អាមេរិក ប្រកាសចាប់ខ្លួនអតីតអ្នកបើកយន្តហោះចម្បាំងរបស់កងទ័ពអាកាសមួយរូប ក្រោមការចោទប្រកាន់ថា បានផ្តល់ការបណ្តុះបណ្តាលដល់យោធាចិនដោយគ្មានការអនុញ្ញាត

បរទេស៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី២៦ ខែកុម្ភៈ ឆ្នាំ២០២៦ ក្រសួងយុត្តិធម៌អាមេរិក បានប្រកាសពីការចាប់ខ្លួនអតីតអ្នកបើកយន្តហោះចម្បាំងរបស់កងទ័ពអាកាសមួយរូប ក្រោមការចោទប្រកាន់ថា អាកាសយានិកម្នាក់នោះ បានផ្តល់ការបណ្តុះបណ្តាលដល់យោធាចិន ដោយគ្មានការអនុញ្ញាត។

ក្រសួងយុត្តិធម៌អាមេរិក បាននិយាយក្នុងសេចក្តីថ្លែងការណ៍ថា លោក Gerald Brown អាយុ៦៥ឆ្នាំ ត្រូវបានចាប់ខ្លួននៅរដ្ឋ Indiana កាលពីថ្ងៃពុធសប្តាហ៍នេះ ក្រោយទើបត្រឡប់មកពីប្រទេសចិន ជាទីដែលរូបលោកបានស្ថិតនៅតាំងពីខែធ្នូ ឆ្នាំ២០២៣។

លោក Brown រងការចោទប្រកាន់ពីបទគប់គិតជាមួយជនជាតិបរទេស ក្នុងការផ្តល់ការបណ្តុះបណ្តាលស្តីពីយន្តហោះចម្បាំង ដល់អាកាសយានិកនៃកងទ័ពអាកាសរបស់ប្រទេសចិន ដោយពុំមានអាជ្ញាបណ្ណចាំបាច់ពីក្រសួងការបរទេសអាមេរិក។

គួរបញ្ជាក់ថា លោក Gerald Brown បានបំពេញអាជីពក្នុងជួរកងទ័ពអាកាសអាមេរិក អស់រយៈពេល២៤ឆ្នាំ។ អំឡុងពេលនោះ រូបលោកធ្លាប់បញ្ជាអង្គភាពសំខាន់ៗ ដែលមានការទទួលខុសត្រូវពាក់ព័ន្ធអាវុធនុយក្លេអ៊ែរ ធ្លាប់ដឹកនាំបេសកកម្មប្រយុទ្ធដោយផ្ទាល់ ហើយ ធ្លាប់បម្រើជាគ្រូបង្រៀនបើកយន្តហោះ ពាក់ព័ន្ធយន្តហោះចម្បាំងចម្រុះប្រភេទ។ លោក Brown បានចូលនិវត្តន៍ពីយោធា កាលពី ឆ្នាំ១៩៩៦ ហើយបានធ្វើការជាអ្នកបើកយន្តហោះដឹកទំនិញ។ ប៉ុន្តែក្រោយមក លោកបានចាប់ផ្តើមតួនាទីជា អ្នកទទួលកិច្ចសន្យា បង្ហាត់អាកាសយានិកអាមេរិក បើកយន្តហោះចម្បាំង A-10 និង F-35៕