ស្នងការខេត្តបន្ទាយមានជ័យ ប្រជុំផ្សព្វផ្សាយ សេចក្តីណែនាំស្តីពី ការគ្រប់គ្រងវត្តមានជនបរទេស ដល់ម្ចាស់ក្រុមហ៊ុនកាស៊ីណួ រោងចក្រសហគ្រាស

ភ្នំពេញ៖ ដើម្បីពង្រឹងការអនុវត្តច្បាប់ស្តីពីអន្តោប្រវេសន៍ សំដៅបង្កើនការគ្រប់គ្រងវត្តមាននៃការស្នាក់នៅរបស់ជនបរទេសឲ្យមានប្រសិទ្ធិភាពខ្ពស់ ធានាការពារសន្តិសុខ សណ្តាប់ធ្នាប់សារណៈនិងសុវត្ថិភាពសង្គមក៏ដូចជាសុវត្ថិភាពផ្ទាល់របស់ជនបរទេសគ្រប់រូបដែលស្នាក់នៅក្នុងព្រះរាជាណាចក្រកម្ពុជា ស្នងការដ្ឋាននគរបាលខេត្តបន្ទាយមានជ័យ នៅថ្ងៃទី១៧ ខែតុលា ឆ្នាំ២០២២ បានរៀបចំប្រជុំផ្សព្វផ្សាយសេចក្តីណែនាំរបស់ក្រសួងមហាផ្ទៃ ស្តីពីការគ្រប់គ្រងវត្តមានជនបរទេស ក្នុងព្រះរាជាណាចក្រកម្ពុជា ដល់តំណាងម្ចាស់ក្រុមហ៊ុនកាស៊ីណួចំនួន៣២ទីតាំង រោងចក្រសហគ្រាសចំនួន០៥ទីតាំងនិងតំណាងម្ចាស់សណ្ឋាគារចំនួន១៥ទីតាំង នៅក្នុងក្រុងប៉ោយប៉ែត ខេត្តបន្ទាយមានជ័យ ។

ពិធីនេះប្រព្រឹត្តទៅក្រោមអធិបតីភាពលោក ឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្តបន្ទាយមានជ័យ និងមានការចូលរួមពី លោកឧត្តមសេនីយ៍ត្រី វរសេនីយ៍ ស្នងការរង លោកនាយ នាយរងការិយាល័យជំនាញ ពាក់ព័ន្ធ លោក អធិការ អធិការរង លោកនាយផ្នែក នាយប៉ុស្តិ៍នគរបាលរដ្ឋ នៃអធិការដ្ឋាននគរបាល ក្រុងប៉ោយប៉ែត ។

លោកឧត្តមសេនីយ៍ទោ សិទ្ធិ ឡោះ បានថ្លែងថា៖ ថ្មីៗនេះរាជរដ្ឋាភិបាល ក៏ដូចជាក្រសួងមហាផ្ទៃ បានចេញនូវបទបញ្ជាយ៉ាងក្តៅគគុក ស្តីពីការគ្រប់គ្រងជនបរទេស ជាអន្តោប្រវេសន៍ ដែលមកស្នាក់នៅប្រកបអាជីវកម្មផ្សេងៗទាំងស្របច្បាប់ទាំងមិនស្របច្បាប់ គិតឡើងទាំងការផ្តល់លិខិតឆ្លងដែន និងវីហ្សា កាងារ ។ថ្វីត្បិតតែខេត្តបន្ទាយមានជ័យយើងមិនទាន់មានដូចបណ្តាខេត្តផ្សេងៗ ទន្ទឹមនឹងនោះបញ្ហានេះគឺយើងត្រូវតែធ្វើការរឹតបន្តឹងនិងធ្វើការណែនាំបន្ថែម ដូច្នេះស្នងការដ្ឋានបានអញ្ជើញ លោក លោកស្រីដែលជាតំណាងម្ចាស់ម្ចាស់កាស៊ីណូ រោងចក្រសហគ្រាស និងម្ចាស់សណ្ឋាគារ ដើម្បីមករំលឹកបន្ថែម ជម្រុញកិច្ចការការងារប្រតិបត្តិការរបស់នគរបាលអន្តោប្រវេសន៍យើងឈានដល់ការគោរពច្បាប់ទាំងអស់ គ្នា ។

