ឯកឧត្តមកិត្តិសេដ្ឋាបណ្ឌិត ជាម យៀប ញ្ជើញដឹកនាំកិច្ចប្រជុំពិនិត្យអពីវឌ្ឍនភាពការងារត្រៀមរៀបចំមហាសន្និបាតអន្តរសភាអាស៊ាន (AIPA) លើកទី៤៣

ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងជាប្រធានគណៈកម្មការៀបចំមហាសន្និបាតអន្តរសភាអាស៊ាន(AIPA) លើកទី៤៣ នៅរសៀលថ្ងៃទី៣០ ខែសីហា ឆ្នាំ២០២២ បានដឹកនាំកិច្ចប្រជុំមួយជាមួយក្រុមការងារគ្រប់ផ្នែក ក្នុងការត្រៀមលក្ខណៈរៀបចំមហាសន្និបាតអន្តរសភាអាស៊ាន (AIPA) លើកទី៤៣ ដែលសភានៃព្រះរាជាណាចក្រកម្ពុជា នឹងធ្វើជាម្ចាស់ផ្ទះរៀបចំមហាសន្និបាតនេះ នៅខែវិច្ឆិកា ឆ្នាំ២០២២ខាងមុខនេះ។

កិច្ចប្រជុំនេះមានការអញ្ជើញចូលរួមពី លោកជំទាវ កិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា ឯកឧត្តម លោកជំទាវ សមាជិក សមាជិកា នៃគណៈកម្មការរៀបចំ ប្រធាន អនុប្រធាន សមាជិក សមាជិកា នៃអនុគណៈកម្មការនានា គណៈប្រតិភូសភាកម្ពុជា ក្រុមប្រឹក្សាយោបល់ តំណាងក្រសួងស្ថាប័នពាក់ព័ន្ធ ព្រមទាំងមន្ត្រីនៃលេខាធិការដ្ឋានជាតិអាយប៉ា-កម្ពុជា។

គោលបំណងនៃកិច្ចប្រជុំនាពេលនេះ មានដូចខាងក្រោម៖
ទី១. ការងារត្រៀមរៀបចំកិច្ចប្រជុំរវាងប្រមុខដឹកនាំអាស៊ាន និងអាយប៉ា នាកិច្ចប្រជុំកំពូលអាស៊ានលើកទី៤០ និង៤១(The ASEAN-AIPA Leaders Interface Meeting During ASEAN Submit 40-41)
ទី២. ពិនិត្យវឌ្ឍនភាពការងារសម្រាប់ត្រៀមរៀបចំមហាសន្និបាតអន្តរសភាអាស៊ាន លើកទី៤៣ (The 43rd GA AIPA)។