នគរបាលខណ្ឌកំបូល សហការជាមួយកម្លាំងនាយកដ្ឋាន ព្រហ្មទណ្ឌក្រសួងនិង ស្នងការដ្ឋានរាជធានីភ្នំពេញ បំបែកសំណុំរឿង ប្លន់ប្រដាប់អាវុធ ៤ករណី ឃាត់ខ្លួនជនពាក់ព័ន្ធ ចំនួន ៩នាក់
ភ្នំពេញ៖ នគរបាលខណ្ឌកំបូល សហការពីកម្លាំងនគរបាលនាយកដ្ឋានព្រហ្មទណ្ឌ និងកម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញបានស្រាវជ្រាវឈានដល់បំបែកសំណុំរឿងបទល្មើសប្លន់ប្រដាប់អាវុធយ៉ាងកក្រើកទៅលើម៉ូតូជនរងគ្រោះ០៤ករណីនៅខណ្ឌកំបូល ដោយបានបង្ក្រាបចាប់ខ្លួនជនសង្ស័យ០៩នាក់ជាបន្តបន្ទាប់ ដកហូតវត្ថុតាងមធ្យោបាយប្រព្រឹត្តបទល្មើសម៉ូតូ០៣គ្រឿង និងកាំភ្លើងខ្លី០១ដើមម៉ាកកា៥៩ ។
ការបង្ក្រាបចាប់ខ្លួនជនសង្ស័យចោរប្លន់ទាំងនេះ កម្លាំងនគរបាលធ្វើឡើងរយៈពេល០៣ថ្ងៃចាប់ពីថ្ងៃទី១៩រហូតដល់ថ្ងៃទី២១ ខែធ្នូ ឆ្នាំ២០២២ នៅក្នុងភូមិសាស្ត្រខណ្ឌកំបូល ខណ្ឌពោធិ៍សែនជ័យនិងខណ្ឌដង្កោ រាជធានីភ្នំពេញ ក្រោយពីក្រុមជនសង្ស័យបានធ្វើសកម្មភាពអំពើប្លន់ម៉ូតូបានសម្រេចជាបន្តបន្ទាប់រហូត០៤ករណីនៅក្នុងភូមិសាស្ត្រខណ្ឌកំបូល ។
លោកវរសេនីយ៍ឯក ហង្ស មុនី អធិការនគរបាលខណ្ឌកំបូល ប្រាប់ឱ្យដឹងថា ការបង្ក្រាបចាប់ខ្លួនជនសង្ស័យអំពើប្លន់ប្រដាប់អាវុធបានសម្រេចនៅពេលនេះ គឺកម្លាំងនគរបាលខណ្ឌកំបូលអនុវត្តតាមបទបញ្ជាពីសំណាក់ ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដែលបានបញ្ជាលោកឧត្តមសេនីយ៍ទោ សុង លី ស្នងការរងទទួលផែនការងារព្រហ្មទណ្ឌ និងលោកឧត្តមសេនីយ៍ទោ ហម វ៉ាន់ថា ស្នងការរងទទួលដឹកនាំបញ្ជាពង្រឹងអធិការដ្ឋាននគរបាលខណ្ឌកំបូល បានដឹកនាំបញ្ជាផ្ទាល់កងកម្លាំងអធិការដ្ឋាននគរបាលខណ្ឌកំបូលសហការជាមួយ និងកម្លាំងជំនាញពាក់ព័ន្ធ ក៏ឈានទៅដល់ការបង្ក្រាបក្រុមចោរប្លន់ទាំងនេះបានជាបន្តបន្ទាប់តាមរយៈវិធានការស្រាវជ្រាវស៊ើបអង្កេតជំនាញព្រហ្មទណ្ឌនិងមានការចូលរួមសហការផ្តល់ព័ត៌មានពីប្រជាពលរដ្ឋនៅក្នុងមូលដ្ឋានតាមរយៈការចុះធ្វើរដ្ឋបាល ។
