ឧត្តមសេនីយ៍ត្រី ខាត់ សារ័ត្ន ដឹកនាំកិច្ចប្រជុំប្រចាំខែវិច្ឆិកា ដើម្បីបូកសរុបលទ្ធផលការងារដែលសម្រេចបាន និងលើកទិសដៅអនុវត្តការងារបន្ត
ភ្នំពេញ៖ ប៉ុស្តិ៍នគរបាលច្រកទ្វារព្រំដែនបាវិត នាព្រឹកថ្ងៃសៅរ៍ ៩រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែធ្នូ ឆ្នាំ២០២២ បានបើកកិច្ចប្រជុំប្រចាំខែវិច្ឆិកា ដើម្បីបូកសរុប លទ្ធផលការងារដែលសម្រេចបាន និងលើកទិសដៅអនុវត្តការងារបន្ត សំរាប់ខែបន្ទាប់ ក្រោមការដឹកនាំរបស់ លោកឧត្តមសេនីយ៍ត្រី ខាត់ សារ័ត្ន នាយប៉ុស្តិ៍នគរបាលច្រកទ្វារព្រំដែនអន្តរជាតិបាវិត ព្រមទាំងមានការចូលរួមពីនាយរងប៉ុស្តិ៍-នាយផ្នែក-នាយរងផ្នែក និងមន្ត្រីមួយចំនួន ដែលមានរបៀបវារៈមានដូចជា ផ្នែកសេនាធិការ អានរបាយការណ៍ ស្តីពីលទ្ធផលការងារដែលបានអនុវត្តខែវិច្ឆិកា កន្លងទៅ ជូនអង្គប្រជុំជ្រាប និងសេចក្តីរាយការណ៍ផ្សេងៗ របស់ផ្នែកនីមួយៗ ព្រមទាំងមានការចូលរួមមតិស្តីពីបញ្ហាប្រឈមមួយចំនួនរបស់លោកនាយរងប៉ុស្តិ៍ផងដែរ ។
បន្ទាប់មកលោកប្រធានអង្គប្រជុំ បានបូកសរុបលទ្ធផលការងារ និងមតិណែនាំបន្ថែមដល់អង្គប្រជុំ ដែលមានខ្លឹមសារដូចជា ផ្សព្វផ្សាយស្មារតីអង្គប្រជុំ របស់នាយកដ្ឋានច្រកទ្វារទី២ កាលពីថ្ងៃទី១៣ ខែធ្នូ ឆ្នាំ២០២២ សាមគ្គីភាពផ្ទៃក្នុងឱ្យបានល្អ ជំរុញឱ្យមន្ត្រីក្នុងអង្គភាពទាំងអស់បន្តការយកចិត្តទុកដាក់បំពេញការងារ និងគោរពវិន័យឱ្យកាន់តែប្រសើរពីមួយថ្ងៃទៅមួយថ្ងៃ ជាពិសេសប្រកាន់ខ្ជាប់ នូវវិន័យរបស់កងកម្លាំងនគរបាលជាតិ លេខ០០៦ ត្រូវស្លៀកពាក់ឯកសណ្ឋានឱ្យបានត្រឹមត្រូវ ត្រូវគោរពគំនាប់គ្នាទៅវិញទៅមកតាមឋានានុក្រម និងត្រូវគោរពពេលវេលាបំពេញការងារឱ្យបានល្អប្រសើរត្រូវមាន អាកប្បកិរិយា ទន់ភ្លន់ សុភាពរាបសារ ប៉ុន្តែ ម៉ឺងម៉ាត់ ក្នុងការបំរេីការងារជំនាញជូនភ្ញៀវជាតិ និងអន្តរជាតិ ចូល-ចេញប្រទេស ពង្រឹងលើការគ្រប់គ្រងត្រួតពិនិត្យមុខសញ្ញាអន្តោប្រវេសន៍អោយបានច្បាស់លាស់ និងត្រឹមត្រូវ ត្រូវបញ្ចូលទិន្ន័យនិងប្រើប្រាស់ប្រព័ន្ធ CBMS អោយអស់ពីលទ្ធភាព មន្រ្តីទាំងអស់ត្រូវតែចូលរួមរៀនភាសាបរទេស ជាពិសេសភាសាវៀតណាម ត្រូវធ្វើរបាយការណ៍បញ្ចូលទិន្ន័យភ្ញៀវចូល-ចេញឱ្យបានត្រឹមត្រូវ និងគ្រប់ចំនួន ពង្រឹងលើការត្រួតពិនិត្យទប់ស្កាត់ បទល្មើសឆ្លងដែនខុសច្បាប់ ការរត់ពន្ធមនុស្សឆ្លងដែន គ្រឿងញៀន ការធ្វើចរាចររូបិយវត្ថុក្លែងក្លាយ វត្ថុបុរាណ និងអាវុធខុសច្បាប់ជាដើម តាមបណ្តាគោលដៅស្របតាមខ្សែបន្ទាត់ព្រំដែនដែលប៉ុស្តិ៍គ្រប់គ្រង បន្តថែរក្សាអនាម័យរស់នៅស្អាត ហូបចុកស្អាត អនុវត្តតាមវិធានសុខាភិបាល និងហាត់កីឡាដើម្បីសុខភាព ៕
