សាខាកាកបាទក្រហមកម្ពុជាខេត្តក្រចេះ រៀបចំប្រារព្ធទិវាអន្តរជាតិនៃអ្នកស្ម័គ្រចិត្ត ៥ធ្នូ ឆ្នាំ២០២២ ក្រោមប្រធានបទ «សមគ្គីភាពតាមរយៈការស័្មគ្រចិត្ត»
ភ្នំពេញ៖ សាខាកាកបាទក្រហមកម្ពុជា ខេត្តក្រចេះ នៅព្រឹកថ្ងៃសុក្រ ទី២៣ ខែធ្នូ ឆ្នាំ២០២២ បានរៀបចំប្រារព្ធទិវាអន្តរជាតិនៃអ្នកស្ម័គ្រចិត្ត ៥ធ្នូ ឆ្នាំ២០២២ ក្រោមប្រធានបទ «សមគ្គីភាពតាមរយៈការស័្មគ្រចិត្ត» ក្រោមអធិបតីភាព ឯកឧត្តម ធុន គ្រី អនុប្រធានអចិន្ត្រៃយ៍ គណៈកម្មាធិការសាខា និងមានការចូលរួមពីសំណាក់ ឯកឧត្តម លោកជំទាវ លោក លោកស្រី សមាជិក សមាជិកា គណៈកម្មាធិការសាខា មន្រី្តប្រតិបត្តិសាខា ដែលមានអ្នកស្ម័គ្រចិត្ត យុវជនកក្រក សរុបចំនួន១១១នាក់ ដែលពិធីនេះបានប្រព្រឹត្តទៅនៅក្នុងបរិវេណ អគារអនុសាខាកាកបាទក្រហមកម្ពុជា ស្រុកសំបូរ។
ក្នុងឱកាសនោះដែរ ឯកឧត្តម បានអញ្ជើញអានសារលិខិតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសទិវាអន្តរជាតិនៃអ្នកស្ម័គ្រចិត្ត ៥ធ្នូ ឆ្នាំ២០២២ ក្រោមប្រធានបទ «សាមគ្គីភាពតាមរយៈការស្ម័គ្រចិត្ត» និងមានប្រសាសន៍សំណេះសំណាលជាមួយអ្នកចូលរួមក្នុងអង្គពិធីដោយសេចក្ដីរីករាយជាពន់ពេក ព្រមទាំងបានពាំនាំនូវការផ្តាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់អង្គពិធីទាំងមូល និងបានថ្លែងថា អ្នកស្ម័គ្រចិត្តគឺជាឆ្អឹងខ្នងជាប្រតិបត្តិករជួរមុខ និងជានិមិត្តរូបដ៏សកម្មពុំអាចខ្វះបានរបស់ កាកបាទក្រហមកម្ពុជា ក្នុងការលះបង់កម្លាំងកាយ កម្លាំងចិត្ត និងពេលវេលា ដើម្បីជំនះបានរាល់ការលំបាកនិងបញ្ហាប្រឈមនានាដោយមិនគិតពីការនឿយហត់ និងបានចំណាយពេលវេលាដ៏មានតម្លៃផ្ទាល់ខ្លួនចូលរួមជាមួយសកម្មភាពមនុស្សធម៌។ ជាមួយគ្នានេះដែរ ក៏បានបញ្ជ្រាបពី ប្រវត្តិនៃការករកើតឡើងចលនារបស់ កាកបាទក្រហមអន្តរជាតិ ផងដែរ។
ជាទីបញ្ចប់នៃកម្មវិធី ក៏មានការផ្តល់ជូននូវសម្ភារលើកទឹកចិត្ត ដល់អ្នកស្ម័គ្រចិត្ត ចំនួន៥០នាក់ និងយុវជន ចំនួន២០នាក់ ផងដែរដោយម្នាក់ៗទទួលបាន៖ ក្រមា១ អាវយឺត៣ ជែលលាងដៃ៤ដប និង ថវិកា ៤០.០០០ រៀល៕
