ក្រសួងបរិស្ថាន ចាត់ការតាមនីតិវិច្បាប់តម្រូវឱ្យក្រុមហ៊ុន កែច្នៃផ្លែឈើគ្រប់ប្រភេទ ស្ថិតនៅភូមិវាលធំ ឃុំយាយម៉ៅពេជ្រនិល បញ្ឈប់ការបញ្ចេញសំណល់រាវ ចេញពីទីតាំងរបស់ក្រុមហ៊ុនជាបន្ទាន់
ភ្នំពេញ៖ ក្រសួងបរិស្ថាននៅថ្ងៃទី០៣ ខែកក្កដា ឆ្នាំ២០២៥ បានចាត់ការតាមនីតិវិច្បាប់តម្រូវឱ្យ ក្រុមហ៊ុន ZHONGBAO (FUJIAN) FOOD SCIENCE & TECHNOLOGY CO., LTD. បញ្ឈប់ការបញ្ចេញសំណល់រាវ ចេញពីទីតាំងរបស់ក្រុមហ៊ុនជាបន្ទាន់។
សូមបញ្ជាក់ថា ក្រុមហ៊ុន ZHONGBAO (FUJIAN) FOOD SCIENCE & TECHNOLOGY CO., LTD. ជាប្រភេទរោងចក្រ កែច្នៃផ្លែឈើគ្រប់ប្រភេទ ស្ថិតនៅភូមិវាលធំ ឃុំយាយម៉ៅពេជ្រនិល (បំបែកចេញពីឃុំត្រែងត្រយឹង) ស្រុកភ្នំស្រួច ខេត្តកំពង់ស្ពឺ។ ក្រុមហ៊ុន បានបង្កការបំពុលបរិស្ថាន ពីសកម្មភាពបញ្ចេញ សំណល់រាវ បំពុលទឹកអូរចោត ដែលក្រសួងបរិស្ថាន បានរកឃើញ នៅថ្ងៃទី៧ ខែឧសភា ឆ្នាំ២០២៥ ដោយល្មើសទៅនឹងមាត្រា១៥៩ មាត្រា ១៦០ មាត្រា២៨៧ មាត្រា៦៨៩ មាត្រ៨៤៤ មាត្រា៨៤៥ មាត្រា៨៤៦នៃក្រមបរិស្ថាននិងធនធានធម្មជាតិ, មាត្រា៤ មាត្រា៦ នៃអនុក្រឹត្យស្តីពីការត្រួតពិនិត្យការបំពុលទឹក, មាត្រា៩ថ្មី នៃអនុក្រឹត្យស្តីពីការកែសម្រួល មាត្រា៤ មាត្រា៩ មាត្រា១១ មាត្រា១២ មាត្រា១៣ មាត្រា១៧ និងតារាងឧបសម្ព័ន្ធ២ ឧបសម្ព័ន្ធ២ ឧបសម្ព័ន្ធ៣ ឧបសម្ព័ន្ធ៤ និងឧបសម្ព័ន្ធ៥ នៃអនុក្រឹត្យស្តីពីការ ត្រួតពិនិត្យការបំពុលទឹក។
ជាមួយគ្នានេះ ដើម្បីការពារប្រភពទឹកសាធារណៈ និងទប់ស្កាត់ការបំពុលទឹកប៉ះពាល់ដល់ សុខភាពសាធារណៈ និងបរិស្ថានឱ្យខាងតែបាន ក្រសួងបរិស្ថានតម្រូវឱ្យក្រុមហ៊ុនត្រូវបញ្ឈប់ការបញ្ចេញ សំណល់រាវចេញពីទីតាំងក្រុមហ៊ុនជាបន្ទាន់ ទោះក្នុងរូបភាព ឬក្នុងគោលបំណងណាក៏ដោយ រហូតដល់ មានការសម្រេចជាថ្មី ពីក្រសួងបរិស្ថាន។ ក្នុងករណីក្រុមហ៊ុនមិនអនុវត្តតាមការសម្រេចខាងលើ ក្រសួងបរិស្ថាន នឹងចាត់វិធានការច្បាប់ ជាធរមានបន្ថែមទៀត៕
