ឯកឧត្តមបណ្ឌិត ហ៊ឺ វីរៈ អញ្ជើញសំណេះសំណាល និងផ្ដល់អំណោយជាសម្ភារៈសិក្សាមួយចំនួន ជូនដល់សិស្សានុសិស្ស ស្ថិតនៅឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង

 ភ្នំពេញ៖ ឯកឧត្តមបណ្ឌិត ហ៊ឺ វីរៈ ប្រធានក្រុមការងារគណបក្សចុះមូលដ្ឋានស្រុកកំពង់ត្រឡាច នាព្រឹកថ្ងៃសុក្រ ៦កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែមករា ឆ្នាំ២០២៣ បានអញ្ជើញសំណេះសំណាល និងផ្ដល់អំណោយជាសម្ភារៈសិក្សាមួយចំនួន ជូនដល់សិស្សានុសិស្ស នៅសាលាបឋមសិក្សាកំពង់ក្ដារ ស្ថិតនៅភូមិកំពង់ក្ដារ ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង។

អំណោយសម្ភារៈ ដែលផ្ដល់ជូននៅពេលនោះ រួមមាន៖ សម្លៀកបំពាក់សិស្សប្រុសចំនួន ១១៥កំប្លេ, សម្លៀកបំពាក់សិស្សស្រី ចំនួន ៩៤កំប្លេ, និងសម្ភារៈសិក្សាចំនួន ១០៩ឈុត ក្នុងមួយឈុត មានសៀវភៅ ៣ក្បាល, ប៊ិច ២ដើម, ខ្មៅដៃ ២ដើម បន្ទាត់ ១, ជ័រលុប ១ និងក្ដារឈ្នួន ១។

នាឱកាសនោះផងដែរ ឯកឧត្តមបណ្ឌិត ក៏បានអញ្ជើញចុះសួរសុខទុក្ខបងប្អូនប្រជាពលរដ្ឋ ដែលមានជីវភាពខ្វះខាតចំនួន ៥ គ្រួសារ ស្ថិតនៅភូមិគក ឃុំពានី ស្រុកកំពង់ត្រឡាច ខេត្តកំពង់ឆ្នាំង។ ក្នុងនោះ ឯកឧត្តមបណ្ឌិត ក៏បាននាំយកនូវអំណោយរបស់ សម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ប្រធានក្រុមការងារគណបក្សចុះមូលដ្ឋានខេត្តកំពង់ឆ្នាំង ផ្ដល់ជូនដល់ក្រុមគ្រួសារទាំង ៥ គ្រួសារផងដែរ។

អំណោយដែលផ្ដល់ជូន ក្នុងមួយគ្រួសារៗទទួលបាន អង្ករ ២៥គីឡូក្រាម, មី ១កេស, ទឹកត្រី ១យួរ, ទឹកស៊ីអ៊ីវ ១យួរ, ត្រីខ ១០កំប៉ុង និងថវិកាមួយចំនួន ៕