តាកែវ៖ លោក យង់ សុវឌ្ឍនា អភិបាលរងខេត្តតាកែវ និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្ត បានណែនាំយ៉ាងដាច់ណាត់ដល់អាជ្ញាធរក្រុង-ស្រុកទាំង ១០ ឲ្យបង្កើន និងពង្រឹងសកម្មភាពចុះអប់រំ ផ្សព្វផ្សាយពីបញ្ហាគ្រឿងញៀន ឲ្យបានខ្លាំងក្លា និងទូលំទូលាយបន្ថែមទៀតដល់ប្រជាពលរដ្ឋគ្រប់ស្រទាប់ ជាពិសេសយុវជន និងសិស្សនិស្សិត។
ការណែនាំនេះធ្វើឡើងក្នុងឱកាសដែលលោកដឹកនាំកិច្ចប្រជុំបូកសរុបការអនុវត្តការងារប្រយុទ្ធប្រឆាំងគ្រឿងញៀន លើកទី១០ ប្រចាំនព្វមាស ឆ្នាំ២០២៥ នៅសាលប្រជុំរដ្ឋបាលខេត្ត នៅព្រឹកថ្ងៃទី០៩ ខែតុលា ឆ្នាំ២០២៥។
លោក អភិបាលរងខេត្ត បានសង្កត់ធ្ងន់ថា បញ្ហាគ្រឿងញៀនគឺជា បញ្ហាសង្គមដ៏រ៉ាំរៃ និងស្មុគស្មាញ ដែលបង្កផលវិបាកជាច្រើនដល់សង្គមជាតិ និងមនុស្សទូទៅ។ ដូច្នេះការផ្សព្វផ្សាយឲ្យពួកគាត់យល់កាន់តែច្បាស់ពីផលប៉ះពាល់នៃគ្រឿងញៀនគឺជារឿងសំខាន់បំផុតដើម្បីការពារប្រជាពលរដ្ឋ ជាពិសេសយុវជនមិនឲ្យធ្លាក់ខ្លួនក្នុងអន្លង់អបាយមុខនេះ។
លោក យង់ សុវឌ្ឍនា ក៏បានជំរុញឲ្យអាជ្ញាធរមូលដ្ឋានត្រូវបន្ត ចុះត្រួតពិនិត្យជាប្រចាំ នៅតាមទីតាំងនានា និងធ្វើ កិច្ចសន្យា ជាមួយម្ចាស់អាជីវកម្ម ដូចជាផ្ទះសំណាក់ ក្លឹបកម្សាន្ត ហាងខារ៉ាអូខេ តាមច្រកទ្វារព្រំដែន និងកន្លែងកម្សាន្តផ្សេងៗទៀត ដើម្បីឲ្យពួកគេចូលរួមសហការយ៉ាងសកម្មជាមួយសមត្ថកិច្ចក្នុងការ បង្ការ ទប់ស្កាត់ និងបង្រ្កាប បទល្មើសគ្រឿងញៀន និងបទល្មើសផ្សេងៗទៀត។សកម្មភាពនេះមានគោលដៅកាត់បន្ថយ និងលុបបំបាត់រាល់សកម្មភាពលួចលាក់ កែច្នៃសារធាតុគីមីផ្សំ ការចរាចរណ៍ ការប្រើប្រាស់ និងការជួញដូរគ្រឿងញៀនខុសច្បាប់ នៅតាមមូលដ្ឋាននានា។
លោក អភិបាលរងខេត្ត បានគូសបញ្ជាក់ជាចុងក្រោយថា ការដោះស្រាយបញ្ហាគ្រឿងញៀនបាន ទាមទារឲ្យមាន ការចូលរួមសហការគ្នា ចាប់ពីបុគ្គលម្នាក់ៗ គ្រួសារ រហូតដល់អាជ្ញាធរមូលដ្ឋាន សំដៅធ្វើយ៉ាងណាឈានទៅ លុបបំបាត់គ្រឿងញៀនឲ្យអស់ពីក្នុងសហគមន៍ របស់យើង៕
