អគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ប្រជុំត្រួតពិនិត្យការងារបញ្ចូលក្របខណ្ឌនគរបាលជាតិ ដល់ជ័យលាភីមេដាយមាសកីឡាជាតិលើកទី៣
ភ្នំពេញ៖ អគ្គលេខាធិការដ្ឋាន ក្រុមប្រឹក្សាកីឡាក្រសួងមហាផ្ទៃ កាលពីថ្ងៃទី២០ ខែមករា ឆ្នាំ២០២៣ បានរៀបចំកិច្ចប្រជុំស្តីពី ការត្រួតពិនិត្យការងារ កីឡាករ កីឡាការិនី ទទួលបានជ័យលាភីមេដាយមាសពីការប្រកួតកីឡាជាតិលើកទី៣ ឆ្នាំ២០២២ ដែលត្រូវបញ្ចូលក្នុងក្របខណ្ឌនគរបាលជាតិ ក្រោមអធិបតីភាព ឯកឧត្តម សរ សិទ្ធិ អនុរដ្ឋលេខាធិការក្រសួងមហាផ្ទៃ ទទួលជួយការងារដឹកនាំ អគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ និងមានការអញ្ជើញចូលរួមពី ឯកឧត្តម ឧត្តមសេនីយ៍ទោ យិត ភីរៈ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ នៅមជ្ឈមណ្ឌលកីឡាក្នុងពហុកីឡដ្ឋានជាតិអូឡាំពិក។
ឯកឧត្តម យិត ភីរៈ អគ្គលេខាធិការ បានបញ្ជាក់ថា គិតមកទល់ពេលនេះ ការផ្តល់ឯកសាររបស់កីឡាករ កីឡាការិនី ពីប្រតិភូ ទទួលបន្ទុកតាមប្រភេទកីឡានីមួយៗ បានប្រមាណជា៩៧ភាគរយហើយ ដោយឡែកការងារដែលនៅសេសសល់ អគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃបាននឹងកំពុងរៀបចំបង្ហើយ។
ក្នុងកិច្ចប្រជុំនោះ ឯកឧត្តម សរ សិទ្ធិ បានផ្តល់អនុសាសន៍ ដល់ប្រតិភូ ប្រតិភូរង និងគ្រូបង្វឹក ដែលទទួលបន្ទុកការងារនេះ ត្រូវយកចិត្តទុកដាក់ឱ្យបានហ្មត់ចត់ ពាក់ព័ន្ធនឹងឯកសារនានា របស់អត្តពលិកខ្លួន ពោលគឺឱ្យបានត្រឹមត្រូវ ស្របតាមលិខិតឧទ្ទេសនាមចាត់បញ្ជូនទៅចូលរួមការប្រកួតកន្លងមក និងត្រូវប្រកាន់ខ្ជាប់នូវក្រមសីលធម៍ វិជ្ជាជីវៈ ជាពិសេសត្រូវមានសុក្រិតភាព។
ជាមួយគ្នានេះ ឯកឧត្តមគណៈអធិបតី ក៏បានជំរុញដល់អគ្គលេខាធិការរង ដែលទទួលបន្ទុកតាមប្រភេទកីឡានីមួយៗ ត្រូវពិនិត្យឱ្យបានហ្មត់ចត់ឡើងវិញ នូវរាល់ឯកសានានា ដែលប្រតិភូបញ្ជូនមកឱ្យបានត្រឹមត្រូវ។
ឯកឧត្តម សរ សិទ្ធិ បានមានប្រសាសន៍បន្តទៀតថា រាល់ព័ត៌មាននានាពាក់ព័ន្ធការបញ្ចូលក្របខណ្ឌនគរបាលជាតិរបស់កីឡាករ កីឡាការិនី ដែលជាម្ចាស់មេដាយមាសកីឡាជាតិ ប្រតិភូ ប្រតិភូរង និងគ្រូបង្វឹកទាំងអស់ត្រូវបន្តផ្សព្វផ្សាយ និងផ្តល់ព័ត៌មានឱ្យបានច្បាស់លាស់ ដល់កីឡាករ កីឡាការិនីទាំងនោះ ជៀសវាងការទទួលព័ត៌មានណាមួយមិនច្បាស់លាស់។ ហើយបើមានបញ្ហាណាមួយកើតឡើង ត្រូវដោះស្រាយឱ្យបានលឿនទាន់ពេលវេលា កុំឱ្យមានបញ្ហាទៅថ្ងៃមុខ។
ឯកឧត្តម បន្តថា ក្រោមការដឹកនាំ និងការយកចិត្តទុកដាក់ដ៏ខ្ពង់ខ្ពស់ពី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សមិទ្ធផលដែលអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ ទទួលបាននៅពេលនេះ គឺជាមោទកភាពមួយពុំអាច់កាត់ថ្លៃបានឡើយ ដែលមន្ត្រី និងកីឡាករ កីឡាការិនីទាំងអស់ ត្រូវបន្តការខិតខំប្រឹងប្រែង រួមគ្នាតបស្នងនូវគុណូបការៈដែលសម្តេចបានផ្តល់ជូននៅពេលនេះ។ ឯកឧត្តម បានសង្កត់ធ្ងន់ទៀតថា រាល់ជោគជ័យដែលអគ្គលេខាធិការដ្ឋានទទួលបាន គឺជាចំណែកនៃជោគជ័យរបស់ពួកយើងទាំងអស់គ្នា ពោលគឺពុំមែនជាជោគជ័យរបស់នរណាម្នាក់ផ្តាច់មុខនោះទេ។
សូមជម្រាបជូនថា ការប្រកួតកីឡាជាតិ លើកទី៣ ឆ្នាំ២០២២កន្លងទៅក្រសួងមហាផ្ទៃ បានបញ្ជូន ប្រតិភូ ប្រតិភូរង គ្រូបង្វឹក កីឡាករ កីឡាការិនីសរុបចំនួន ៤៦១នាក់ ឱ្យទៅចូលរួម។ លទ្ធផលដែលទទួលបាន គឺក្រសួងមហាផ្ទៃ ជាប់ចំណាត់ថ្នាក់លេខ១ ឈរលើបណ្តាក្រសួងស្ថាប័ន និងរាជធានី ខេត្ត ដែលបានបញ្ជូនអត្តពលិកមកចូលរួមប្រកួត ដោយដណ្តើមបានមេដាយសរុបចំនួន២១១គ្រឿង ក្នុងនោះមេដាយមាស១០៣ ប្រាក់៥៨ និងសំរឹទ្ធ៥០គ្រឿង៕
