ឯកឧត្តម ឆែម សាវុធ ដឹកនាំកិច្ចប្រជុំពិភាក្សាការងារ និងលើកទិសដៅអនុវត្តបន្ត របស់ក្រុមការងារចម្រុះសម្រាប់ពង្រឹងការគ្រប់គ្រងមណ្ឌលអប់រំកែប្រែ និងពន្ធនាគាររាជធានី ខេត្ត

ភ្នំពេញ៖ នៅថ្ងៃទី១៤ ខែមករា ឆ្នាំ២០២៦នេះ ឯកឧត្តម ឆែម សាវុធ រដ្ឋលេខាធិការ ក្រសួងមហាផ្ទៃ និងជាប្រធានក្រុមការងារចម្រុះសម្រាប់ពង្រឹងការគ្រប់គ្រងមណ្ឌលអប់រំកែប្រែ និងពន្ធនាគាររាជធានី ខេត្ត របស់គណៈកម្មការទទួលបន្ទុកអនុវត្តវិធានការរដ្ឋបាល នៃគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ បានអញ្ជើញដឹកនាំកិច្ចប្រជុំពិភាក្សាការងារ និងលើកទិសដៅអនុវត្តបន្ត របស់ក្រុមការងារចម្រុះសម្រាប់ពង្រឹងការគ្រប់គ្រងមណ្ឌលអប់រំកែប្រែ និងពន្ធនាគាររាជធានី ខេត្ត របស់គណៈកម្មការទទួលបន្ទុកអនុវត្តវិធានការរដ្ឋបាល នៃគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់។

កិច្ចប្រជុំនេះដែរ ក៏មានការអញ្ជើញចូលរួមពី ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ និងអ្នកពាក់ព័ន្ធជាច្រើនរូបទៀត នៅទីស្ដីការក្រសួងមហាផ្ទៃ។

ឆ្លៀតក្នុងឱកាសនោះដែរ ឯកឧត្ដម រដ្ឋលេខាធិការ បានមានប្រសាសន៍ណែនាំ និងផ្ដាំផ្ញើសំខាន់ៗមួយចំនួនដែលមានខ្លឹមសារ ដូចខាងក្រោម៖

– ត្រូវរៀបចំធ្វើផែនការសកម្មភាពសម្រាប់ឆ្នាំ២០២៦ របស់ក្រុមការងារចម្រុះ សម្រាប់ពង្រឹងការងារនៅតាមមណ្ឌលអប់រំកែប្រែ និងពន្ធនាគាររាជធានី ខេត្ត។

– អគ្គនាយកដ្ឋានពន្ធនាគារ ត្រូវពិនិត្យរៀបចំឯកសារ លិខិតបទដ្ឋានពាក់ព័ន្ធសម្រាប់ ផ្សព្វផ្សាយណែនាំពាក់ព័ន្ធគ្រឿងញៀន ពង្រឹងវិន័យ និងមនសិការវិជ្ជាជីវៈដល់មន្រ្តី នៅតាម មណ្ឌលអប់រំកែប្រែ និងពន្ធនាគាររាជធានី ខេត្ត។

– ក្រុមការងារចុះតាមមណ្ឌលអប់រំកែប្រែ ត្រូវបំពេញការងារឱ្យបានចប់ត្រឹមដំណាច់ខែមីនា ឆ្នាំ២០២៦ ដោយផ្តោតលើការផ្សព្វផ្សាយដល់មន្ត្រី ដើម្បីមានមូលដ្ឋានបូកសរុបរបាយការណ៍ជូនគណៈកម្មការទទួលបន្ទុក អនុវត្ត វិធានការរដ្ឋបាល។

– ក្រុមការងារលេខាធិការដ្ឋាន ត្រូវបន្តទាក់ទងយករបាយការណ៍តាមទម្រង់ដែលបានកំណត់ ពីបណ្តារដ្ឋបាលរាជធានី ខេត្ត បាន គ្រប់ចំនួនដើម្បីធ្វើការបូកសរុបឱ្យបានទាន់ពេលវេលា៕