ឯកឧត្តម ផាន អូន ចូលរួមកិច្ចប្រជុំ ប្រធានស្ថាប័នប្រកួតប្រជែង លើកទី៣

ភ្នំពេញ៖ ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជា​អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៅថ្ងៃទី១៧ ខែតុលា ឆ្នាំ២០២២ បានអញ្ជើញចូលរួមកិច្ចប្រជុំ ប្រធានស្ថាប័នប្រកួតប្រជែងលើកទី៣ (3rd ASEAN Heads of Competition Agencies’ Meeting) ដែលបានប្រព្រឹត្តឡើងតាមរយៈប្រព័ន្ធបញ្ជូន​សំឡេង និងរូបភាព (MS Teams)។

កិច្ចប្រជុំនេះ​ត្រូវបានដឹកនាំដោយ លោកស្រី Nor Hashimah Taib តំណាងគណៈកម្មាធិការប្រកួតប្រជែងប៊្រុយណេដារូសាឡឹម និងក្នុងនាមជាប្រធានដឹកនាំកិច្ចប្រជុំ AHCA។

នៅក្នុងកិច្ចប្រជុំប្រធានស្ថាប័នប្រកួតប្រជែងលើកទី៣នេះ អង្គប្រជុំបានពិភាក្សាលើរបៀបចំនួន ៤រួមមាន៖
(១). កិច្ចពិភាក្សាអំពីផែនការការងារនៃការចរចារសម្រាប់​កិច្ចព្រមព្រៀងក្របខណ្ឌអាស៊ាន ស្តីពីការប្រកួតប្រជែង (Workplan for the ASEAN Framework Agreement on Competition Negotiations) ក្នុងគោលបំណងដើម្បី​បញ្ចប់​ការចរចានៅពាក់កណ្តាលឆ្នាំ ២០២៤ ។

កិច្ចព្រមព្រៀងក្របខណ្ឌអាស៊ានស្តីពីការប្រកួតប្រជែងគឺ ជាគំនិតផ្តួចផ្តើមមួយ ក្នុងចំណោមសមិទ្ធិផលអាទិភាព​សេដ្ឋកិច្ច (Priority Economic Deliverables–PEDs) ទាំង១៧ របស់កម្ពុជាក្នុងនាមជាប្រធានអាស៊ានឆ្នាំ២០២២ ក្រោមមូលបទ “អាស៊ានរួមគ្នាធ្វើ-ដោះស្រាយ បញ្ហាប្រឈមទាំងអស់គ្នា (ASEAN A.C.T.: Addressing Challenges Together)”។

គួរបញ្ជាក់ផងដែរថា ក្នងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន (AEM) លើកទី៥៤ ក៏មានការដាក់សម្ពោធឱ្យចាប់ផ្តើមនូវការចរចាសម្រាប់កិច្ចព្រមព្រៀងក្របខណ្ឌអាស៊ាន ស្តីពីការប្រកួតប្រជែង (AFAC – ASEAN Framework Agreement on Competition Negotiation) ដែលកិច្ចព្រមព្រៀង AFAC នេះ នឹងក្លាយជាកិច្ចព្រមព្រៀងថ្នាក់តំបន់ ក្នុងការជួយសម្រួល​ដល់កិច្ចសហប្រតិបត្តិការអន្តរជាតិនិងការសម្របសម្រួល លើគោលនយោបាយនិងច្បាប់ស្តីពីការប្រកួតប្រជែង ក្នុងចំណោមសមាជិកអាស៊ានទាំងអស់។

(២). កិច្ចពិភាក្សាលើការបញ្ចូលនូវសេចកី្តថ្លែងការណ៍រួមរបស់​ប្រធានស្ថាប័នប្រកួតប្រជែងស្តីពីការរក្សាគោលនយោបាយប្រកួតប្រជែងក្នុងបរិបទនៃការស្តារសេដ្ឋកិច្ច ទៅក្នុងសេក្តីថ្លែងការណ៍របស់ប្រធាននៃកិច្ចប្រជុំកំពូលអាស៊ានលើកទី៤០ និង៤១។

(៣). កិច្ចពិភាក្សាលើវឌ្ឍនភាពនៃសកម្មភាពដែលជាអាទិភាព (Key Deliverables) របស់ក្រុមជំនាញការប្រកួតប្រជែង (ASEAN Experts Group on Competition)។

(៤). ពិភាក្សាអំពីកាលបរិច្ឆេទនៃកិច្ចប្រជុំប្រធានស្ថាប័ន​ប្រកួតប្រជែង AANZFTA ដែលនឹងប្រព្រឹត្តទៅនៅខែកុម្ភៈ ឆ្នាំ 2023 ប្រទេសអូស្ត្រាលី ៕