ឯកឧត្ដម ហេង រតនា ទទួលជួបពិភាក្សាការងារជាមួយ ទីប្រឹក្សារបស់អង្គការNPA មកពីប្រទេសន័រវេស្ស និង ប្រធានអង្គការ NPA ប្រចាំកម្ពុជា

ភ្នំពេញ៖ ឯកឧត្ដម ហេង រតនា អគ្គនាយកស៊ីម៉ាក់ នាថ្ងៃទី៦ ខែធ្នូ ឆ្នាំ២០២២ បានទទួលជួបពិភាក្សាការងារជាមួយលោកស្រី Eva Veble ទីប្រឹក្សារបស់អង្គការNPA មកពីប្រទេសន័រវេស្ស និងលោក Rune Dale-Andresen ប្រធានអង្គការ NPA ប្រចាំកម្ពុជា និងសហការី។

ជំនួបពិភាក្សានេះ ផ្តោតសំខាន់លើការពង្រឹងកិច្ចសហការបន្ថែមទៀតក្នុងវិស័យសកម្មភាពមីន និងកិច្ចប្រតិបត្តិការលើគម្រោងបោសសម្អាតគ្រាប់បែកចង្កោម និងសំណល់សង្គ្រាមនៅកម្ពុជា រវាងអង្គភាពCMAC និងអង្គការNPA ។​ ជាពិសេសពង្រឹងយន្តការគ្រប់គ្រងគំរោងជំនួយពីរដ្ឋាភិបាលសហរដ្ឋអាមេរិកដែលផ្តល់មកអង្គភាពសុីម៉ាក់តាមរយ:អង្គការNPA។

សូមបញ្ជាក់ថា ចាប់តាំងពីឆ្នាំ២០០៩ ដល់ឆ្នាំ២០២២នេះ សហរដ្ឋអាម៉េរិកបានផ្តល់ជំនួយមកអង្គភាពCMAC តាមរយៈអង្គការNPA មានចំនួនថវិកា២៩.៩២៥.៥៥៨ ដុល្លារអាម៉េរិក​ (ជិត៣០លានដុល្លារ) និងសម្រេចបានលទ្ធផល ប្រតិបតិ្តការបោសសម្អាតផ្ទៃដី បានចំនួនជាង ២២,២០០​ហិចតា រុករកឃើញនិងកម្ទេចចោលគ្រាប់មីន និងយុទ្ធភណ្ឌមិនទាន់គ្រប់ប្រភេទសរុបចំនួន ២២១.៧៩៣គ្រាប់ និងបានអបរំផ្សព្វផ្សាយយល់ដឹងពីមីនបានចំនួន ១.៣០៤.២៦០នាក់។​

សូមរំលឹកបញ្ជាក់បន្ថែម​ រដ្ឋាភិបាលសហរដ្ឋអាមេរិក បានសំរេចផ្តល់ជំនួយដល់អង្គភាពស៊ីម៉ាក់ សំរាប់ការបោសសំអាត តំបន់គ្រាប់បែកចង្កោមមានថវិកាចំនួនជាង ៦.៥លានដុល្លារ សំរាប់ឆ្នាំ២០២២-២០២៥ ៕