ភ្នំពេញ៖ នៅអាកាសយានដ្ឋានអន្តរជាតិភ្នំពេញ នាយប់ថ្ងៃទី១០ ខែមករា ឆ្នាំ២០២៣ ឯកឧត្តម Park Byeongseug អតីតប្រធានរដ្ឋសភា នៃសាធារណរដ្ឋកូរ៉េ បានអញ្ជើញមកដល់ព្រះរាជាណាចក្រកម្ពុជា ក្នុងដំណើរទស្សនកិច្ចជាផ្លូវការនៅកម្ពុជារយៈពេល៤ថ្ងៃ ចាប់ពីថ្ងៃទី១០-១៣ ខែមករា ឆ្នាំ២០២៣។ ដំណើរមកដល់របស់ឯកឧត្តមអតីតប្រធានរដ្ឋសភាកូរ៉េ បានទទួលស្វាគមន៍ពី ឯកឧត្តម ព្រហ្ម វិរៈ អគ្គនាយកទំនាក់ទំនងអន្តរជាតិ ពិធីការ និងព័ត៌មាន នៃអគ្គលេខាធិការដ្ឋានរដ្ឋសភា។
តាមកម្មវិធីគ្រោងទុក ឯកឧត្តម Park Byeongseug នឹងអញ្ជើញចូលជួបសម្តែងការគួរសម ជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជួបពិភាក្សាការងារជាមួយឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ៕
