ម៉ាលី៖ នៅថ្ងៃទី១០ ខែវិច្ឆិកា ឆ្នាំ២០២២ នៅទីក្រុមហ្គាវ នៃសាធារណរដ្ឋម៉ាលី លោកវរសេនីយ៍ឯក លាង សុវណ្ណារ៉ា មេបញ្ជាការកងអនុសេនាធំកម្ទេចគ្រាប់ ក្នុងបេសកកម្មអង្គការសហប្រជាជាតិនៅសាធារណរដ្ឋម៉ាលី និងមានការចូលរួមពី កងកម្លាំងមួកខៀវ ចិន បង់ក្លាដេស ហ្សក់ដានី ដែលមានទីបញ្ជាការយោភូមិភាគខាងកើត- MINUSMA បាននាំយកដំណោយមនុស្សធម៌របស់ស្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកនាយកមជ្ឈមណ្ឌលជាតិរក្សាសន្តិភាព ទៅចែកជូនដល់កុមារកំព្រាជាង៣០០នាក់ នៅទីប្រជុំជនហ្គាវ ប្រទេសម៉ាលី ដែលកំពុងមានតម្រូវការចាំបាច់សម្រាប់ការសិក្សារបស់ពួកគេ។
លោកវរសេនីយ៍ឯក លាង សុវណ្ណារ៉ា បានឱ្យដឹងពីប្រទេសម៉ាលី មកថា អំណោយដែលត្រូវចែកជូនដល់កុមារកំព្រានោះ គឺមាន សៀវភៅសរសេរ ៣០០ក្បាល, ប៊ិច ៣០០ដើម, ខ្មៅដៃ ៣០០ដើម, ប្រដាប់ចិតខ្មៅដៃ ២២៤ដើម, សំលៀកបំពាក់កីទ្បា ៥៣ឈុត, បាល់ទះ ចំនួន៣, បាល់ទាត់ចំនួន២, កាហ្វេ ១០០០កញ្ជប់, តែបៃតង ៧៤កញ្ចប់ និងអំបិល ១០០គីទ្បូក្រាម។
លោក សុវណ្ណារ៉ា បានឱ្យដឹងទៀតថា ក្នុងរយៈពេល១ឆ្នាំកន្លងមកនេះ កងកម្ទេចគ្រាប់មិនទាន់ផ្ទុះ ក្នុងបេសកកម្មរក្សាសន្តិភាពរបស់អង្គការសហប្រជាជាតិ នៅសាធារណរដ្ឋម៉ាលី តែងតែ បានរៀបចំចូលរួមការងារផ្តល់អំណោយមនុស្សធម៌នេះជាប្រចាំ ដូចជា ផ្តល់ស្បៀងអាហារ ថ្នាំពេទ្យ និងសម្ភារសិក្សា តាមរយៈការិយាល័យទំនាក់ទំនងយោធាស៊ីវិល (G9 Office) នៃទីបញ្ជាការ យោធភូមិភាគរបស់ MINUSMA និងមានក្រុមគ្រូពេទ្យនារី ចុះជួយពិនិត្យ ពិគ្រោះជំងឺ ដល់ប្រជាជនក្នុងទីប្រជុំជនហ្គាវ ប្រទេសម៉ាលី និងចុះអប់រំផ្សព្វផ្សាយយល់ដឹងពីគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះដល់ប្រជាពលរដ្ឋក្នុងតំបន់ផងដែរ៕
