លោក ដូណាល់ ត្រាំ៖ អ៉ីស្រាអែល និងលីបង់បានយល់ព្រមពន្យារបទឈប់បាញ់រវាងអ៉ីស្រាអែល និងហេសបូឡា រយៈពេល៣សប្ដាហ៍បន្តទៀត

វ៉ាស៊ីនតោន៖ បើតាមការចេញផ្សាយដោយទីភ្នាក់ងារ សារព័ត៌មាន Reuters ប្រធានាធិបតីអាមេរិក លោក ដូណាល់ ត្រាំ បាននិយាយថាអ៉ីស្រាអែល និងលីបង់បានយល់ព្រមពន្យារបទឈប់បាញ់រវាងអ៉ីស្រាអែល និងហេសបូឡា រយៈពេល៣សប្ដាហ៍បន្តទៀត បន្ទាប់ពីមានកិច្ចចរចានៅឯសេតវិមានកាលពីថ្ងៃព្រហស្បតិ៍ ទី២៣ ខែមេសា ឆ្នាំ២០២៦។

លោក ត្រាំ បានឱ្យដឹងថាជំនួបរវាងឯកអគ្គរដ្ឋទូតអ៉ីស្រាអែល និងលីបង់នៅក្នុងសហរដ្ឋអាមេរិកបានប្រព្រឹត្តទៅដោយរលូន។ នេះជាកិច្ចប្រជុំកម្រិតខ្ពស់លើកទី២រវាង ប្រទេសទាំង២ចាប់តាំងពីសប្ដាហ៍មុនមក។ បទឈប់បាញ់រយៈពេល១០ថ្ងៃរវាងអ៉ីស្រាអែល និងក្រុមហេសបូឡាដែលបានចូលជាធរមានកាលពីថ្ងៃសុក្រសប្ដាហ៍មុន នឹងត្រូវអស់សុពលភាពនៅថ្ងៃចន្ទសប្ដាហ៍ក្រោយ។

ក្នុងការបង្ហោះមួយលើបណ្ដាញទំនាក់ទំនងសង្គម លោក ត្រាំ បានគូសបញ្ជាក់ដូច្នេះថា «សហរដ្ឋអាមេរិកកំពុង ធ្វើការជាមួយលីបង់ក្នុងគោលដៅជួយពួកគេការពារខ្លួនពីក្រុមហេសបូឡា»។

លោក ត្រាំបន្ថែមថារូបលោកកំពុងទន្ទឹងរង់ចាំជួបជាមួយនាយករដ្ឋមន្ត្រីអ៉ីស្រាអែល លោក Benjamin Netanyahu និងប្រធានាធិបតីលីបង់ លោក Joseph Aoun ក្នុងពេលអនាគតដ៏ខ្លីខាងមុខ៕