លោកអធិការនគរបាលខណ្ឌកំបូល ប្រាប់ឱ្យដឹងទៀតថា ជនសង្ស័យទាំង០៩នាក់រាល់ធ្វើសកម្មភាពប្លន់ម៉ូតូបានសម្រេចទាំង០៤ករណី នៅក្នុងភូមិសាស្ត្រខណ្ឌកំបូលកន្លងមក គឺក្រុមជនល្មើសបានធ្វើសកម្មភាពដោយជិះម៉ូតូដេញតាមម៉ូតូជនរងគ្រោះនៅតាមផ្លូវសាធារណៈមានសភាពស្ងាត់ជ្រងំ ហើយពួកគេបានយកកាំភ្លើងខ្លីភ្ជង់ជនរងគ្រោះឱ្យឈប់ម៉ូតូ រួចធាក់ផ្តួលម៉ូតូវាយជនរងគ្រោះដោយកាំភ្លើង ប្លន់យកម៉ូតូជិះគេចខ្លួនបាត់តែម្តង ។
ជនសង្ស័យមានឈ្មោះ១-ជា ដារ៉ូ ភេទប្រុស អាយុ១៨ឆ្នាំ មុខរបរកម្មករសំណង់ ស្នាក់នៅភូមិផ្សារអង្គ សង្កាត់ត្រពាំងក្រសាំង ខណ្ឌពោធិ៍សែនជ័យ ។ ២-យុន វិសាល ហៅប៉េ ភេទប្រុស អាយុ១៨ឆ្នាំ គ្មានមុខរបរពិតប្រាកដ រស់នៅភូមិត្រពាំងទួល សង្កាត់កំបូល ខណ្ឌកំបូល ។ ៣-រៀម ចាន់ ភេទប្រុស អាយុ១៨ឆ្នាំ គ្មានមុខរបរពិតប្រាកដ ស្នាក់នៅភូមិ៦ សង្កាត់ចោមចៅ២ ខណ្ឌពោធិ៍សែនជ័យ ។ ៤-ស្រៀង វណ្ណៈ ហៅម៉ៅ ភេទប្រុស អាយុ១៨ឆ្នាំ គ្មានមុខរបរពិតប្រាកដ ស្នាក់នៅភូមិ៦ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។ ៥-ទិត្យ វីឡា ភេទប្រុស អាយុ១៨ឆ្នាំ គ្មានមុខរបរពិតប្រាកដ រស់នៅភូមិ ៣ សង្កាត់ចោមចៅ២ ខណ្ឌពោធិ៍សែនជ័យ ។ ៦-សុខ ទៀង ដាវីដ ភេទប្រុស អាយុ១៨ឆ្នាំ គ្មានមុខរបរពិតប្រាកដ ស្នាក់នៅភូមិ៣ សង្កាត់ចោមចៅ២ ខណ្ឌពោធិ៍សែនជ័យ ប្រើប្រាស់គ្រឿងញៀន ។ ៧-សម្បត្តិ ដា ហៅឆាង ភេទប្រុស អាយុ១៨ឆ្នាំ មុខរបរសន្តិសុខ ស្នាក់នៅភូមិតំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ ។ ៨-ឈឹង គឹមឆន ភេទប្រុស អាយុ១៨ឆ្នាំ គ្មានមុខរបរពិតប្រាកដ រស់នៅភូមិត្រាំដោក សង្កាត់ពងទឹក ខណ្ឌដង្កោ និង៩-អុន សំអុល ហៅខ្លី ភេទប្រុស អាយុ១៨ឆ្នាំ គ្មានមុខរបរពិតប្រាកដ រស់នៅភូមិអំបិល សង្កាត់កំបូល ខណ្ឌកំបូល ។
លោកវរសេនីយ៍ឯក ហង្ស មុនី អធិការនគរបាលខណ្ឌកំបូលប្រាប់ឱ្យដឹងទៀតថា ក្រោយពីការបង្ក្រាបចាប់ខ្លួនជនសង្ស័យគឺពួកគេបានឆ្លើយសារភាពទទួលកំហុសដែលខ្លួនបានប្រព្រឹត្តពិតប្រាកក្នុងអំពើប្លន់ម៉ូតូ០៤ករណី ដោយម៉ូតូប្លន់បានសម្រេចយកទៅលក់បានប្រាក់ចែកគ្នាក្នុងម្នាក់ៗពី៣០ដុល្លារ ទៅ៥០ដុល្លារ យកទៅផឹកស៊ីចាយវាយអស់។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងជំនាញព្រហ្មទណ្ឌអធិការដ្ឋាននគរបាលខណ្ឌកំបូលកំពុងកសាងសំណុំរឿងចាប់បញ្ជូនទៅតុលាការចាត់ការតាមផ្លូវច្បាប់៕
