មជ្ឈមណ្ឌលជាតិរក្សាសន្តិភាព បញ្ចប់វគ្គហ្វឹកហ្វឺនលើជំនាញបោសសម្អាតមីនវគ្គទី១ ដល់កងទ័ពជើងចំនួន២៣៤នាក់

ភ្នំពេញ៖ មជ្ឈមណ្ឌលជាតិរក្សាសន្តិភាព បានរៀបចំបិទវគ្គលើជំនាញបោសសម្អាតមីនមនុស្សធម៌, ផ្ទេរប្រគល់មធ្យោបាយសម្ភារៈបោសសម្អាតមីន​ និងជំនាញបើកបររថយន្តធុនធ្ងន់ ដល់កងអនុសេនាតូចបោសសម្អាតមីនចំនួន៩កង សរុបចំនួន២៣៤នាក់ ចំណុះឱ្យបញ្ជាការដ្ឋានកងទ័ពជើងគោក នៅថ្ងៃទី៧ ខែតុលា ឆ្នាំ២០២២នេះ នៅសាលាហ្វឹកហ្វឺនកងកម្លាំងរក្សាសន្តិភាពពុជាតិ នាស្រុកភ្នំស្រួច ខេត្តកំពង់ស្ពឺ ក្រោមអធិបតីភាពដ៏ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។

ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីន អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានថ្លែងថា វគ្គហ្វឹកហ្វឺនបោសសម្អាតមីនមនុស្សធម៌ ដែលឈានដល់វគ្គបញ្ចប់ជាស្ថាពរនាពេលនេះ បានចាប់ផ្តើមឡើង នៅថ្ងៃទី១ ខែសីហា ឆ្នាំ២០២២ ដល់កងអនុសេនាតូចបោសសម្អាតមីនចំនួន៩កង សរុបចំនួន២៣៤នាក់ មកពីអង្គភាពចំណុះបញ្ជាការកងទ័ពជើងគោក នៃកងយោធពលខេមរភូមិន្ទ រួមមាន បញ្ជាការដ្ឋានវិស្វកម្ម បញ្ជាការដ្ឋានរថក្រោះ បញ្ជាការដ្ឋានកាំភ្លើងធំ បញ្ជាការដ្ឋានទ័ពពិសេស កងពលតូចអន្តរាគមន៍លេខ៧០ កងពលតូចអន្តាគមន៍លេខ១៤ កងពលតូចអន្តរាគមន៍លេខ១ យោធភាគទី៣ និងទី៥។

ឯកឧត្តម នាយឧត្តមសេនីយ៍ ថ្លែងទៀតថា រយៈពេលនៃវគ្គហ្វឹកហ្វឺនលើជំនាញនេះ​គឺមានរយៈជាង២ខែ ទៅលើជំនាញហ្វឹកហ្វឺនបច្ចេកទេសបើកបរ, បច្ចេកទេសបោសសម្អាតមីន, ជំនាញកំទេចគ្រឿងផ្ទុះ, បណ្តុះបណ្តាលនាយទាហានជាមេបញ្ជាការកងអនុសេនាតូចបោសសម្អាតមីន, ការប្រើប្រាស់ប្រព័ន្ធGPS, សិក្សាស្រាវជ្រាចំការមីន និងបច្ចេកទេសសង្គ្រោះបឋមក្នុងចំការមីន។

ឯកឧត្តម សែម សុវណ្ណនី ឱ្យដឹងថា ក្រោយបញ្ចប់វគ្គហ្វឹកហ្វឺន មជ្ឈមណ្ឌលជាតិ ក៏បានបំពាក់សម្ភារៈ បោសសម្អាតមីនចំនួន៩មុខបន្ថែមទៀត ពីលើចំនួនដែលបានអនុម័តពីសម្តេច ត្រឹម៦មុខ សរុបចំនួន១៥មុខ ដែលក្នុង១កង ទទួលបាន រថយន្តដឹកជញ្ជូនធុនធំ១គ្រឿង, រថយន្តពេទ្យ១គ្រឿង មានបំពាក់ឧបករណ៍ឆក់បេះដូង ម៉ាស៊ីអ៊ុកស៊ីហ្សែន និងបរិក្ខារពេទ្យអម សរុបចំនួន៤២មុខ, ម៉ាស៊ីនរាវមីន១២គ្រឿង, សម្ភារៈបោសសម្អាតមីន១២សម្រាប់, ម៉ាស៊ីនចុចបំផ្ទុះ២គ្រឿង, ខ្សែនិងរ៉ូឡូ១ដុំ, ឧបករណ៍ធ្វើបទបង្ហាញ៤សម្រាប់, អាវការពារ១២សម្រាប់, GPS១គ្រឿង, ឯកសណ្ឋានប្រយុទ្ធ៥២សម្រាប់, ខ្សែប្រឺតែល២៦ខ្សែ, ខ្សែសាំងទារុង២៦ខ្សែ, មួកចំនួន២៦, ស្បែកជើង២៦គូរ, ឃីតនិងបរិក្ខារគ្រូពេទ្យ១សម្រាប់។

សម្តេចពិជ័យសេនា​ ទៀ បាញ់ បានថ្លែងថា រាជរដ្ឋាភិបាល បានប្តេជ្ញាចិត្តខ្ពស់ ក្នុងការយកចិត្តទុកដាក់ដោះស្រាយបញ្ហាដែលបង្កឡើងដោយសារមីន និងសំណល់ជាតិផ្ទុះពីសង្គ្រាម ដោយចាត់ទុកសកម្មភាពមីន ជាអាទិភាពមួយដ៏សំខាន់ក្នុងគោលដៅអនុវត្តផែនការយុទ្ធសាស្ត្រអភិវឌ្ឍជាតិ។ ជាក់ស្តែងផែនការយុទ្ធសាស្ត្រជាតិសកម្មភាពមីន “២០១៨-២០២៥” បានឆ្លើយតបទៅនឹងបញ្ហាប្រឈមទាំងឡាយ ដែលតម្រូវឱ្យរាជរដ្ឋាភិបាលត្រូវដោះស្រាយ ដើម្បីអភិវឌ្ឍនិងផ្តល់សុវត្ថិភាពដល់ប្រជាជនគ្រប់រូប។

សូមបញ្ជាក់ឱ្យដឹងដែរថា កងអនុសេនាតូចបោសសម្អាតមីនទាំង៩កង​ ដែលបានបញ្ចប់វគ្គហ្វឺកហ្វឺនបោសសម្អាតមីន នៅថ្ងៃនេះ នឹងចុះទៅធ្វើការបោសសម្អាតមីនជាក់ស្តែងនៅក្នុងភូមិសាស្ត្រ ស្រុកភ្នំស្រួច ខេត្តកំពង់ស្ពឺ ក្រោមគម្រោងសម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម”៕