លោកឧត្តមសេនីយ៍ ស្នងការ បានបញ្ជាក់ថា៖ ការគោរពច្បាប់នេះ អាស្រ័យអនុវត្តទៅបានឲ្យមានភាពល្អប្រសើរ ត្រូវមានការសហការពីលោក លោកស្រី ជាម្ចាស់តំណាងឲ្យក្រុមហ៊ុនទាំងអស់ ដែលមាន ទីតាំងនៅក្នុងខេត្តបន្ទាយមានជ័យ ធ្វើយ៉ាងមេចបំពេញទៅតាមទម្រង់នៃច្បាប់ ដែលមានសេចក្តីណែនាំ របស់ក្រសួងមហាផ្ទៃ និងប្រកាសរបស់អន្តរក្រសួង ។

លោកឧត្តមសេនីយ៍ទោ សិទ្ធិ ឡោះ ក៏បានណែនាំដល់តំណាងឬម្ចាស់ក្រុមហ៊ុនទាំងអស់នោះ១/- ម្ចាស់ឬអ្នកកាន់កាប់លំនៅឋានគ្រប់ប្រភេទ ត្រូវរាយការណ៍អំពីវត្តមានជនបរទេសដែលបានចូលមកស្នាក់នៅក្នុងទីតាំងរបស់ខ្លួន ដល់ប៉ុស្តិ៍នគរបាលរដ្ឋបាល ឃុំ សង្កាត់ នៅក្នុងមូលដ្ឋាននោះ តាមគំរូរបាយការណ៍ឬប្រព័ន្ធបច្ចេកវិទ្យាព័ត៌មាន សម្រាប់ការគ្រប់គ្រងវត្តមានជនបរទេស ដែលរៀបចំដោយអគ្គនាយកដ្ឋានអន្តោប្រវេសន៍ មិនឲ្យលើសពីរយៈពេល២៤ម៉ោង ។ក្នុងករណីម្ចាស់ឬអ្នកកាន់កាប់លំនៅឋានគ្រប់ប្រភេទជាជនបរទេស ត្រូវរាយការណ៍បន្ថែមអំពីវត្តមានរបស់ខ្លួនឯង និងសមាជិក ជាជនបរទេសក្នុងបន្ទុក ក្នុងរយៈពេលមិនលើសពីរយៈពេល២៤ម៉ោងដូចគ្នា ។២/- ខ្លឹមសារសេចក្តីរាយការណ៍ ត្រូវបញ្ជាក់ច្បាស់អំពីរយៈពេលស្នាក់នៅ និងឧប្បទ្ទវហេតុនានាលើជនបរទេស ដើម្បីកម្លាំងសមត្ថកិច្ចមានវិធានការសមស្របទាន់ពេលវេលា ។៣/-ចំពោះម្ចាស់ឬអ្នកកាន់កាប់លំនៅឋានណាមិនរាយការណ៍ពីវត្តមាននៃការស្នាក់នៅរបស់ជនបរទេសតាមការកំណត់នៃច្បាប់និងបទដ្ឋានគតិយុត្តនានា នឹងត្រូវផ្តន្ទាទោសតាមបទ ប្បញ្ញតិដែលមានចែងក្នុងច្បាប់ស្តីពីអន្តោប្រវេសន៍និងច្បាប់ផ្សេងៗទៀតនៃព្រះរាជាណាចក្រកម្ពុជា។
ក្រោយពីទទួលបាននូវការផ្សព្វផ្សាយនេះ ក្នុងនាមស្នងការដ្ឋាននគរបាលខេត្តមានជំនឿជឿជាក់ថា លោក លោកស្រី ជាតំណាងម្ចាស់ក្រុមហ៊ុន កាស៊ីណូ រោងចក្រសហគ្រសនិងសណ្ឋាគារ ចូលរួមសហការជាមួយនគរបាលអន្តោប្រវេសន៍ ដើម្បីធ្វើយ៉ាងណាយើងគ្រប់គ្រងជនបរទេសឲ្យបានច្បាស់លាស់និងទប់ស្កាត់ចំពោះជនបរទេសមកស្នាក់នៅដោយខុសច្បាប់ ក្នុងមូលដ្ឋានខេត្តបន្ទាយមានជ័យនេះ ៕