នាយករដ្ឋមន្ត្រីជប៉ុន ប្តេជ្ញាធ្វើការងារឲ្យជិតស្និទ្ធជាមួយអាស៊ាន ដើម្បីធានាបានសន្តិភាព នៅក្នុងតំបន់

ភ្នំពេញ៖ ឯកឧត្ដម ហ្វូមីអូ គីស៊ីដា នាយករដ្ឋមន្ត្រីជប៉ុន នាថ្ងៃទី១២ ខែវិច្ឆិកា ឆ្នាំ២០២២ បានថ្លែងប្តេជ្ញាចិត្តធ្វើការជិតស្និទ្ធជាមួយថ្នាក់ដឹកនាំអាស៊ាន ដើម្បីធានាបានសន្តិភាព នៅក្នុងតំបន់។

ឯកឧត្ដមនាយករដ្ឋមន្ត្រីជប៉ុនក៏បានថ្លែងបែបនេះ នាពេលអញ្ជើញជាសហប្រធាន ជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ានប្តូរវេន បើកកិច្ចប្រជុំអាស៊ាន.ជប៉ុន លើកទី២៥ [25th ASEAN . Japan Summit] រៀបចំ នៅសណ្ឋាគារសុខាភ្នំពេញ។

ឯកឧត្ដមនាយករដ្ឋមន្ត្រីជប៉ុនក៏បានគូសបញ្ជាក់យ៉ាងដូច្នេះថា [ខ្ញុំសូមប្រកាសពីទស្សនវិស័យ {គីស៊ីដា} គឺសម្រាប់តែសន្តិភាព។ ខ្ញុំសូមប្តេជ្ញាធ្វើការឲ្យយ៉ាងជិតស្និទ្ធជាមួយថ្នាក់ដឹកនាំអាស៊ាន ដើម្បីពិភាក្សាឱ្យបានស៉ីជម្រៅពីនិតិវិធីនិងធានាឲ្យបាននូវសន្តិភាព នៅក្នុងតំបន់ផងដែរ]។

ឯកឧត្ដមក៏បានបន្តទៀតថា ដើម្បីរក្សា និងពង្រឹងសណ្តាប់ធ្នាប់អន្តរជាតិឲ្យសេរី និងបើកចំហបានប្រទេសជប៉ុន បានគាំទ្រដល់ការរួបរួម និងមជ្ឈភាពរបស់អាស៊ាន។ នេះបើតាមប្រសាសន៍ឯកឧត្ដម គីស៊ីដា ជប៉ុនក៏បានសម្តែងការគាំទ្រចំពោះ ទស្សនវិស័យរបស់អាស៊ានស្តីពីឥណ្ឌូ.ប៉ាស៉ីហ្វិក [AOIP] ។

សូមគូសបញ្ជាក់ថា មេដឹកនាំអាស៊ាន និងជប៉ុន ក៏បានបង្កើតទំនាក់ទំនងការសន្ទនាក្រៅផ្លូវការលើកដំបូងនៅក្នុងឆ្នាំ១៩៧៣ ក្រោយមកទៀតក៏ត្រូវបានបង្កើតឱ្យក្លាយជាផ្លូវការ នាខែមីនា ឆ្នាំ១៩៧៧ ដោយមានការកោះប្រជុំជាវេទិកាអាស៊ាន.ជប៉ុន។

ចាប់តាំងពីពេលនោះមក ក៏មានការរីកចម្រើនគួរឲ្យកត់សម្គាល់ លើកគ្រប់វិស័យ រួមមានទាំងសន្តិសុខ .នយោបាយ .កិច្ចសហប្រតិបត្តិការសេដ្ឋកិច្ច.ហិរញ្ញវត្ថុ និងសង្គម.វប្បធម៌។

រីឯប្រទេសជប៉ុន ក៏បានចូលជាសមាជិកលើសន្ធិសញ្ញាមិត្តភាព និងកិច្ចសហប្រតិបត្តិការនៅអាស៉ីអាគ្នេយ៍ [TAC] នាខែកក្កដា ឆ្នាំ២០០៤ ហើយក៏បានក្លាយជាដៃគូសន្ទនា ដែលតែងតាំងដោយអគ្គរដ្ឋទូតប្រចាំនៅអាស៊ានរបស់ខ្លួន នៅលេខាធិការដ្ឋានអាស៊ាន នៅឯទីក្រុងហ្សារកាតា។ បេសកកម្មរបស់ប្រទេសជប៉ុនប្រចាំអាស៊ាន ត្រូវបានបង្កើតឡើងនាថ្ងៃទី២៦ ខែឧសភា ឆ្នាំ២០១១។

បើយោងតាមទិន្នន័យរបស់អាស៊ាន នាឆ្នាំ២០២១ បានឲ្យដឹងថា ពាណិជ្ជកម្មទ្វេភាគីរវាងអាស៊ាន និងជប៉ុន បានឈានឡើងដល់ ២៤០.២ពាន់លានដុល្លារអាមេរិក គឺកើនឡើង ១៧.២ភាគរយ ពីមួយឆ្នាំទៅមួយឆ្នាំ។ លំហូរអ្នកវិនិយោគផ្ទាល់ពីបរទេស [FDI] មកពីប្រទេសជប៉ុន នាឆ្នាំ២០២១ មានចំនួន ១២.០ពាន់លានដុល្លារអាមេរិក ក៏កើនឡើង ៣.៥ភាគរយពីមួយឆ្នាំទៅមួយឆ្នាំ ដែលនេះ​ធ្វើឲ្យ​ប្រទេស​ជប៉ុន​ក្លាយជា​ដៃគូពាណិជ្ជកម្មទី៣ ​របស់​ប្រទេសអាស៊ាន ។។