៀបរៀបរយ សាមគ្គីភាព រក្សាតម្លៃព្រះពុទ្ធសាសនាបន្តជំរុញក្នុងការរៀបចំរចនាសម្ព័ន្ធថ្នាក់ខេត្ត ស្រុក ក្រុង បន្តខិតខំពង្រឹងពង្រីកសាលាពុទ្ធិកបឋមសិក្សារហូតដល់ពុទ្ធិកវិទ្យាល័យនិងគ្រូបង្រៀនឲ្យមានគុណភាពល្អ។

នាឱកាសនោះឯកឧត្តម អ៊ុំ រាត្រី អភិបាលខេត្តបន្ទាយមានជ័យនិងឯកឧត្តម ហង្ស ចាន់ព្រីដា រដ្ឋលេខាធិការក្រសួងធម្មការ និងសាសនាបានមានប្រសាសន៍ថ្លែងនូវការកោតសរសើរនិងវាយតម្លៃខ្ពស់ចំពោះមន្ទីរធម្មការនិងសាសនាដែលបានសហការជាមួយសាលាគណខេត្តបានធ្វើឲ្យអង្គមហាសន្និបាតទទួលបានជោគជ័យ។

ទន្ទឹមនោះដែរ ឯកឧត្ដម ក៏សូមផ្តាំផ្ញើដល់ប្រធានអង្គអនុសំវច្ឆរៈមហាសន្និបាតមន្ត្រីសង្ឃលើកទី៣០ បន្តពង្រឹងគុណភាពដឹកនាំសាមគ្គីភាពផ្ទៃក្នុង រក្សាតម្លៃព្រះពុទ្ធសាសនា ធ្វើឲ្យវត្តអារាមក្លាយទៅជាកន្លែងផ្តល់នូវចំណេះដឹងទាំងផ្លូវលោកនិងផ្លូវធម៌អប់រំផ្លូវចិត្តចៀសវាងនូវអំពើហិង្សា ជាពិសេសបន្តទប់ស្កាត់សកម្មភាពធ្វើអាជីវកម្មលើសាសនាកេងប្រវ័ញ្ចដើម្បីផលប្រយោជន៍លាភសក្ការៈតាមគ្រប់រូបភាពដូចជា ការឃោសនារៃអង្គាសខុសពេល គ្មានច្បាប់ទម្លាប់ត្រឹមត្រូវនិងតាមទីប្រជុំជនសាធារណៈធ្វើឲ្យជះឥទ្ធិពលអាក្រក់បាត់បង់នូវតម្លៃនៃព្រះពុទ្ធសាសនា។
ចុងក្រោយ គណៈអធិបតីបានប្រគល់ប័ណ្ណសរសើរបានថ្លែងនូវអំណរគុណនិងពិធីរាប់បាត្រព្រះសង្ឃចំនួន ៣៣៣អង្គផងដែរ ៕