ក្រសួងអប់រំ រៀបចំសិក្ខាសាលាពិគ្រោះយោបល់ ថា្នក់តំបន់លើរបាយការណ៍ស្រាវជ្រាវ ស្តីពីការបាត់បង់ការសិក្សាលើផ្នែកអំណាន និងគណិតវិទ្យារបស់សិស្ស នៅកម្រិតបឋមសិក្សាអំឡុងពេលកូវីដ១៩ ក្នុងតំបន់អាស៊ាន

ភ្នំពេញ​​៖ នាថ្ងៃទី២៦ ខែតុលា ឆ្នាំ២០២២ នាយកដ្ឋានគោលនយោបាយ នៃក្រសួងអប់រំ យុវជន និងកីឡា បានរៀបចំសិក្ខាសាលាពិគ្រោះយោបល់លើសេចក្តីព្រាងរបាយការណ៍ស្រាវជ្រាវថ្នាក់តំបន់ស្តីពី “ការបាត់បង់ការសិក្សាលើផ្នែកអំណាន និងគណិតវិទ្យារបស់សិស្សនៅកម្រិតបឋមសិក្សាអំឡុងពេលរីករាលដាលនៃជំងឺកូវីដ-១៩ ក្នុងតំបន់អាស៊ាន” ក្រោមអធិបតីភាពឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា និង លោក Koji Hachiyama ប្រធានប្រតិបត្តិនៃវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) និងមានការចូលរួមពីនាយកដ្ឋានជំនាញនៃក្រសួងអប់រំ យុវជន និងកីឡា បណ្តារដ្ឋសមាជិកអាស៊ាន អង្គភាពថ្នាក់ក្រោមជាតិ ព្រមទាំងតំណាងដៃគូអភិវឌ្ឍ និងភាគីពាក់ព័ន្ធ។

សិក្ខាសាលាពិគ្រោះយោបល់នេះមានគោលបំណងប្រមូលធាតុបន្ថែម និងផ្តល់សុពលភាព លើសេចក្តីព្រាងរបាយការណ៍ស្រាវជ្រាវស្តីពី “ការបាត់បង់ការសិក្សាលើផ្នែកអំណាន និងគណិតវិទ្យារបស់សិស្សនៅកម្រិតបឋមសិក្សាអំឡុងពេលរីករាលដាលនៃជំងឺកូវីដ-១៩ ក្នុងតំបន់អាស៊ាន” ដោយប្រព្រឹត្តទៅរយៈពេល ០២ថ្ងៃ គឺចាប់ពីថ្ងៃទី២៦ ដល់ថ្ងៃទី២៧ ខែតុលា ឆ្នាំ២០២២ នៅសណ្ឋាគារអង្គរប៉ារ៉ាឌី ខេត្តសៀមរាប ក្រោមការឧបត្ថម្ភពីវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ីអាគ្នេយ៍ និងអាស៊ីបូព៌ា (ERIA)។

គួរបញ្ជាក់ថាការសិក្សាថ្នាក់តំបន់ស្តីពីការបាត់បង់ការសិក្សាលើផ្នែកអំណាន និងគណិតវិទ្យារបស់សិស្សនៅកម្រិតបឋមសិក្សាអំឡុងពេលរីករាលដាលនៃជំងឺកូវីដ-១៩ ក្នុងតំបន់អាស៊ានត្រូវបានផ្តួចផ្តើម និងដឹកនាំដោយក្រសួងអប់រំ យុវជន និងកីឡា (MOEYS) ដោយមានការគាំទ្រផ្នែកហិរញ្ញវត្ថុពីវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA)។

លទ្ធផលនៃសិក្សានេះនឹងរួមចំណែកដល់ការកែលម្អគោលនយោបាយ យុទ្ធសាស្ត្រនិងអន្តរាគមន៍ដែលមានស្រាប់របស់រដ្ឋសមាជិកអាស៊ាន ដើម្បីស្តារការសិក្សាឡើងវិញ និងធានាគុណភាពនៃការអភិវឌ្ឍធនធានមនុស្សក្នុងតំបន់អាស៊ាននាពេលអនាគត៕