លោកជំទាវកិត្តិសង្គហបណ្ឌិត ឃួន សុដារី អនុប្រធានទី២ រដ្ឋសភា អញ្ជើញចូលរួមកាន់បិណ្ឌវេនទី១១ នៅវត្តគិរីរតនារាម ស្ថិតនៅស្រុកលើកដែក

ភ្នំពេញ៖ លោកជំទាវកិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា និងជាតំណាងរាស្ត្រមណ្ឌលខេត្តកណ្តាល ព្រមទាំង ឯកឧត្តម លោកជំទាវ លោក លោកស្រី ជាក្រុមការងារចុះជួយស្រុកលើកដែក នៅព្រឹកថ្ងៃពុធទី២១ ខែកញ្ញា ឆ្នាំ២០២២ បានអញ្ជើញចូលរួមកាន់បិណ្ឌវេនទី១១ នៅវត្តគិរីរតនារាម ហៅវត្តកំពង់ភ្នំក្នុង ស្រុកលើកដែក ខេត្តកណ្តាល។

នៅក្នុងឱកាសអញ្ជើញកាន់បិណ្ឌព្រឹកនេះ លោកជំទាវកិត្តិសង្គហបណ្ឌិត ឃួន សុដារី បានបូជាផ្កាភ្ញី ទៀនធូប ចំពោះព្រះរតនត្រ័យ និងមានចង្ហាន់បិណ្ឌបាត្រ បច្ច័យ ទេយ្យទាន សម្រាប់ប្រគេនព្រះសង្ឃ ដើម្បីឧទ្ទិសទៅដល់វិញ្ញាណក្ខន្ធជីដូនជីតា បុព្វការីជន ញាតិការ ទាំង៧សន្តាន ដែលបានចែកឋាន ទៅតាមប្រពៃណីសាសនាខ្មែរ។

ជាមួយគ្នានោះ លោកជំទាវបានប្រគេនបច្ច័យ ចំនួន ២២លាន ២៧មុឺនរៀល និង៥០០ដុល្លារ ដល់វត្ត និងបានជូនថវិកាដល់ចាស់ព្រឹទ្ធចារ្យ លោកយាយ លោកតា ព្រមទាំងពុទ្ធបរិស័ទជាច្រើននាក់ផងដែរ។

លោកជំទាវសុំឱ្យមគ្គផលដែលកើតចេញពីការធ្វើបុណ្យថ្ងៃនេះ សូមឱ្យជាតិខ្មែរទាំងមូល បានជួបតែសេចក្តីសុខក្សេមក្សាន្តជានិច្ចនិរន្ត និងពុទ្ធបរិស័ទដែលបានចូលរួមជួបតែសេចក្តីសុខ សេចក្តីចម្រើន និងបានបុណ្យស្មើៗគ្នា។

ទន្ទឹមនឹងនោះ លោកជំទាវកិត្តិសង្គហបណ្ឌិត ឃួន សុដារី ក៏បានរំលឹកពីការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានធ្វើឱ្យប្រទេសកម្ពុជាមានសុខសន្តិភាព និងស្ថិរភាពនយោបាយល្អ។ ដោយសារកត្តាសុខសន្តិភាពនេះហើយ ទើបធ្វើឱ្យប្រជាពលរដ្ឋទូទាំងប្រទេសមានឱកាសបានប្រារព្ធពិធីកាន់បិណ្ឌនេះឡើង។

សូមជម្រាបថា ជារៀងរាល់ឆ្នាំ លោកជំទាវកិត្តិសង្គហបណ្ឌិត ឃួន សុដារី តែងតែមកប្រារព្ធពិធីបុណ្យប្រពៃណីជាតិនេះ នៅតាមវត្តអារាមនានាទាំងក្នុងរាជធានី និងក្នុងស្រុកលើកដែកយ៉ាងខ្ជាប់ខ្ជួន។

បុណ្យភ្ជុំបិណ្ឌ ដែលជាពិធីបុណ្យមួយដ៏ធំក្នុងចំណោមពិធីបុណ្យផ្សេងៗនៅកម្ពុជា ដែលប្រជាជនខ្មែរនាំគ្នាប្រារព្ធឡើងមិនដែលអាក់ខានឡើយរៀងរាល់ឆ្នាំ គឺចាប់ពីថ្ងៃ១រោច ខែភទ្របទ រហូតដល់ថៃ្ងទី១៥រោច ខែភទ្របទ ដែលមានរយៈពេល១៥ថៃ្ង។ សម្រាប់បុណ្យភ្ជុំបិណ្ឌ នៅឆ្នាំនេះ គឺចាប់ផ្ដើមដាក់បិណ្ឌចាប់ពីថ្ងៃទី១១ ខែកញ្ញា រហូតដល់ថ្ងៃទី២៤ និងថ្ងៃភ្ជុំបិណ្ឌនៅថ្ងៃទី២៥ ខែកញ្ញា៕