នាយឧត្តមសេនីយ៍ ពិន ពិសិដ្ឋ អញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពីការងារអន្តោប្រវេសន៍

ភ្នំពេញ៖ ឯកឧត្តម នាយឧត្តមសេនីយ៍ ពិន ពិសិដ្ឋ អគ្គនាយករង នៃអគ្គនាយកដ្ឋានអន្តោប្រវេសន៍ តំណាង ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ នាល្ងាចថ្ងៃអង្គារ ៦ កើត ខែមិគសិរ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹង ថ្ងៃទី២៩ ខែវិច្ឆិកា ឆ្នាំ២០២២នេះ បានអញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពីការងារអន្តោប្រវេសន៍សម្រាប់តាមបណ្តាប៉ុស្តិ៍ច្រកទ្វារទ្វេភាគី ច្រកទ្វារតំបន់ព្រំដែន និងច្រកទ្វារកំពង់ផែសមុទ្រ ព្រមទាំងមានការអញ្ជើញចូលរួមពីសំណាក់លោកឧត្តមសេនីយ៍ឯក សារិន សារីណូ ប្រធាននាយកដ្ឋានច្រកទ្វារទី២ និងលោកឧត្តមសេនីយ៍ទោ វឌ្ឍនៈ មង្គល ប្រធាននាយកដ្ឋានច្រកទ្វារទី១ រួមជាមួយលោកឧត្តមសេនីយ៍ វរសេនីយ៍ ជាអនុប្រធាននាយកដ្ឋាន និងនាយការិយាល័យជំនាញ ចំណុះនាយកដ្ឋានច្រកទ្វារទី១ និងទី២ ផងដែរ។

វគ្គបណ្តុះបណ្តាលនេះត្រូវបានរៀបចំដោយផ្តោតលើជំនាញគ្រប់គ្រងច្រកទ្វារ កត់ត្រាទិន្នន័យអ្នកដំណើរ និងមធ្យោបាយបញ្ចូលទៅក្នុងប្រព័ន្ធគ្រប់គ្រងទិន្នន័យ ដើម្បីអនុវត្តឱ្យបានឯកភាពគ្នាជាមួយច្រកទ្វារអន្តរជាតិ និងច្រកទ្វារព្រំដែនអន្តរជាតិ ស្របតាមច្បាប់ស្តីពីអន្តោប្រវេសន៍ និងបទដ្ឋានគតិយុត្តពាក់ព័ន្ធ ដែលប្រធានបទនេះធ្វើបទបង្ហាញដោយក្រុមគ្រូបង្គោល នៃអគ្គនាយកដ្ឋានអន្តោប្រវេសន៍រួមមាន៖ លោកឧត្តមសេនីយ៍ទោ សួន ភក្តី និងលោកឧត្តមសេនីយ៍ទោ សំ ដារ៉ា ព្រមទាំងមានសិក្ខាកាមចូលរួមចំនួន ៤២រូប ក្នុងនោះមកពីប៉ុស្តិ៍ច្រកទ្វារព្រំដែនទ្វេភាគីចំនួន ១២រូប ប៉ុស្តិ៍ច្រកទ្វារតំបន់ព្រំដែនចំនួន ១៩រូប ច្រកទ្វារកំពង់ផែសមុទ្រចំនួន ០៤រូប និងសិក្ខាកាមមកពីការិយាល័យជំនាញពាក់ព័ន្ធនៃស្នងការដ្ឋាននគរបាលខេត្តចំនួន ០៧រូប រួមជាមួយមន្ត្រីការិយាល័យជំនាញនៃនាយកដ្ឋានច្រកទ្វារទី១ និងទី២ មួយចំនួនទៀតផងដែរ៕