បញ្ហាយេនឌ័រមិនមែនគ្រាន់តែ ផ្ដោតលើវិសមភាពរវាងបុរសនិងស្រ្ដី តែក៏គិតគូរលើការគាំទ្រ និងបង្កឱកាសដល់កុមារ ទទួលបានសិទ្ធិនិងផលប្រយោជន៍

ភ្នំពេញ៖ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន បានលើកឡើងថា បញ្ហាយេនឌ័រមិនមែនគ្រាន់តែ ផ្ដោតលើវិសមភាពរវាងបុរស និងស្រ្ដី តែក៏គិតគូរផងដែរលើការគាំទ្រ និងបង្កឱកាសដល់កុមារ ទទួលបានសិទ្ធិ និងផលប្រយោជន៍។

ក្រុមការងារស្រ្តី យុវជន យេនឌ័រ និងកុមារ នៃក្រសួងបរិស្ថាន កាលថ្ងៃទី៣០ ខែកញ្ញា ឆ្នាំ២០២២ បានរៀបចំសិក្ខាសាលាបូកសរុបលទ្ធផលការងារស្រ្តី យុវជន យេនឌ័រ និងកុមារ ក្នុងវិស័យបរិស្ថានឆ្នាំ២០២២ និងទិសដៅអនុវត្តការងារឆ្នាំ២០២៣ ក្រោមអធិបតីភាព លោកជំទាវ ម៉ុម ថានី រដ្ឋលេខាធិការ លោកជំទាវ ព្រំ សុភី អនុរដ្ឋលេខាធិការ រួមនឹងថ្នាក់ដឹកនាំ សមាជិក សមាជិកា ក្រុមការងារ នៅទីស្ដីការក្រសួងបរិស្ថាន។

ថ្លែងទៅកាន់អង្គពិធីនាឱកាសនោះ លោកជំទាវ ម៉ុម ថានី បានសម្ដែងនូវការកោតសរសើរ ចំពោះក្រុមការងារ ទាំងអស់ ដែលមានគណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ ក្រសួងបរិស្ថាន ក្រុមការងារបច្ចេកទេសយេនឌ័រ គណៈកម្មការសម្របសម្រួលបច្ចេកទេសកុមារ តូចវិស័យបរិស្ថាន និងសហភាពសហព័ន្ធយុវជនវិស័យបរិស្ថាន ដែលបានខិតខំប្រឹងប្រែងសម្រេចបានលទ្ធផល ការងារល្អប្រសើរ ក្នុងរយៈពេលជិតមួយឆ្នាំកន្លងមក តាមរយៈកិច្ចខិតខំប្រឹងប្រែងអនុវត្តការងារតាមជំនាញ។

លោកជំទាវបានគូសបញ្ជាក់បន្ថែមថា ក្រុមការងារទាំងបួន (ស្រ្តី យុវជន យេនឌ័រ និងកុមារ) បានសហការគ្នាល្អ ក្នុងការអនុវត្តការងារ និងបានឱ្យតម្លៃគ្នាទៅវិញទៅមកដែលជាគុណប្រយោជន៍ដើម្បីសម្រេចគោលដៅរួម។

ជាមួយគ្នានេះដែរ លោកជំទាវ ព្រំ សុភី អនុរដ្ឋលេខាធិការ បានថ្លែងថា បញ្ហាយេនឌ័រមិនមែនគ្រាន់តែ ផ្ដោតលើវិសមភាពរវាងបុរស និងស្រ្ដីតែក៏គិតគូរផងដែរលើការគាំទ្រ និងបង្កឱកាសដល់កុមារា កុមារី យុវជន និងក្រុមងាយរងគ្រោះ ឱ្យទទួល បានសិទ្ធិ និងផលប្រយោជន៍គ្រប់ៗគ្នា។ ជាក់ស្ដែង ក្រសួងបរិស្ថានបានរៀបចំ យុទ្ធសាស្រ្តបញ្ជ្រាបយេនឌ័រក្នុងវិស័យបរិស្ថាន ចំនួន៣លើក រួចមកហើយចាប់តាំងពីឆ្នាំ២០០៩មក៕